Springhil, Davis Kaonti, Misuri, i kam long Garth Robinson Oborn

7–13 Jun

Doktrin mo Ol Kavenan 63

“Wanem I Kamaot long Antap I Tabu”

Raetemdaon ol tingting mo filing we oli kam long Spirit, taem yu stap stadi long Doktrin mo Ol Kavenan 63. Wan tingting mo filing, maet yu luk se i smol, be i olsem wan sid; hem i save gro i kam wan samting we i gat mining, mo i karem frut taem yu stap gohed blong lukaotem mo tingting hevi long hem.

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Blong help blong lukluk nomo long ol skripja we ol memba blong klas oli faenem se i gat moa mining, yu save invaetem olgeta blong raetem sam ves aot long seksen 63 we oli wantem toktok raon long olgeta, i go long sam pis pepa, Afta, oli save kam tugeta long wan ples, mo stat blong toktok raon long ol ves ia we plante memba blong klas oli bin givim. Askem olgeta blong serem from wanem oli bin jusum ol ves ia.

Stap Tijim Doktrin

Doktrin mo Ol Kavenan 63:7–12

Ol saen oli kam tru long fet mo tru long tingting blong God.

• Blong statem wan storian insaed long klas long saed blong olgeta prinsipol we oli tijim insaed long Doktrin mo Ol Kavenan 63:7–12, bae i help blong luklukbak long samfala eksampol insaed long ol skripja, abaot ol pipol we oli bin witnesem ol saen o merikel ia. Maet ol memba blong klas oli save tingting long sam eksampol blong ol pipol we, fet blong olgeta, i bin kam strong tru long wan saen, (eksampol, luk long Luk 1:5–20, 59–64,) o blong ol pipol we oli no bin stap strong iven afta we oli bin witnesem wan saen (eksampol, luk long 1 Nifae 3:27–31; Alma 30:43–56). Afta, ol memba blong klas oli save yusum wanem we oli lanem insaed long Doktrin mo Ol Kavenan 63:7–12 blong eksplenem fasin blong man taem i luk ol saen. O oli save luklukbak long sam nara skripja abaot ol saen, olsem olgeta we oli stap long lis ansa long “Saen” insaed long Gaed blong Ol Skripja (olskripja.churchofjesuschrist.org). ?Olsem wanem nao bae yumi sua se yumi no stap lukaotem o dipen long ol saen olsem wan fandesen blong bilif blong yumi?

Doktrin mo Ol Kavenan 63:13–16

Jastiti i minim blong kipim ol tingting mo ol aksen blong yumi oli klin evriwan.

• Nomata se, plante samting we oli stap long Doktrin mo Ol Kavenan 63:13–16 i tokbaot adaltri speseli, olgeta prinsipol we oli stap tijim, oli save yusum long eni kaen wei we yumi brekem loa blong jastiti. Tingting blong invaetem ol memba blong klas blong faenemaot wanem nao ol stret risal blong hemia insaed long Doktrin mo Ol Kavenan 63:13–16. Ol saen ia oli save mekem yumi ‘lukaotgud” (ves 15) o oli ol saen we oli givim woning blong ol risal ia. Mo tu, oli save toktok raon se, long tingting blong olgeta, ol risal ia oli minim wanem. Eksampol. ?From wanem nao taem wan i brekem loa blong jastiti bae i lidim hem long jajmen ia we “olsem wan trap” long hem (ves 15)? ?From wanem nao Lod i givim kaonsel long yumi blong “sakem sin kwiktaem” (ves 15) ol sin long saed blong seks? (Luk long toktok blong Sista Linda S. Reeves insaed long “Sam Moa Risos”).

• Sapos yufala i ridim Doktrin mo Ol Kavenan 63:16, i save lidim yufala blong toktok raon abaot strong paoa blong ponografi we i stap oltaem insaed long sosaeti blong yumi. ?Olsem wanem ol woning ia insaed long ves 16 i go wetem problem ia? (Iven we revelesen ia i tokbaot speseli ol man we oli gat rabis tingting long ol woman, olgeta woning ia, oli blong evriwan.) ?Wanem nao bae yumi save mekem blong protektem yumi mo olgeta we yumi lavem, long ponografi? Maet ol memba blong klas oli glad blong givim advaes long wanwan long olgeta. Websaet ia, AddressingPornography.ChurchofJesusChrist.org i save givim hop mo i save givim help long eniwan we maet i stap gat hadtaem wetem ponografi.

  

  Yumi gat blesing taem yumi stap obei long loa blong jastiti.

Doktrin mo Ol Kavenan 63:58–64

Ol tabu samting, oli mas tritim olgeta wetem respek.

• Maet yu mo klas blong yu i save toktok raon long Doktrin mo Ol Kavenan 63:58–64 olsem wan woning agensem fasin blong yusum nogud nem blong Lod, mo yusum sam long ol risos insaed long atikol insaed long Gospel Topic we taetol blong hem i, “Profanity” (topics.ChurchofJesusChrist.org;) hemia i save kam sapotem storian blong yufala. Mo tu, yufala i save helpem ol memba blong klas blong yusum ol ves ia long plante moa samting. Eksampol. Yufala i save toktok raon wanem sentens ia, “oli no gat atoriti” (ves 62) i ademap long wanem yufala i andastanem long skripja ia. Ol memba blong klas oli save mekem wan lis blong ol nara tabu samting we oli kam “long heven” o oli kam long God. ?Wanem nao i minim blong “lukaotgud” blong tokbaot ol samting ia? (ves 64).

Sam Moa Risos

Jastiti i mekem yumi kwalifae blong gat kampani blong Tabu Spirit.

Sista Linda S. Reeves, foma memba blong Rilif Sosaeti Jeneral Presidensi i tijim:

“Mi no save wan samting moa we bae i mekem yumi kwalifae long kampani blong Tabu Spirit oltaem, olsem klin fasin i mekem yumi kwalifae. …

“Taem yumi stap wajem, ridim, o traem eni samting we i andanit long ol standet blong Papa long Heven, bae i mekem se yumi no strong. I nomata long wanem yia we yumi gat, sapos yumi stap lukluk long, stap ridim, stap lisin, o jusum blong mekem wanem we i no stap long standet blong Lod we oli stap long Blong Ol Yut Oli Kam Strong, nao yu tanem i of, yu brebrekem, yu sakem, mo yu sarem strong doa. …

“… Mi bilif se, sapos evri dei yumi save tingbaot mo luksave hamas lav ia we Papa blong yumi long Heven mo Sevya i gat long yumi, bae yumi wantem blong mekem eni samting blong stap bakegen wetem Tufala bakegen, wetem lav we i no save finis blong Tufala, i raonem yumi ” (“Worthy of Our Promised Blessings,” Ensign o Liahona, Nov. 2015, 10–11).

Stap Kam Antap long Fasin blong Yumi blong Stap Tij

Yusum tabu miusik. Ol mesej insaed long ol hym mo ol singsing we oli kam long Children’s Songbook oli save kam sapotem strong doktrin ia we yu stap stadi long hem insaed long ol skripja. Eksampol, singsing wan singsing abaot fasin blong presem nem blong God, olsem “Glory to God on High” (Hymns, no. 67), i save kam sapotem mesej we i stap long Doktrin mo Ol Kavenan 63:58–64.