“28 Jun–4 Julae. Doktrin mo Ol Kavenan 71–75: ‘I No Gat Wan Tul blong Faet we Oli Mekem Agensem Yufala we Bae I Win,’” Kam Folem Mi—Blong Sandei Skul: Doktrin mo Ol Kavenan 2021 (2020)
“28 Jun–4 Julae. Doktrin mo Ol Kavenan 71–75,” Kam Folem Mi—Blong Sandei Skul: 2021
I Stap long Hat blong Man blong Lukaot long Sipsip, i kam long Simon Dewey
28 Jun–4 Julae.
Doktrin mo Ol Kavenan 71–75
“I No Gat Wan Tul Blong Faet We Oli Mekem Agensem Yufala we Bae I Win”
Taem yu stap ridim Doktrin mo Ol Kavenan 71–75, tingting abaot ol pipol we yu stap tijim olgeta. ?Wanem nao yu save abaot olgeta? ?Wanem nao oli nidim?
Raetemdaon Ol Filing mo Tingting blong Yu
Invaetem Man blong Serem Wanem Oli Gat
Invaetem ol memba blong klas blong serem sam long ol trutok ia we oli faenem long taem blong stadi blong olgeta long Doktrin mo Ol Kavenan 71–75. ?Wanem eksperiens nao oli bin gat wetem ol trutok ia?
Stap Tijim Doktrin
Yumi save folem givhan blong Tabu Spirit taem yumi stap difendem ol bilif blong yumi.
-
?Yumi bin filim olsem se yumi fraet o yu harem se i had blong difendem ol bilif blong yumi? Maet yu save invaetem ol memba blong klas blong raetem long bod, ol toktok o sentens we oli faenem insaed long Doktrin mo Ol Kavenan 71 we oli tokbaot olsem wanem Lod i bin askem Josef mo Sidni blong fesem ol toktok blong agens we i kam long Esra But mo ol narawan. Afta long hemia, ol memba blong klas oli save stap long ol smol grup mo toktok raon long wanem nao ol instraksen ia oli minim long yumi tedei. ?From wanem i impoten blong yumi tekem aksen “folem pat blong Spirit ia” we Lod i stap givim yumi? (ves 1).
Mo tu, bae i help blong oli wajem vidio ia, “Everyday Example: When Beliefs Are Questioned” (ChurchofJesusChrist.org). Ol memba blong klas oli save lukaotem ol wei we oli soemaot ol trutok we oli stap long seksen 71 insaed long vidio ia. Maet oli save ol eksampol blong wei we Sevya i bin fesem ol strong toktok ia (eksampol, luk long Matiu 22:15–22; 26:59–64; Jon 10:37–38).
Ol bisop oli ol man blong lukluk ova long ol afea, long saed blong spirit mo long saed blong laef long wol ia, blong kingdom blong Lod.
-
?Olsem wanem nao ol instraksen blong Lod i go long Niuwel K. Witni, taem we oli singaotem hem i kam bisop long Ketlan, i save helpem olgeta we yu stap tijim blong save glad moa from ol bisop ia we Lod i bin singaotem olgeta blong wok blong olgeta? Yu save askem ol memba blong klas blong lukluk insaed long Doktrin mo Ol Kavenan 72:8–16, mo lukaotem sam long ol responsabiliti blong Bisop Witni, mo afta, komperem olgeta long ol responsabiliti blong ol bisop tedei (luk long hao Presiden Gordon B. Hinckley i tokbaot ol responsabiliti blong ol bisop insaed long toktok blong hem we i stap long “Sam Moa Risos,”o vidio ia: “The Office of Bishop” [ChurchofJesusChrist.org]). Maet ol memba blong klas oli save serem olsem wanem seves blong wan bisop i bin blesem olgeta. ?Wanem nao yumi save mekem moa fulwan blong sapotem bisop blong yumi?
Pikjaol barel mo ol bag blong kaekaeBisop i stap helpem ol memba blong oli lukluk long nid blong olgeta long laef long wol ia.
Yumi save lukaotem ol janis blong serem gospel.
-
Lod i bin talem long Josef Smit mo Sidni Rigdon blong prijim gospel “folem hamas hem i posibol blong mekem” (Doktrin mo Ol Kavenan 73:4) mo semtaem, wok long translesen blong Baebol. Maet ol memba blong klas oli save serem wanem nao oli bin faenem se “i posibol blong mekem—o i rili save hapen—blong serem gospel, long medel blong ol nara responsabiliti blong olgeta. Bae oli save faenem sam kaonsel we i save help insaed long mesej blong Elda Dieter F. Uchtdorf: “Misinari Wok: Stap Serem Wanem I Stap long Hat blong Yu” (Ensign o Liahona, Mei 2019, 15–18).
God i wantem yumi blong “wok wetem strongfala paoa blong [yumi].”
-
Instraksen blong samfala elda abaot wei blong serem gospel i save givim insperesen long ol memba blong klas blong serem gospel wetem moa strong tingting. Antap long bod, yu save raetem: wok wetem strongfala paoa blong yu, mo askem ol memba blong klas blong mekem wan lis blong ol toktok mo ol sentens we oli kam long maen blong olgeta taem oli tingting long wan we i stap wok wetem strongfala paoa blong hem blong stap serem gospel. Oli save toktok raon tu se, i minim wanem blong “stastap” o “stap nating,” long saed blong serem gospel. ?Wanem nao Doktrin mo Ol Kavenan 75:2–16 i tijim yumi abaot wei we Sevya i sapotem olgeta we oli fetful blong stap wok blong Hem?
Sam Moa Risos
Ol responsabiliti blong wan bisop.
Presiden Gordon B. Hinckley i bin tijim:
“Mi stap tekem insaed long hat blong mi, wan bigfala glad mo tangkyu from ol bisop blong yumi. Mi mi glad tumas from revelesen we i kam long Hem we I Gat Olgeta Paoa, we ofis ia, oli krietem mo i wok anda long paoa blong Hem.
“ … Mifala i wantem luk yufala i stanap olsem prisaeding hae pris blong wod, wan kaonsela blong ol pipol, wan we i stap difendem mo helpem olgeta we oli stap long trabol, wan we i givim kamfot long olgeta we oli harem nogud, mo wan we i givim samting long olgeta we oli stap long nid. Mifala i wantem luk yufala i stanap olsem wan gadman mo wan we i protektem doktrin ia we oli stap tijim insaed long wod blong yufala, we i gadman mo protektem kwaliti blong tijing, mo luk se i gat man blong wok long ol plante ofis olsem we i nid. …
“ … Yufala i mas lukluk se i no gat wan i go hanggri, o i no gat klos o haos blong slip long hem. Yufala i mas save situesen blong evriwan we yufala i stap prisaed ova long olgeta.
“Yufala i mas stap olsem man blong givhan mo wan gaed long ol pipol blong yufala. Doa blong yufala i mas open long eni krae blong wan we i stap long hadtaem. Bak blong yufala i mas strong blong save serem ol hevi trabol blong olgeta. Yufala i mas go aot mo toktok wetem lav, iven long hem ia we i stap mekem rong samting” (“The Power of Teaching Doctrine,” Ensign, May 1999, 52 52).
Stap Kam Antap long Fasin blong Yumi blong Stap Tij
Kam olsem wan tija we i moa olsem Kraes. Tingting blong yusum ol kwestin blong skelem yuwan we oli stap long pej 37 blong Teaching in the Savior’s Way blong helpem yu blong lanem olsem wanem yu save tij moa olsem Sevya.