sipsip we i stap folem Jisas

Stap Gobak Hom, i kam long Yongsung Kim

12–18 Julae

Doktrin mo Ol Kavenan 77–80

“Bambae Mi Lidim Yufala I Go”

Tingbaot se ol aktiviti insaed long aotlaen ia oli ol tingting nomo. Taem yu stap prea mo stadi long Doktrin mo Ol Kavenan 77–80, Spirit bae i soem rod long yu blong save bes wei blong tijim ol memba blong klas blong yu.

Raetemdaon Ol Filing mo Tingting blong Yu

serem pikja bokis

Invaetem Man blong Serem Wanem Oli Gat

Bae sam memba blong klas blong yu bae oli laekem moa blong serem ol niufala tingting blong olgeta sapos yu askem olgeta longtaem bifo klas. Tingting blong kasem sam long olgeta sam dei bifo klas blong askem olgeta sapos oli save kam we oli rere blong serem wan samting we i bin tajem olgeta bigwan insaed long Doktrin mo Ol Kavenan 77–80.

tijing pikja bokis

Stap Tijim Doktrin

Doktrin mo Ol Kavenan 77

God i stap talemaot ol sikret blong Hem long olgeta we oli lukaot blong save olgeta.

• Ol memba blong klas blong oli save serem sam niufala tingting we oli faenem abaot ol simbol insaed long buk blong Revelesen long taem blong stadi blong olgeta long seksen 77 long wik ia. Sapos yufala i tokbaot ol ansa we Josef Smit i bin kasem, hemia i save lidim wan storian insaed long klas abaot olsem wanem ol memba blong klas oli save lukaotem blong haremsave samting taem oli stap stadi long ol skripja. ?Wanem nao yumi lanem aot long ol kaen kwestin we Josef i bin askem? Maet bae ol memba blong klas oli wantem serem ol eksperiens blong olgeta abaot wan taem we ol gospel kwestin blong olgeta i lidim olgeta i go long wan bigfala moa haremsave.

Doktrin mo Ol Kavenan 78:17–19

Lod bae i lidim yumi i go.

• Blong statem wan storian raon long Doktrin mo Ol Kavenan 78:17–19, yu save soem ol pikja blong samfala memba blong klas blong yu taem we oli ol smol pikinini (askem olgeta bifo taem blong oli tekem ol pikja ia i kam long klas). Letem klas i traem blong talem se huia i stap long wanwan pikja. Ol memba blong klas, we oli tekem pikja blong olgeta i kam long klas, oli save tokbaot olsem wanem oli bin jenis afta we oli bin tekem ol pikja ia. Afta, klas i save ridim Doktrin mo Ol Kavenan 78:17–19 mo tingting hevi long ol kwestin olsem: ?Long wanem wei nao yumi, long ae blong Lod, yumi olsem ol smol pikinini? ?Long wanem wei nao Hem i wantem yumi blong stap olsem ol smol pikinini (luk long Mosaea 3:19), mo long wanem wei nao Hem i wantem yumi blong stap groap? ?Wanem kaonsel nao Hem i stap givim long yumi long ol ves ia blong helpem yumi blong stap groap?

  Blong mekem se ol memba blong klas blong yu oli openem save blong olgeta long hao nao Lod i save “lidim [yumi] folem rod” (ves 18), tingting blong serem toktok we i stap long Sam Moa Risos.

Doktrin mo Ol Kavenan 79–80

Singaot ia blong go wok blong God i moa impoten bitim ples we bae yumi go wok long hem.

• Maet i gat samfala pipol insaed long klas blong yu we, fastaem, oli no glad wetem wan koling we oli kasem insaed long wod o branj, o wetem ples we oli sendem olgeta blong go wok long hem olsem wan misinari. Maet samfala memba blong klas bae oli glad blong serem ol eksperiens blong olgeta. ?Olsem wanem kaonsel blong Lod insaed long Doktrin mo Ol Kavenan 80:3 i helpem yumi long ol situesen ia? ?Wanem nao sentens ia “i nomata” i minim? ?O wanem nao sentens ia, “i no save mekem mistek” i minim? ?Wanem nao i impoten tumas long Lod, taem yumi tokbaot ol koling blong yumi? Lukluk blong Elda David A. Bednar long saed blong seksen 80 long toktok blong hem “God I Singaotem Yu long Wok” i save help (Ensign o https://www.churchofjesuschrist.org/general-conference/2017/04?lang=bis, Epril 2017).

• Ol revelesen insaed long ol seksen 79 mo 80 long fas ples, i go long ol pipol we oli singaotem olgeta blong prijim gospel, be insaed long ol revelesen ia, i gat olgeta prinsipol we yumi evriwan i save yusum o praktisim insaed long seves blong yumi i go long Lod. Blong helpem ol memba blong klas blong faenem ol prinsipol ia, yu save askem olgeta blong priten se oli gat wan fren we i jes joenem Jos, mo i jes kasem fasfala koling blong hem. Invaetem ol memba blong klas blong raetem wan leta blong sapot mo kaonsel i go long fren blong olgeta, mo leftemap tingting blong olgeta blong yusum ol toktok we oli stap long ol seksen 79 mo 80 taem oli stap mekem olsem. Afta, samfala memba blong klas oli save serem wanem we oli bin raetem.

  ol woman oli toktok

  Lod i glad taem yumi givim wok blong Hem mo blong ol narafala man.

sam moa risos pikja bokis

Sam Moa Risos

Lod bae i lidim yumi tru long Tabu Spirit.

Presiden Henry B. Eyring i bin serem wan eksperiens blong wan taem we hem i bin prea blong kasem help blong tekem wan bigfala impoten desisen, mo i bin lanem blong letem Lod i lidim hem:

“Mi bin prea, be mi wet plante aoa, mo i luk se i no gat ansa. Jes bifo san i go daon, wan filing i kam long mi. I moa strong bitim eni taem we, stat we mi pikinini i kam, mi bin filim wan strong filing. Hat mo maen blong mi, i luk se oli stap kwaet nomo. I bin gat wan pis insaed long ples ia, insaed mi, we i kwaet evriwan.

“Olsem nomo, long sapraes blong mi, mi bin stap prea: ‘Papa long Heven, i nomata se mi mi wantem wanem. Mi no kea long wanem mi mi wantem. Mi mi wantem nomo se bae Yu yu mekem tingting blong Yu. Hemia nomo mi wantem. Plis, talem long mi wanem blong mi mekem.’

“Long tetaem ia, mi bin filim wan kwaet insaed long mi, we mi neva filim bifo. Mesej i kam; mo mi save stret se huia i sendem mesej i kam. Wanem blong mi mekem, i bin klia gud. Mi no kasem wan promes sapos mi mekem hemia. Mi bin save stret nomo se mi mi wan pikinini, we oli talem long mi wanem rod blong folem, mo rod ia bae i go long eni samting we Hem nao i bin wantem blong i hapen long mi” (“As a Child,” Ensign o Liahona, May 2006, 16).

Stap Kam Antap long Fasin blong Yumi blong Stap Tij

Stat wetem ol skripja. Bifo yu ridim ol narafala risos, wetem strong tingting, stadi strong mo tingting hevi long ol skripja. Hemia bae i invaetem Spirit blong helpem yu blong yusum wanem we yu bin stadi taem bae yu tij (luk long Teaching in the Savior’s Way, 12).