“19–25 Julae. Doktrin mo Ol Kavenan 81–83: Taem ‘Mi Givim Plante, Mi Askem Plante,’” Kam Folem Mi—Blong Sandei Skul: Doktrin mo Ol Kavenan 2021 (2020)
“19–25 Julae. Doktrin mo Ol Kavenan 81–83,” Kam Folem Mi—Blong Sandei Skul: 2021
Kraes mo Yangfala Rij Loya, i kam long Heinrich Hoffman
19–25 Julae
Doktrin mo Ol Kavenan 81–83
Taem “Mi Givim Plante, Mi Askem Plante”
Tingbaot se ol memba blong klas blong yu oli gat ol eksperiens long saed blong spirit taem oli bin stap stadi long ol skripja long hom. Wetem prea, tingting long hao yu save leftemap tingting blong olgeta blong oli serem eksperiens blong olgeta blong stap leftemap tingting blong wanwan long olgeta.
Raetemdaon Ol Filing mo Tingting blong Yu
Invaetem Man blong Serem Wanem Oli Gat
Invaetem ol memba blong klas blong oli jusum wan sentens long wanwan long ol seksen ia we bae i mekem wan gudfala taetol blong seksen ia: Doktrin mo Ol Kavenan 81, 82, mo 83. ?From wanem oli jusum ol kaen taetol ia?
Stap Tijim Doktrin
Doktrin mo Ol Kavenan 81:5; 82:18–19
Yumi wanwan i mas lukaotem “intres blong neba blong yumi.”
-
Aotlaen blong wik ia, insaed long Kam Folem Mi—Blong Wanwan Man, Woman mo Famli i givim sam kwestin blong tingting hevi long hem abaot Doktrin mo Ol Kavenan 81:5. Ol kwestin ia, oli ol gudfala kwestin tu blong toktok raon long olgeta insaed long klas blong yu. Mo tu, tingting blong serem wan eksperiens blong yuwan taem yu filim se “yu no strong” long sam wei, mo seves blong wan narawan i bin leftemap yu, o i bin mekem yu kam strong moa. Maet ol memba blong klas oli gat ol semmak eksperiens we oli wantem serem. Yu save wajem vidio ia “Works of God” (ChurchofJesusChrist.org) blong givim insperesen long ol memba blong klas blong oli givim seves long wanwan long olgeta. Maet yu save serem tu toktok blong Presiden M. Russell Ballard we i stap long “Sam Moa Risos.”
-
Tingting blong askem ol memba blong klas blong stadi long Doktrin mo Ol Kavenan 82:18–19, mo lukaotem ol prinsipol we i helpem olgeta blong andastanem ol stamba tingting mo ol blesing blong stap givim seves long ol narawan. Afta, letem olgeta oli serem wanem we oli lanem. Mo tu, yu save soem vidio ia: “Teachings of Thomas S. Monson: Rescuing Those in Need” (ChurchofJesusChrist.org). ?Olsem wanem nao ol memba blong wod blong Bisop Monson oli bin soem eksampol blong wanem ol ves 18–19 oli stap tijim?
“Mi, Lod, mi mas mekem folem promes blong mi taem yufala i mekem wanem mi talem.”
-
Blong helpem ol memba blong klas blong oli andastanem rilesensip bitwin fasin we yumi wantem blong stap obei mo ol blesing we God i promesem, yufala i save ridim Doktrin mo Ol Kavenan 1:37–38; 82:10; 130:20–21 tugeta, o long ol smol grup. ?Wanem nao ol skripja ia oli stap tijim yumi abaot Lod? Maet ol memba blong klas oli save mekem wan lis blong ol toktok we oli tokbaot fasin blong Hem, hemia folem ol ves ia.
-
Afta we ol memba blong klas oli ridim ves 10, oli save tokbaot wanem we Lod i promesem yumi mo olsem wanem Lod i bin stap kipim ol promes blong Hem. Stori blong Sista Virginia H. Pearce we i stap long “Sam Moa Risos,” i save helpem ol memba blong klas blong luk se Lod i stap blesem yumi folem waes tingting blong Hem, be i no oltaem long wei we yumi wantem, o ting long hem.
-
?Wanem nao yumi lanem aot long Doktrin mo Ol Kavenan 82:8–10 abaot risen from wanem Papa long Heven i givim ol komanmen long yumi? Maet ol memba blong klas oli save faenem sam niu tingting long ol ves ia blong oli save yusum blong helpem wan fren o wan pikinini we i tingting se ol komanmen oli blokem man blong mekem samting (luk tu long vidio ia: “Blessed and Happy Are Those Who Keep the Commandments of God,” ChurchofJesusChrist.org). Maet oli save serem ol eksperiens we i bin tijim olgeta blong luk ol komanmen olsem ol blesing.
Sam Moa Risos
Relijin we I Stret Gud.
Presiden M. Russell Ballard i tijim:
“Wok blong yumi, blong stap disaepol, i askem plante samting, i gat fulap wari, mo wok blong mekem. Be, sam aktiviti i mas stap oltaem long hat blong Jos membasip blong yumi. ‘Nao, from hemia, Lod i givim komanmen ia: ‘Taswe, stap fetful; stanap long ofis we mi bin putum yu long hem; givhan long olgeta we oli no strong, leftemap ol han we oli hang i kamdaon, mo mekem ol ni ia we oli no strong oli kam strong moa’ [Doktrin mo Ol Kavenan 81:5; oli ademap italik].
“!Hemia i Jos blong Hem long aksen! !Hemia klin mo stret relijin! !Hemia i gospel wetem tru mining blong hem taem we yumi stap helpem, leftemap mo mekem i kam strong olgeta we oli gat nid long saed blong spirit mo laef! Blong mekem olsem, i nid blong yumi go visitim olgeta mo helpem olgeta, [luk long Jemes 1:27], blong mekem se testemoni blong fet blong olgeta long Papa we i stap long Heven, mo long Jisas Kraes mo Atonmen blong Hem bae i hang strong long hat blong olgeta” (“Ol Nambawan Presen we Oli Kam long God,” Ensign o Liahona, Mei 2018, 9).
Lod i blesem yumi long wei blong Hem we i gudfala tumas.
Sista Virginia H. Pearce, foma memba blong Ol Yang Woman Jeneral Presidensi, i tokbaot wan woman we i bin wari long ol pikinini blong hem we oli mestem rod. Hem i putum wan bigfala gol blong hem blong go moa long tempol, mo i bin filim se hem i sua se Lod bae i ona long bigfala sakrifaes blong hem, mo bae Lod i jenisim hat blong ol pikinini blong hem. Woman i ripotem se:
“Afta ten yia we mi stap go moa long tempol, mo mi prea oltaem, mi sore blong talem se ol joes blong ol pikinini blong mi, oli no jenis. …
“Be joes blong mi i jenis. Mi mi wan defren woman. … Mi nomo putum wan taem limit blong mekem samting, mo mi save wet long ansa blong Lod. … Wanem mi bin stap ting long hem, i jenis. Mi nomo ting se bae ol pikinini blong mi bae oli jenis, be mi ting mo wet se plante long ol sore blong Hem we Hem i givim long kaen fasin, bae oli kam moa, mo mi mi glad fulap mo talem tangkyu from hemia. Lod i wok long ol gudgudfala wei, mo mi fulap tru wetem pis ia we i bitim evri save blong man” (insaed long “Prayer: A Small and Simple Thing,” At the Pulpit [2017], 288–89).
Stap Kam Antap long Fasin blong Yumi blong Stap Tij
Invaetem ol yut blong oli kam wan pat blong lesen blong yu. Givim ol janis long ol yut blong oli tijim wanwan long olgeta bakegen. Taem bae oli harem ol testemoni blong olgeta, o ol eksperiens blong olgeta, bae i save lidim ol tingting. Olsem we i nid, helpem ol yut blong oli rere blong tij, mo soem olgeta se i minim wanem blong stap tij folem wei blong Sevya (luk long Teaching in the Savior’s Way, 27–28).