“5–11 Julae. Doktrin mo Ol Kavenan 76: ‘Praes blong Olgeta Bae I Bigwan, Mo Glori blong Olgeta Bae I No Save Finis,’” Kam Folem Mi—Blong Sandei Skul: Doktrin mo Ol Kavenan 2021 (2020)
“5–11 Julae. Doktrin mo Ol Kavenan 76,” Kam Folem Mi—Blong Sandei Skul: 2021
Ples blong Haed, i kam long Shaelynn Abel
5–11 Julae.
Doktrin mo Ol Kavenan 76
“Praes blong Olgeta Bae I Bigwan, Mo Glori blong Olgeta Bae I No Save Finis”
Olsem plante visen we oli raetem insaed long ol skripja, visen we i stap long seksen 76 i kam long Josef Smit mo Sidni Rigdon taem tufala i bin “stap tingting longtaem” long ol skripja (ves 19). Yu tu, yu save kasem revelesen—wetem help blong save wei blong tij—taem yu stap tingting hevi long Doktrin mo Ol Kavenan 76.
Raetemdaon Ol Filing mo Tingting blong Yu
Invaetem Man blong Serem Wanem Oli Gat
Blong helpem ol memba blong klas blong tokbaot wanem oli ridim insaed long Doktrin mo Ol Kavenan 76, yu save invaetem olgeta blong traem pikjarem, insaed long maen blong olgeta, se wan fren we i blong wan nara fet i askem wanem nao yumi biliv long hem abaot laef afta long ded. ?Wanem ves, aot long seksen 76 nao bae oli serem wetem fren blong olgeta? Ol memba blong klas oli save serem tu wan samting aot long “Ol Voes blong Restoresen: Ol Testemoni abaot “Visen’” we i bin tajem olgeta.
Stap Tijim Doktrin
Fasin blong sevem man i kam tru long Jisas Kraes, Pikinini blong God.
-
Plante long ol pipol, taem oli tingting long seksen 76,. oli tingting abaot plan blong fasin blong sevem man, mo ol trifala kingdom blong glori. ?Olsem wanem nao yu save helpem ol ol memba blong klas blong luk se man we i stap long medel blong revelesen ia, hem i Sevya Jisas Kraes? Yu save askem ol memba blong klas blong oli serem wan ves we oli faenem insaed long seksen 76 we i mekem fet blong olgeta long Jisas Kraes i kam strong moa. Sapos oli nidim help, maet yu save poenem olgeta i go long ol ves olsem: 1–5, 20–24, 39–43, 69, 107–8.
-
Blong helpem ol memba blong klas blong luklukgud long wanem i defren bitwin olgeta we oli kasem ol trifala kingdom blong glori ia, raetem long bod Selestial, ol ves 50–70, 92–96; Terestrial, ol ves 71–79, 97; mo Telestial, ol ves 81–90, 98–106, 109–12. Ol memba blong klas oli save jusum wan long ol trifala set blong ol ves ia, mo faenem ol sentens we i tokbaot ol rilesensip bitwin Jisas Kraes mo ol pipol we oli kasem ol defdefren kingdom ia. ?Wanem nao ol sentens ia oli stap tijim yumi abaot fasin blong stap ol disaepol blong Jisas Kraes? ?Olsem wanem yumi save mekem rilesensip blong yumi wetem Hem mo wetem Papa i kam strong moa? ?Olsem wanem nao Tufala i kamaot mo helpem yumi? ?I minim wanem blong stap “strong long testemoni long saed blong Jisas”? (ves 79).
Pikjarum long wan hom blong naentin senturiJosef Smit i bin luk visen blong ol digri blong glori insaed long wan rum olsem hemia.
Doktrin mo Ol Kavenan 76:5–10, 113–18
Ol sikret blong God, bae yumi save “haremsave nomo tru long paoa blong Tabu Spirit.”
-
Maet bae i intresting blong ol memba blong klas blong yu oli save se i no evri memba blong Jos we oli bin akseptem isi revelesen ia we i stap long seksen 76. Eksampol, Brigham Yang i bin talem: “Ol kastom blong mi oli we, taem Visen ia i kam long mi long fas taem, hem i agensem mo i no go nating wetem fasfala edukesen blong mi. Mi talem, Wet smol. Mi no bin sakemaot; be mi no save andastanem tu.” Hem i eksplenem se hem i mas “tingting mo prea, mas rid mo tingting, kasem taem we, miwan, mi bin save mo mi andastanem fulwan” (insaed long “The Vision,” Revelations in Context, 150). ?Wanem samting yumi lanem aot long eksperiens ia we i save helpem yumi taem God i soemaot ol samting we oli defren long wanem yumi andastanem naoia? ?Wanem nao Doktrin mo Ol Kavenan 76:5–10, 113–18 i stap tijim yumi abaot hao yumi save kasem “ol sikret blong tingting blong God”? (ves 10).
Doktrin mo Ol Kavenan 76:50–70, 92–95
God i wantem evriwan long ol pikinini blong Hem blong stap glad long wan selestial glori wetem Hem.
-
Long sam, bae i mekem se oli slakem tingting, o bae i tumas blong tekem, jes blong tingting nomo long evri samting we Hem i askem yumi blong kwalifae from, blong save go long selestial kingdom. Tingting long wei we yu save helpem ol memba blong klas blong oli save faenem hop “tru long Jisas, we i man blong toktok from [yumi]” (ves 69). Eksampol. Yu save invaetem olgeta blong ridim ol ves 50–70 mo 92–95. Invaetem olgeta blong serem olsem wanem oli save ansa long wan we i talem: “Blong laef folem gospel long wol blong tedei i had tumas; mi mi no sua se hemia i inaf,” o “mi mi no gud inaf nomo blong kasem selestial kingdom.” ?Wanem nao bae yumi save talem blong save givim insperesen o blong leftemap tingting blong man o woman ia?
Stap Kam Antap long Fasin blong Yumi blong Stap Tij
Lukluk Oltaem long Sevya mo Doktrin blong Hem. “Gohed blong askem yuwan: ‘?Hao nao wanem we mi stap tijim, bae i helpem ol memba blong klas blong mi blong oli bildimap fet blong olgeta long Kraes, sakem sin, mekem mo kipim ol kavenan wetem God, mo kasem Tabu Spirit?’”(Teaching in the Savior’s Way, 20).