Josef Smit i kasem Melkesedek Prishud

Restoresen, i kam long Liz Lemon Swindle

27 Julae–1 Ogis

Doktrin mo Ol Kavenan 84

“Paoa we I Olsem Hemia blong God”

?Wanem nao bae yu mekem blong invaetem ol memba blong klas blong serem wanem we oli bin lanem taem we oli bin stadi long Doktrin mo Ol Kavenan 84?

Raetemdaon Ol Filing mo Tingting blong Yu

serem pikja bokis

Invaetem Man blong Serem Wanem Oli Gat

Invaetem ol memba blong klas blong oli save serem wan trutok we oli faenem insaed long seksen 84 we i bin givim insperesen long olgeta, o i bin helpem olgeta blong andastanem moa prishud ia blong God. Afta invaetem samfala blong serem wanem oli gat wetem klas.

tijing pikja bokis

Stap Tijim Doktrin

Doktrin mo Ol Kavenan 84:1–5, 17–28, 31–42

Yumi evriwan i save yusum prishud paoa mo blesing blong God.

• Lod i statem “revelesen ia abaot prishud” (Doktrin mo Ol Kavenan 84, seksen heding) taem hem i stap tijim se bae oli bildim wan tempol long Saeon (luk long ol ves 1–5). ?Olsem wanem nao yu save helpem ol memba blong klas blong andastanem rilesensip bitwin ol tabu stamba tingting blong ol tempol mo prishud? Blong stat, yu save raetem wan kwestin long bod olsem: ?Wanem nao ol stamba tingting blong prishud? Mo afta, invaetem ol memba blong klas blong lukaotem ol ansa long Doktrin mo Ol Kavenan 84:17–28, 31–42. ?Olsem wanem nao ol tempol mo ol tempol odinens oli stap help blong mekem ol stamba tingting ia oli kamtru?

• Blong helpem ol memba blong klas blong andastanem paoa we prishud i save gat insaed long laef blong olgeta, yu save invaetem olgeta blong ridim Doktrin mo Ol Kavenan 84:17–28 mo tingting long wanem wei nao bae laef blong olgeta i defren sapos i no gat prishud blong God insaed long hem. Leftemap tingting blong olgeta blong serem from wanem oli talem tangkyu from prishud, mo tu, blong oli serem ol eksperiens we oli bin gat wetem prishud paoa—insaed long famli, koling blong olgeta, mo insaed long laef blong olgetawan. ?Olsem wanem nao yumi kasem mo yusum paoa blong prishud?

• Strong promes mo kavenan blong prishud, (luk long Doktrin mo Ol Kavenan 84:31–42) i speseli blong olgeta we oli odenem olgeta long wan prishud ofis. Be plante long ol blesing ia we Lod i promesem insaed long ol ves ia, oli blong evriwan. Blong helpem ol memba blong luk olsem wanem ol promes ia i blong olgeta tu, yu save invaetem olgeta blong ridim ol ves 33–42 mo tokbaot ol wei we yumi save “kasem” prishud (ves 35), mo “akseptem” ol wokman blong Lod, mo Lod. Oli save ridim tu ol toktok we oli stap long “Sam Moa Risos,” blong faenemaot wanem yumi nidim blong mekem blong kasem ol blesing blong prishud. Yu save helpem ol memba blong klas blong tingting long wanem i stap long “evri samting we Papa … i gat” (ves 38), olsem ol fasin blong Hem, mo kaen laef ia we Hem i stap gat mo glad long hem. ?Wanem moa i tajem yu long ol ves mo toktok ia?

  ol woman oli tekem sakramen

  Ol prishud odinens oli blesem evriwan long ol pikinini blong God.

Doktrin mo Ol Kavenan 84:61–88

Lod bae i sapotem o lukluk long olgeta we oli wok blong Hem.

• Nomata se ol ves ia oli blong olgeta we “bae i go mo prijim gospel ia blong kingdom” (ves 80), plante long ol prinsipol we oli stap insaed, i blong eniwan we i wok blong God. Yu save givim wok long wanwan memba blong klas blong ridim wan ves insaed long Alma 84:61–88 mo askem olgeta blong serem, wetem wan nara memba blong klas, wanem oli bin lanem we i blong eniwan we i wok blong Lod. Ol memba blong klas oli save jusum wan fevret ves o grup blong ol ves blong lanem baehat, o blong putum long wan ples we bae oli luk evri dei. ?Wanem nao ol promes we oli glad tumas long olgeta? ?Wanem nao bae yumi serem aot long ol ves ia blong givim insperesen long ol fultaem misinari we oli stap long misin naoia, o olgeta we oli stap rere blong givim seves long wan misin?

sam moa risos pikja bokis

Sam Moa Risos

Evriwan i save kasem evri samting we Papa i gat.

Presiden M. Russell Ballard i bin tijim: “Evriwan we i bin mekem ol tabu kavenan wetem Lod mo oli givim ona long ol kavenan ia, oli save kasem revelesen blong olgetawan, oli save kasem blesing tru long seves blong ol enjel, mo oli save toktok wetem God, oli save kasem fulwan blong gospel, mo long en, oli save kam blong save kasem, wetem Jisas Kraes, evri samting we Papa blong yumi i gat.” (“Men and Women and Priesthood Power,” Ensign, Sept. 2014, 32).

Fas Rilif Sosaeti presidensi blong Sol Lek Stek i bin raetem long 1878: “Mifala i filim se mifala i tangkyu tumas se, tru long blesing ia we i kam long Papa blong yumi long Heven, mifala, ol gel blong wok blong Hem, Hem i singaotem mifala blong wok long saed blong ol brata lida blong mifala blong bildimap kingdom blong God long wol ia, blong help blong bildimap Ol Tempol, we insaed long olgeta, bae yumi save kasem ol blesing blong taem naoia mo taem we i no save finis. Long evri odinens we yumi stap kasem insaed long Haos blong Lod, woman i stanap long saed blong man, tugeta blong olgeta we oli stap laef mo olgeta we oli ded, mo i soem se, man i no stap we i no gat woman, mo woman i no stap we i no gat man, folem fasin blong Lod” (Mary Isabella Horne, Elmina S. Taylor, and Serepta M. Heywood, “To the Presidents and Members of the Relief Society of Salt Lake Stake of Zion, Greeting!” Woman’s Exponent, Jan. 15, 1878, 123).

Stap Kam Antap long Fasin blong Yumi blong Stap Tij

Mekem tijing blong yu i lukluk nomo long doktrin. Mekemsua se ol storian blong yufala insaed long klas i lukluk nomo long fandesen doktrin ia insaed long ol skripja. Yu save mekem hemia taem yu askem ol memba blong klas blong ridim ol skripja, mo afta, serem ol trutok we oli bin faenem, mo tu, ol eksperiens blong olgeta blong laef folem ol trutok ia. (Luk long Teaching in the Savior’s Way, 20–21.)