“23–29 Ogis. Doktrin mo Ol Kavenan 93: ‘Kasem Ful Paoa mo Glori blong Hem,’” Kam Folem Mi—Blong Sandei Skul: Doktrin mo Ol Kavenan 2021 (2020)
“23–29 Ogis. Doktrin mo Ol Kavenan 93,” Kam Folem Mi—Blong Sandei Skul
Mi Luk Pikinini blong Man long Raet Han blong God, i kam long Walter Rane
23–29 Ogis
Doktrin mo Ol Kavenan 93
“Kasem Ful Paoa mo Glori blong Hem”
Ol pipol we yu stap tijim oli ol impoten boe mo gel blong Papa mo Mama long Heven mo oli gat wan tabu paoa blong save kasem. Afta we yu stadi long Doktrin mo Ol Kavenan 93, ?wanem nao yu filim blong mekem tru long insperesen, blong helpem olgeta oli groap “wetem laet mo trutok”? (ves 36).
Raetemdaon Ol Filing mo Tingting blong Yu
Invaetem Man blong Serem Wanem Oli Gat
Antap long bod, raetem Insaed long Doktrin mo Ol Kavenan 93, Jisas Kraes i bin invaetem yumi blong … Invaetem ol memba blong klas blong givim sam wei blong finisim sentens ia
Stap Tijim Doktrin
Yumi stap wosipim God we i Papa, mo Pikinini blong Hem, Jisas Kraes.
-
Long stadi blong olgeta long Doktrin mo Ol Kavenan 93, maet ol memba blong klas oli faenemaot plante trutok abaot Papa long Heven mo Jisas Kraes. Invaetem sam memba blong klas blong serem wanem oli faenem. Yu save serem klas i go long ol grup mo givim samfala ves blong oli stadi tugeta long olgeta. Afta, wanwan grup i save serem wetem klas wanem oli bin lanem abaot “olsem wanem blong wosipim [Hem], mo save wanem nao [yumi] stap wosipim” (ves 19).
Yumi save “kasem ful paoa mo glori blong hem, mo gat glori.”
Yumi kasem laet blong God taem yumi stap obei ol komanmen blong Hem, mo lanem samting aot long Hem.
-
Doktrin mo Ol Kavenan 93, insaed i save gat ol trutok abaot fasin blong yumi we i no save finis, mo hamas moa paoa yumi save kasem olsem ol pikinini blong God. Maet ol memba blong klas oli bin faenemaot hemia taem oli bin stadi long seksen 93 long hom (luk long aotlaen blong wik ia insaed long Kam Folem Mi—Blong Wanwan Man, Woman mo Famli). Olgeta we oli bin stadi, oli save serem wanem we oli bin faenem, mo yu save faenemaot sam moa trutok olsem wan klas. ?Olsem wanem nao ol trutok ia oli jenisim wei we yumi tritim ol narawan raon long yumi—o yumiwan bakegen?
-
Hemia i wan nara wei blong lanem samting abaot fasin blong yumi we i no save finis, mo hamas paoa moa yumi save kasem: ol memba blong klas oli save ridim tugeta ves 24 mo raetem long bod ol trifala heding ia: Olsem we yumi stap naoia, Olsem we yumi bin stap, Olsem we bae yumi kam. Afta, yu save serem klas long trifala grup, mo askem wanwan grup blong luklukgud insaed long Doktrin mo Ol Kavenan 93:6-39, mo lukaotem ol trutok abaot aedentiti blong yumi blong tedei, blong bifo, mo long fiuja. Wanwan grup i save raetem wanem we oli faenem andanit long ol heding. ?Olsem wanem nao ol trutok ia oli gat paoa blong lidim ol joes we yumi mekem?
Doktrin mo Ol Kavenan 93:40–50
Yumi kasem komanmen blong “putum oda insaed long haos blong [yumiwan].”
-
Komanmen ia blong “putum oda insaed long haos blong yu” (ves 43) i no abaot blong putum gud ol self mo kabod, be hem i abaot tijing—mo lanem samting—”laet mo trutok” (ves 42). Maet ol memba blong klas oli save serem olsem wanem oli stap traem blong folem kaonsel ia. ?Wanem nao sam long ol jalenj we oli fesem? ?Wanem trutok o prinsipol nao insaed long Doktrin mo Ol Kavenan 93 we i save help?
-
Olsem pat blong storian toktok blong yufala long saed blong ol ves ia, ol memba blong klas oli save ridim sam pat blong mesej blong Presiden Henri B. Eyring, “Wan Hom we Spirit I Stastap long Hem” ( Liahona, Mei 2019, 22–25) mo serem eni niu tingting we i go wetem ol trutok insaed long Doktrin mo Ol Kavenan 93:40–50. (Luk tu long toktok we i stap long “Sam Moa Risos.”)
Sam Moa Risos
“Luk se oli wok strong moa wetem strong tingting mo stap lukaot gud long hom.”
Elda David A. Bednar i tijim:
“Insaed long ofis blong mi, i gat wan naes peinting blong wan garen blong wit. Peinting ia, i wan bigfala grup blong wanwan smol mak blong peintbras—i no gat wan we, sapos yu tekem hemwan, i intresting tumas mo i mekem bigfala samting. Wanem i stap, i we, sapos yu stanap kolosap long kanvas ia, bae yu luk nomo ol smol mak blong bras we oli no joen mo oli no naes tumas, we oli yelo mo gol mo braon peint. Be, taem yu stap go longwe long kanvas ia, evri mak blong peintbras ia, we yu tekem evriwan tugeta, i givim wan naes pikja blong wan bigfala garen blong wit. Plante smol mak blong peintbras, we oli no impoten oli wok tugeta blong krietem wan naes peinting we i pulum ae.
“Evri famli prea, evri taem blong skripja stadi, mo evri famli haos naet i olsem taem yu pentem wan mak long kanvas blong sol blong yu. I no gat wan taem we i luk se i bigwan tumas blong man i tingbaot. Be semmak olsem wanwan laen we oli pentem i kam joenem narawan mo mekem wan naesfala peinting, taem yumi stap strong oltaem blong mekem ol smol samting oltaem, i save lidim yumi long ol bigfala risal long saed blong spirit. Taswe, yufala i no taed blong mekem gud samting, from we yufala i stap putum fandesen blong wan bigfala wok. Mo aot long ol smol samting, ol samting we oli bigwan oli kamaot” (D&K 64:33). Blong mekem samting oltaem, hem i wan ki prinsipol taem yumi stap putumdaon fandesen blong wan bigfala wok insaed long wanwan laef blong yumi, mo taem yumi stap kam blong wok moa wetem strong tingting, mo gat wari long hom blong yumi” (“More Diligent and Concerned at Home,” Ensign o Liahona, Nov. 2009, 19–20).
Stap Kam Antap long Fasin blong Yumi blong Stap Tij
Soemaot lav. “Folem ol situesen blong yufala, blong soemaot lav long olgeta we yu stap tij, i save minim blong talem ol gud toktok long olgeta we i kam long hat, hem i blong gat intres long laef blong olgeta, blong lisin wetem kea long olgeta, blong yusum olgeta long ol lesen, blong mekem ol aksen blong seves blong olgeta, o simpol nomo, blong welkamem gud o toktok gud long olgeta taem yu luk olgeta (Teaching in the Savior’s Way, 6).