Ketlan Tempol, i kam long Al Rounds

30 Ogis–5 Septemba

Doktrin mo Ol Kavenan 94–97

“Blong Mi Sevem Saeon”

?Olsem wanem yu save helpem ol memba blong klas blong oli wantem kasem olgeta blesing we Lod i promesem insaed long Doktrin mo Ol Kavenan 94–97?

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Maet ol memba blong klas oli save serem wan samting we oli bin ridim insaed long Doktrin mo Ol Kavenan 94–97 we i givim insperesen long olgeta blong oli go moa long tempol. O oli save serem ol nara mesej we oli givim insperesen long olgeta taem oli stap ridim ol seksen ia.

Stap Tijim Doktrin

Doktrin mo Ol Kavenan 95:8; 97:10–17

Insaed long tempol, God i blesem ol pipol blong Hem.

• ?Olsem wanem nao yu save yusum ol trutok ia we oli tijim insaed long Doktrin mo Ol Kavenan 95 mo 97 blong givim insperesen long ol memba blong klas blong wok strong moa wetem ful tingting blong lukaotem ol blesing blong tempol? Wan wei blong mekem hemia i blong putum wan pikja blong tempol long medel blong bod, mo askem ol memba blong klas se, long tingting blong olgeta, from wanem nao Lod i stap givim instraksen long Ol Sent blong Hem blong oli mas bildim ol tempol. Ol memba blong klas oli save lukaotem samfala ansa insaed long Doktrin mo Ol Kavenan 95:8; 97:10–17 mo raetemdaon wanem we oli faenem antap long bod, raon long pikja blong tempol. (Oli save faenem sam moa ansa tu insaed long “Why Latter-day Saints Build Temples” [temples.ChurchofJesusChrist.org].) ?Olsem wanem ol stamba tingting ia i bin kamtru insaed long laef blong yu? ?Olsem wanem yumi save mekem tempol i wan moa impoten pat blong laef blong yumi?

• Jos i givim plante risos we oli stap tij abaot ol tempol. Tingting long wanem wei nao yu save yusum ol risos ia blong mekem klas storian raon long Doktrin mo Ol Kavenan 95 mo 97 i kam rij moa, mo blong givim insperesen long ol memba blong klas blong wok strong moa wetem ful tingting blong lukaotem ol blesing blong tempol? Eksampol: bifo klas, yu save invaetem samfala memba blong klas blong luklukbak long ol risos long temples.ChurchofJesusChrist.org o Ol Tempol blong Jos Ia blong Jisas Kraes blong Ol Lata-dei Sent (spesel namba blong   Liahona, Okt 2010). Askem ol memba blong klas ia blong oli kam we oli rere finis blong serem wan samting we oli bin lanem we i sapotem ol tijing we oli stap long ol seksen 95 mo 97.

  Sapos yu stap tijim ol yut, yu save invaetem olgeta blong ridim “Mekem Tempol I Kam Wan Pat blong Laef blong Yu” (insaed long Ol Tempol blong Jos Ia blong Jisas Kraes blong Ol Lata-dei Sent 76–78) mo serem olsem wanem oli mekem tempol i kam wan fas samting insaed long laef blong olgeta.

  Tufala vidio ia, “Two Apostles Lead a Virtual Tour of the Rome Italy Temple” mo “Temples” (ChurchofJesusChrist.org) oli save helpem olgeta we oli stap rere blong go long tempol.

  Mo tu, yufala i save singsing tugeta wan hym abaot ol tempol mo toktok raon long wanem nao hym ia i stap tijim (luk long indeks blong ol topik insaed long Hymnso luk long Singsing Tabu mo Singsing blong Ol Pikinini).

Doktrin mo Ol Kavenan 97:8–9

Lod i save akseptem yumi.

• ?Wanem nao yumi lanem aot long Doktrin mo Ol Kavenan 97:8 abaot wanem hem i minim blong Lod i akseptem yumi? ?Olsem wanem nao hemia i defren long ol wei we, samtaem, yumi stap lukaotem blong wol i akseptem yumi? ?Wanem blesing we oli promesem, insaed long ves 9, long olgeta we Lod i akseptem olgeta? Ol memba blong klas oli save luklukbak long mesej blong Elda Erich W. Kopischke “Being Accepted of the Lord” (Ensign o Liahona, May 2013, 104–6) mo serem olsem wanem i helpem olgeta blong oli andastanem ol ves ia. Toktok we i stap long “Sam Moa Risos” i tekem invitesen blong Elda Kopischke blong lukaotem, insaed long laef blong yumi, blong Lod i akseptem yumi.

Doktrin mo Ol Kavenan 97:18–28

Saeon i olgeta “we hat blong olgeta i klin evriwan”.

• Blong helpem ol memba blong klas blong yu oli tingting abaot wanem hem i Saeon, yu save raetem long bod ?Wanem i Saeon? mo invaetem olgeta blong oli lukaotem ol ansa long Doktrin mo Ol Kavenan 97:19 mo 21 (luk tu long Moses 7:18; Gaed long Ol Skripja, “Saeon,” olskripja.ChurchofJesusChrist.org). Maet bae i help blong toktok raon long wei we Sevya i stap helpem yumi blong kam blong gat wan “hat we i klin evriwan. ?Wanem insperesen nao yu filim blong mekem blong bildimap Saeon long laef blong yumi? ?Insaed long wod o branj blong yumi? ?insaed long komuniti?

  

  Blong bildim Ketlan Tempol i bin mekem Ol Sent oli gat wan “hat we i klin evriwan.”

• Lod i bin tijim Saeon afta we, faswan, i givim komanmen long Ol Sent blong bildim wan tempol “blong sevem Saeon” (luk long Doktrin mo Ol Kavenan 97:12, 18–28). ?From wanem tempol i wan impoten pat blong bildimap Saeon? ?Olsem wanem nao ol promes we Lod i bin mekem abaot Saeon long ol ves 18–28 oli stap kamtru long taem blong yumi tedei

Sam Moa Risos

Blong Lod i akseptem yu.

Taem hem i stap gobak long “simpol paten” we oli tijim insaed long Doktrin mo Ol Kavenan 97:8, Elda Erich W. Kopischke i bin tijim:

“Blong stap lukaotem mo mekem se Lod i akseptem yumi, bae i lidim yumi long save ia se Hem i jusum mo Hem i blesem yumi. Bae yumi gat moa bigfala tras ia se bambae Hem i lidim yumi mo bambae Hem i daerektem yumi blong mekem gud. Ol sore blong Hem we oli kaen, bae oli kamaot klia insaed long hat blong yumi, insaed long laef blong yumi, mo insaed long ol famli blong yumi.

“Wetem ful hat blong mi, mi stap invaetem yufala blong lukaotem blong Lod i akseptem yufala mo stap glad long ol blesing ia we Hem i bin promesem. Taem yumi stap folem simpol paten we Lod i putum i stap, bambae yumi kam blong save we Lod i akseptem yumi, i nomata long posisen blong yumi, kaen laef blong yumi, o sapos bodi blong yumi i fulwan o no” (“Being Accepted of the Lord,” Ensign o Liahona, May 2013, 106).

Stap Kam Antap long Fasin blong Yumi blong Stap Tij

Kam blong save gud olgeta we yu stap tijim. Wanwan man o woman we yu stap tijim, hem i gat ples blong hem we i kamaot long hem, i gat lukluk blong hem, mo i gat ol samting we hem i save mekem, we oli blong hem nomo. Prea blong save olsem wanem kontribusen blong wanwan i save kam wan blesing long ful klas. (Luk long Teaching in the Savior’s Way, 7.)