“13–19 Septemba. Doktrin mo Ol Kavenan 102–105: ‘From Afta long Plante Hadtaem … Bae Blesing I Kam,’” Kam Folem Mi—Blong Sandei Skul: Doktrin mo Ol Kavenan 2021 (2020)
“13–19 Septemba. Doktrin mo Ol Kavenan 102–105,” Kam Folem Mi—Blong Sandei Skul: 2021
C. C. A. Christensen (1831–1912), Saeon Kamp c. 1878, tempera long muslin, 78 × 114 inches. Brigham Yang Yunivesiti Miusiom blong Art, presen we i kam long ol apupikinini blong C. C. A. Christensen, 1970
13–19 Septemba
Doktrin mo Ol Kavenan 102–105
“From Afta long Plante Hadtaem … Bae Blesing I Kam”
Taem yu stap rere blong tijim Doktrin mo Ol Kavenan 102-5, lisin long ol kwaet toktok blong Spirit. Bae Hem i save lidim yu long ol prinsipol we oli no tokbaot insaed long aotlaen ia, we bae i blesem ol pipol ia we yu stap tijim.
Raetemdaon Ol Filing mo Tingting blong Yu
Invaetem Man blong Serem Wanem Oli Gat
Ol memba blong klas oli save raetem wan o tu ves we oli kamaot long Doktrin mo Ol Kavenan 102–5 we oli faenem se i gat mining long olgetawan. Afta long hemia, oli save jenisim ol ves ia wetem wan nara memba blong klas mo toktok raon long wanem oli bin lanem aot long ol ves ia.
Stap Tijim Doktrin
Doktrin mo Ol Kavenan 103; 105
Ol tes blong yumi, oli tijim yumi ol impoten lesen, mo oli givim eksperiens long yumi.
-
Taem ol memba blong klas oli bin stadi long seksen 103 mo 105 long wik ia, maet oli faenem ol prinsipol we oli save helpem yumi long ol taem blong tes, o fasin blong agens; letem olgeta oli serem wanem we oli faenem. O maet yu save invaetem olgeta blong lukaotem ol kaen prinsipol olsem insaed long Doktrin mo Ol Kavenan 103:5–7, 12, 36; 105:5–6, 9–12, 18–19 (luk tu long “Sam Moa Risos”). ?Wanem nao ol prinsipol ia oli talem long yumi abaot olsem wanem yumi save mekem, taem yumi stap fesem hadtaem o taem yumi fesem wan taem we tingting i harem nogud? Maet ol memba blong klas bae oli glad blong serem sam eksperiens we oli luk ol blesing oli kam “afta long plante hadtaem” (Doktrin mo Ol Kavenan 103:12).
-
Sapos yu filim se blong gat sam histri bakgraon o sam stori blong sam man abaot Saeon Kamp, bae i help, yu save invaetem wan blong luklukbak long wan long ol risos ia bifo long klas, mo blong oli serem long sot taem wanem we oli bin lanem: Saints, 1:194–206; “The Acceptable Offering of Zion’s Camp” (Revelations in Context, 213–18); o “Ol Voes blong Restoresen: Saeon Kamp” (insaed long aotlaen blong wik ia, insaed long Kam Folem Mi—Blong Wanwan Man, Woman mo Famli). Sapos yumi save travel i gobak long tetaem ia, mo toktok long Saeon Kamp, ?bae yumi talem wanem blong leftemap tingting blong olgeta? ?Wanem nao bae oli save talem long yumi blong leftemap tingting blong yumi?
PikjaSmol revaSaeon Kamp i stap long saedsaed blong Little Fishing Reva, we pikja blong hem i stap ia.
Doktrin mo Ol Kavenan 104:11–18
Wanwan long yumi i “wan man blong lukaot long ol blesing we [Lod] i givim long wol ia.”
-
Blong helpem ol memba blong klas blong oli putum long olgetawan ol tijing we oli stap long Doktrin mo Ol Kavenan 104:11–18, yu save invaetem olgeta blong traem tingting, insaed long maen blong olgeta, se bae oli givim wan samting we i impoten tumas long olgeta, i go long wan blong i lukaot long hem. ?Wanem nao bae olgeta i talem long man o woman ia? ?Bae oli wantem luk se man o woman ia i mekem wanem? Afta, ol memba blong klas oli save ridim Doktrin mo Ol Kavenan 104:11–18 blong faenemaot wanem we Lod i putum long han blong yumi wetem tras blong Hem, blong yumi lukaot gud long hem, mo wanem nao Hem i wantem yumi blong mekem. ?Olsem wanem ol ves ia oli jenisim wei we yumi tingting abaot wol ia, ol blesing blong yumi, o ol pipol we oli stap raon long yumi?
-
Blong helpem ol memba blong klas blong andastanem “wei we … Lod, i bin talem wetem atoriti blong lukluk long ol sent blong [Hem]” (Doktrin mo Ol Kavenan 104:16), tingting blong soem vidio ia, “The Labor of His Hands” (ChurchofJesusChrist.org). Folem wanem yumi stap lanem aot long vidio ia, mo Doktrin mo Ol Kavenan 104:11–18, ?wanem nao i wei we Lod i givim blong lukluk long Ol Sent blong Hem? Yu save serem toktok ia we i kam long Presiden Marion G. Romney: “Lod bae i save lukaotgud long olgeta we oli pua Hemwan nomo, mo i no karem help blong yumi, sapos hemia i bin stamba tingting blong Hem blong mekem olsem. … Be yumi nidim eksperiens ia; from se, hem i tru long fasin blong lanem hao blong tekem kea long wanwan long yumi we yumi save developem, insaed long yumiwan, lav mo fasin ia we i olsem hemia blong Kraes, we yumi mas gat blong mekem yumi kwalifae blong gobak stap wetem Hem” (“Living Welfare Principles,” Ensign, Nov. 1981, 92). Givim sam minit long ol memba blong klas blong raetemdaon ol tingting mo filing blong olgeta abaot wei we oli save help blong lukaotgud long ol narawan long wei blong Lod.
Sam Moa Risos
Paoa ia blong ol tes we i mekem man i kam klin evriwan.
Elda Orson F. Whitney i bin tijim: “I no gat sobodi we yumi safa long hem, i no gat wan tes we yumi stap gotru long hem we i blong westem taem. Hem i givhan long edukesen blong yumi, long divelopmen blong ol kaen kwaliti ia olsem fasin blong save wet longtaem, fet, fasin blong gat strong paoa, mo fasin blong gat tingting i stap daon. Ol samting we yumi safa from mo ol samting we yumi stanap strong from, speseli nao taem yumi stanap strong wetem fasin blong save wet longtaem, i bildimap fasin blong yumi, i klinim hat blong yumi i kam klin, i mekem sol i gro bigwan moa, mo i mekem yumi kam kaen moa mo gat bigfala lav, we yumi inaf moa blong oli singaotem yumi ol pikinini blong God … Hem i tru long fasin blong harem nogud mo safaring, hadwok mo hadtaem, we yumi kasem edukesen ia we yumi long wol ia blong kasem, we i save mekem yumi kam moa olsem Papa mo Mama blong yumi long heven” (insaed long Spencer W. Kimball, Faith Precedes the Miracle [1972], 98).
Elda David A. Bednar i bin talem: “Long wan poen long wanwan laef blong yumi, bae oli invaetem yumi blong wokbaot long Saeon Kamp blong yumiwan. Taem we invitesen ia i kam, bae i defren, mo ol samting we bae yumi fesem long wokbaot ia, bae oli defren. Be hamas mo wei we yumi stap gohed mo stap strong blong folem singaot ia, long en, bae i givim ansa long kwestin ia: ‘?Hu i stap long saed blong Lod?’” (“On the Lord’s Side: Lessons from Zion’s Camp,” Ensign, July 2017, 35).
Stap Kam Antap long Fasin blong Yumi blong Stap Tij
Wok tugeta wetem ol memba blong famli. From se hom i senta blong stap laef folem gospel, mo senta blong lanem samting, ol hadwok blong yu blong mekem wan memba blong klas i kam strong moa, bae i wokaot gud nomo taem yu wok tugeta wetem ol memba blong famli” (Teaching in the Savior’s Way, 8–9).