Ol Sent we oli ronwe long ol rabis man

C. C. A. Christensen (1831–1912), Oli Ronemaot Ol Sent aot long Jakson Kaonti, Misuri, c. 1878, tempera long muslin, 77 ¼ × 113 inches. Brigham Yang Yunivesiti Miusiom blong Art, presen we i kam long ol apupikinini blong C. C. A. Christensen, 1970

6–12 Septemba

Doktrin mo Ol Kavenan 98–101

“Stap Kwaet, mo Save se Mi Mi God”

?Wanem kaen jalenj o tes ol memba blong klas blong yu oli stap gotru long hem? ?Wanem toktok blong kaonsel mo kamfot we i stap long Doktrin mo Ol Kavenan 98–101 we i save helpem olgeta?

Raetemdaon Ol Filing mo Tingting blong Yu

serem pikja bokis

Invaetem Man blong Serem Wanem Oli Gat

Invaetem ol memba blong klas blong oli save serem wan samting we oli bin lanem aot long Doktrin mo Ol Kavenan 98–101 we i bin helpem olgeta wetem wan tes o wan jalenj we oli bin stap fesem.

tijing pikja bokis

Stap Tijim Doktrin

Doktrin mo Ol Kavenan 98:1–3, 11–16, 23–30, 37; 101:2–5, 9–16

Ol tes blong yumi oli save wok tugeta blong gud blong yumi.

• Ol samting we oli kam agensem yumi, mo man we i agensem yumi, we yumi stap fesem tedei, i defren long wanem Ol Sent oli bin fesem long Misuri long 1833, be kaonsel blong Lod insaed long Doktrin mo Ol Kavenan 98, yumi stap yusum yet tedei. Blong helpem ol memba blong klas blong oli lanem samting aot long kaonsel ia, tingting blong raetem ol kwestin olsem ia long bod: ?Lod i wantem Ol Sent blong Hem blong luk long fasin blong agens long wanem wei? ?Olsem wanem Lod i wantem yumi mekem blong fesem ol samting we oli kam agensem yumi? Ol memba blong klas oli save wok long ol smol grup blong faenem ol ansa insaed long Doktrin mo Ol Kavenan 98:1–3, 11–16, 23–30, mo afta, toktok raon long wanem we oli lanem. ?Wanem trutok nao yumi faenem we i save helpem yumi blong stap olsem ol moa gud disaepol blong Jisas Kraes? Ol toktok insaed long “Sam Moa Risos” i save givim sam moa tingting long taem blong toktok insaed long klas.

• Long ol taem blong agens o tes, mesej ia we i kamaot long ol seksen 98 mo 101 oli save help: Lod bae i helpem yumi sapos yumi rere mo glad blong trastem Hem. Blong helpem ol memba blong klas blong faenem mesej ia, yu save raetem lis blong ol ves ia long bod, mo invaetem ol memba blong klas blong jusum sam ves blong ridim: Doktrin mo Ol Kavenan 98:1–3, 11–12, 37; 101:2–5, 9–16. Askem olgeta blong serem wanem we oli faenem we i leftemap tingting blong olgeta blong trastem Lod. ?Wanem nao ol ves ia oli tij abaot hao blong putum tras blong yumi long Lod? (Luk tu long Linda S. Reeves, “Claim the Blessings of Your Covenants,” Ensign o Liahona, Nov. 2013, 118–20.)

Doktrin mo Ol Kavenan 101:1–8, 43–62

Blong stap folem kaonsel blong God i helpem yumi blong stap sef.

• ?Olsem wanem nao yu save helpem ol memba blong klas blong oli luksave sefti we i kam taem yumi “mekem folem voes blong Lod”? (ves 7). Maet yu save invaetem sam memba blong klas blong aktemaot parabol we i stap long Doktrin mo Ol Kavenan 101:43–62 taem wan nara memba blong klas i stap ridim parabol ia laod. Afta, yufala i save toktok raon long ol kwestin olsem olgeta kwestin ia: Ol defren samting insaed long parabol ia, ?oli ripresentem wanem? ?Wanem i mekem se ol wokman ia oli lusum plantesen ia? ?Wanem lesen nao yumi lanem aot long ol aksen blong ol wokman ia? ?Wanem nao yumi lanem abaot Lod aot long ol aksen blong haeman ia? Bae i save help tu blong komperem ol ves 1–8 wetem ol ves 47–51, mo toktok raon long hao yumi save stap “fetful mo waes” long ol hadwok blong yumi blong bildimap Saeon insaed long wanwan laef blong yumi, insaed long ol hom blong yumi, mo olsem wan Jos.

  Jisas Kraes

  Wan smol pat blong peinting ia: Kraes mo Yangfala Rij Loya, i kam long Heinrich Hoffman.

sam moa risos pikja bokis

Sam Moa Risos

Blong tanem fes blong givim narasaed blong fes, i nidim strong paoa long tingting blong wan Kristin Man.

Elda Robert D. Hales i bin tijim:

“Sam pipol oli mekem mistek taem oli ting se ol fasin olsem blong no toktok, no stap flas, stap fogiv, mo talem wan hambol testemoni oli ol fasin blong wan we i slak, o i no gat strong tingting. Be blong ‘[lavem ol enemi blong yumi, mo blong blesem olgeta we oli sakem nogud tok long yumi, blong mekem gud long olgeta we oli no laekem yumi nating, mo blong prea from olgeta we oli no wantem luk yumi nating mo oli stap mekem nogud long yumi’] (Matiu 5:44) i tekem fet, paoa, mo antap long evriwan, strong paoa long tingting blong wan Kristin Man.

“Taem yumi no faetbak—taem yumi givim narasaed fes blong yumi mo yumi holemtaet kros blong yumi—yumi tu, yumi stanap wetem Sevya. Yumi soemaot lav blong Hem, we i wan paoa ia nomo we i save daonem enemi mo fesem olgeta we oli poenem fingga long yumi long wan wei we bae yumi no stap poenem fingga long olgeta bakegen. Hemia i no wiknes. Hemia i strong paoa long tingting blong wan Kristin Man.” (Christian Courage: The Price of DiscipleshipEnsign o Liahona, Nov. 2008, 72).

Blong fogivim man, i no minim se yumi agri wetem hem.

Elda Kevin R. Duncan i bin talem: “Ol brata mo sista. Plis yufala i no andastanem hemia i rong. Blong fogivim man, i no minim se yumi agri wetem hem. Yumi no akseptem eskius from ol nogud fasin, yumi no save letem ol nara man i mekem nogud long yumi from ol traehad, ol harem nogud, o ol wiknes blong olgeta. Be yumi save kasem moa save mo pis, taem lukluk blong yumi i go longwan moa. Fasin blong fogiv hem i wan naesfala prinsipol we i gat hiling. Yumi no nid blong stap wan viktim tu taem. Yumi save fogiv” (“Hiling Pomad blong Fasin blong Fogiv,”   churchofjesuschrist.org/general-conference/2016/04?lang=bis, Epril 2016).

Stap Kam Antap long Fasin blong Yumi blong Stap Tij

Yusum olgeta we oli stap traehad. Samtaem, ol memba blong klas we oli stap gat hadtaem blong mekem wan samting, oli jes nidim blong oli pat blong wan grup blong mekem se oli filim se man i lavem olgeta. Tingting blong askem olgeta blong akseptem wan wok long nekis lesen, mo invaetem olgeta blong kam long klas, o blong mekemsua se oli gat wan wei blong kam long Jos. No givap sapos oli no mekem folem ol samting we yu traem wetem olgeta long fas ples (luk long Teaching in the Savior’s Way, 8–9).