2–8 Ogis

Doktrin mo Ol Kavenan 85–87

“Yufala I Mas Stanap long Ol Tabu Ples”

No filim se yu mas go tru long evri ves—o iven evri seksen—blong Doktrin mo Ol Kavenan long Sandei Skul. Letem Spirit i lidim yu, mo folem gud wanem ol memba blong klas oli faenem we i go wetem laef blong olgeta.

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Ol memba blong klas oli save gotru long Doktrin mo Ol Kavenan 85–87 blong faenem wan toktok o wan sentens we i impoten long olgeta (maet wan we oli bin makem long skripja blong olgeta). Askem olgeta blong raetemdaon ol toktok o sentens blong olgeta long bod, mo jusum samfala blong toktok raon long olgeta.

Stap Tijim Doktrin

Doktrin mo Ol Kavenan 85:6

Spirit i stap toktok wetem wan “kwaet, smol voes.”

• Insaed long Doktrin mo Ol Kavenan 85:6, Profet Josef Smit i bin yusum wan lanwis we i talemaot gud olsem wanem Spirit i bin toktok long hem. ?Wanem nao yumi lanem abaot Tabu Spirit aot long ol toktok we oli stap? Yu save askem ol memba blong klas blong tingbaot ol taem we Spirit i bin toktok long olgeta—?olsem wanem nao bae oli tokbaot eksperiens blong olgeta? Oli save faenem sam moa ditel long ol skripja ia: Luk 24:32; Mosaea 5:2; Alma 32:28; Hileman 5:30; Doktrin mo Ol Kavenan 6:22–23; 11:12–13.

• ?Yu yu save tingting abaot wan lesen o wan aktiviti we yu yusum samting long hem we bae i soemaot ol kwaet, smol toktok blong Spirit? Mebi yu save gat wan tabu miusik i plei sloslo taem ol memba blong klas oli stap kam insaed long rum. Ol memba blong klas oli save tokbaot se miusik ia i mekem olgeta oli filim olsem wanem, mo hamas nao bae i had blong harem miusik ia sapos i bin gat ol nara strong noes. Hemia i save lidim yufala blong toktok raon long ol samting we i save pulumaot tingting blong yumi long kwaet, smol voes. Ol memba blong klas oli save serem wanem oli stap mekem blong mekem se oli save lisin moa long Spirit—i gat sam kaonsel we oli stap long “Sam Moa Risos.”

Doktrin mo Ol Kavenan 86:1–7

Olgeta we oli stret mo gud oli kam tugeta long ol las dei.

• Aktiviti ia i save helpem ol memba blong klas blong andastanem fasin blong yusum ol simbol insaed long parabol blong gudfala sid mo rabis gras: Yu save raetem ol simbol sentens ia aot long parabol (olsem “ol man blong planem sid ia,” “ol rabis gras oli jokem gudfala sid,” “niu sut blong sid i stap gro yet,” mo “putum tugeta ol gudfala sid” [ol ves 2–4, 7]) mo sam long ol mining blong olgeta (olsem “ol Aposol,” “Apostasi,” “Restoresen,” mo “misinari wok”) long ol defren pis pepa, mo postem olgeta long bod. Afta, ol memba blong klas oli save wok tugeta blong majem ol simbol wetem ol mining blong olgeta, mo oli yusum wanem we oli lanem aot long Doktrin mo Ol Kavenan 86:1–7 (mo tu, oli save rid long Matiu 13:37–43). ?From wanem hem i impoten blong Lod, insaed long revelesen ia, i toktok i go long “long yufala, ol wokman blong mi”? (ves 1). ?Wanem mesej nao yumi faenem, we i go wetem seves blong yumi i go long Lod? (luk tu long ves 11).

Doktrin mo Ol Kavenan 87:2, 6, 8

Pis, oli faenem long “ol tabu ples.”

Tempol hem i wan tabu ples we yumi save filim lav blong God.

• Blong helpem ol memba blong klas blong andastanem nid ia blong “stanap long ol tabu ples,” maet bae yu statem klas taem yu invaetem klas blong raetem wan lis blong ol jalenj we yumi stap fesem long ol lata dei ia. Oli save faenem sam eksampol long Doktrin mo Ol Kavenan 87:2, 6. Afta, oli save toktok raon long hao nao invitesen blong Lod insaed long ves 8 i save help wetem ol jalenj ia. Ol kwestin olsem oli save help:

  ?Wanem hem i impoten tumas abaot toktok ia, “stanap” long ves ia?

  ?Wanem nao i mekem wan ples i tabu?

  ?Wanem nao i save muvum wan man o woman i aot long wan tabu ples?

  ?Olsem wanem nao yumi save meksua se yumi no stap muvaot?

• Maet ol memba blong klas oli wantem blong serem, wetem wanwan long olgeta, ol eksampol blong “ol tabu ples” mo wanem nao i stap mekem se oli tabu (yu save poenemaot se wan tabu ples i moa bitim wan ples we i stap samples). Vidio ia: “Standing in Holy Places” (ChurchofJesusChrist.org) i save givim sam moa tingting. Taem oli stap serem ol eksampol ia, leftemap tingting blong olgeta blong tokbaot from wanem ol ples ia, oli tekem se oli tabu. ?Olsem wanem ol tabu ples ia oli helpem yumi faenem pis long medel blong ol denja blong ol lata-dei ia?

Sam Moa Risos

Faenem wan “taem we evri samting i no muv mo i stap kwaet, evri dei.”

Sista Vicki F. Matsumori, wan foma kaonsela long Praemeri Jeneral Presidensi i givim kaonsel ia: “From se Spirit, plante taem oli talem se hem i wan kwaet, smol voes, hem i impoten blong gat wan taem we ples i kwaet insaed long laef blong yumi tu. Lod i bin givim kaonsel ia long yumi blong “stap kwaet; yufala i mas save we mi mi God” [Ol Sam 46:10]. Sapos yumi putum wan taem we i samting i no muvmuv mo ples i kwaet evri dei, wan taem we televisen, kompiuta, vidio gem, o ol lektronik tul blong yumiwan oli no faerap long yumi, bae yumi letem kwaet mo smol voes ia i gat janis blong givim revelesen long yumiwan, mo blong i talem kwaet ol toktok blong soem rod, blong putum pis long maen, mo kamfot i kam long yumi” (“Helping Others Recognize the Whisperings of the Spirit,” Ensign o Liahona, Nov. 2009, 11).

Stap Kam Antap long Fasin blong Yumi blong Stap Tij

Yu rere wetem ol pipol i stap long maen blong yu. “Yu mas save andastanem ol pipol ia we yu stap tijim olgeta blong hemia i soem rod blong wei we bae yu rere . … Ol tija we oli olsem Kraes, oli no stap putum olgeta blong stap folem wan sem kaen stael o fasin blong tij; oli putum tingting blong olgeta blong helpem ol pipol blong bildimap fet long Jisas Kraes” (Teaching in the Savior’s Way, 7).