9–15 Ogis

Doktrin mo Ol Kavenan 88

“Stanemap … Wan Haos blong God”

Olsem wan gospel tija, yu gat responsabiliti blong helpem klas blong yu blong “tijim long wanwan long yufala bakegen, doktrin blong kingdom” mo “ ol toktok blong waes tingting” (Doktrin mo Ol Kavenan 88:77, 118). Antap long fasin blong serem ol samting we yu gat insperesen blong tijim aot long Doktrin mo Ol Kavenan 88, leftemap tingting blong ol memba blong klas blong tijim long wanwan long olgeta wanem we oli bin lanem.

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Samtaem wan pikja i save pusum wan blong i serem samting. Yu save soem wan pikja blong wan olif tri (o droem wan long bod) mo invaetem ol memba blong klas blong serem ol ves we oli kamaot long Doktrin mo Ol Kavenan 88 we i helpem olgeta blong andastanem from wanem Josef Smit i singaotem revelesen ia, wan ‘olif lif’ …, mesej ia blong pis blong Lod, we i kam long yumi” (seksen heding).

Stap Tijim Doktrin

Doktrin mo Ol Kavenan 88:6–50

Laet mo loa, oli kam long Jisas Kraes.

• Blong helpem klas blong yu blong andastanem Doktrin mo Ol Kavenan 88:6–50, yu save raetem laet mo loa long bod mo serem klas long tu grup. Wan grup i save luklukbak long Doktrin mo Ol Kavenan 88:6–13, 40–50, mo lukaotem ol samting we oli lanem abaot Jisas Kraes aot long ol refrens blong i givim moa laet long wanem i stap long ol ves. Nara grup i save luklukgud insaed long ol ves 13–26, 34–42, mo stap lukaotem wanem oli lanem abaot hamas i impoten blong stap folem loa blong Hem. ?Wanem nao ol trutok ia abaot laet mo loa insaed long seksen 88 we i save tijim yumi abaot Sevya? ?Olsem wanem nao oli save givim insperesen long yumi blong kam moa olsem Hem?

Doktrin mo Ol Kavenan 88:62–76, 119–26

Yumi save kam klin tru long Atonmen blong Jisas Kraes.

• Oda blong Lod blong “mekem yufala i kam tabu,” i kamaot tu taem insaed long seksen 88 (ol ves 68, 74). Sapos yu filim insperesen blong toktok raon long mining blong toktok ia, yu save stat blong lukluk wetem klas long ol defren mining blong toktok ia kam tabu o sanctify o luklukbak long sam long ol skripja we oli stap long lis anda long “Tabu, Fasin blong Mekem I Kam” insaed long Gaed long Ol Skripja (olskripja.ChurchofJesusChrist.org). Yu save invaetem tu ol memba blong klas blong ridim Doktrin mo Ol Kavenan 88:62–76, 119–26 mo toktok raon long ol kwestin olsem wetem wan patna: ?Olsem wanem nao yumi kam blong kam tabu? ?Wanem promes nao we i kam long Lod we yumi stap faenem insaed long ol ves ia? ?From wanem nao Lod i wantem yumi blong kam klin? Mo tu, oli save faenem ol ansa blong ol kwestin ia insaed long mesej blong Presiden Dallin H. Oaks: “Fasin blong Sakem Sin I Klinim Mi” (Ensign o Liahona, Mei 2019, 91–94; luk tu long “Sam Moa Risos”).

Doktrin mo Ol Kavenan 88:77–78, 118–26

Lod i wantem yumi blong lukaot blong lanem samting tru long stadi mo tru long fet.

• Kaonsel we Lod i givim blong help blong stanemap “skul blong ol profet” long Ketlan (ves 137) i save helpem klas blong yu long ol hadwok blong yu blong “yufala i tijim long wanwan long yufala bakegen, doktrin blong kingdom” (ves 77). Mebi yu save lukluk insaed long ol ves 77–78 mo 118–26 mo toktok raon long wei blong mekem klas blong yu i kam wan “haos blong lan” (ves 119). Ol memba blong klas oli save raetem sam “klas rul,” o ol prinsipol folem wanem i stap long ol ves ia, we bae i lidim olgeta blong lanem samting insaed long klas. Maet, yu save askem ol memba blong klas blong serem olsem wanem oli stap traem blong yusum olgeta prinsipol ia taem oli stap “lukaotem blong lanem samting” (ves 118).

  

  Ol hom blong yumi oli save stap ol ples blong lanem samting long saed blong spirit.

Doktrin mo Ol Kavenan 88:119

Tempol hem i haos ia blong God.

• Sapos i posibol, soem wan pikja blong tempol we i stap kolosap moa long yufala, mo putum i stap long bod; nao invaetem klas blong raet long saed blong tempol ia, ol toktok we oli stap long ves 119, we oli yusum blong tokbaot haos blong Lod. Invaetem olgeta blong serem ol eksperiens we i soem olsem wanem tempol i go stret wetem evri toktok ia. Mo tu, yu save tokbaot tu olsem wanem ves ia i save soem rod long laef blong yumi.

Sam Moa Risos

Fasin blong sakem sin i klinim mi.

Presiden Dallin H. Oaks i tijim:

“Fasin blong sakem sin i stat wetem Sevya blong yumi, mo hem i wan glad, i no wan hevi samting. …

“Taem yumi kam klin tru long fasin blong sakem sin, yumi lego ol sin blong yumi fogud mo konfesem olgeta long Lod mo long jaj blong Hem long wol ia, taem i mas olsem (luk long Doktrin mo Ol Kavenan 58:43). Alma i bin tijim se, yumi mas “karem i kam ol wok blong stret mo gud fasin” (Alma 5:35). Evri samting ia i pat blong skripja invitesen, we i kamaot oltaem, blong kam long Kraes.

“Yumi nidim blong tekem mo kakae sakramen evri Sabat dei. Long odinens ia, yumi stap mekem ol kavenan mo stap kasem ol blesing we i stap helpem yumi blong winim evri aksen mo tingting blong hat we i blokem yumi blong kam stret evriwan olsem we Sevya i stap invaetem yumi blong mekem (luk long Matiu 5:48; 3 Nifae 12:48). Taem we yumi ‘tanem baksaed blong [yumi] long evri fasin we i no olsem blong God, mo lavem God wetem ful paoa blong tingting, ful maen mo ful paoa blong [yumi], afta nao, … [yumi] save kam stret evriwan tru Kraes’ mo ‘kam tabu’ tru long blad blong Hem we i bin ron, blong yumi ‘kam klin evriwan, we [yumi] no gat mak’ (Moronae 10:32–33). !Hem i wan gudfala promes! !Hem i wan merikel! !Hem i wan blesing!” (“Fasin blong Sakem Sin I Klinim Mi,” Ensign o Liahona, Mei 2019, 91).

Stap Kam Antap long Fasin blong Yumi blong Stap Tij

Faenem ol risos blong sapotem ol prinsipol ia. Antap long ol tingting we oli stap long aotlaen ia, yu save lukaotem ol Jos vidio, ol miusik, o ol peinting blong save tijim ol prinsipol ia insaed long Doktrin mo Ol Kavenan 88. (Luk long Teaching in the Savior’s Way, 17–18.)