“16–22 Ogis. Doktrin mo Ol Kavenan 89–92: ‘Wan Prinsipol Wetem Wan Promes,’” Kam Folem Mi—Blong Sandei Skul: Doktrin mo Ol Kavenan 2021 (2020)
“16–22 Ogis. Doktrin mo Ol Kavenan 89–92,” Kam Folem Mi—Blong Sandei Skul
16–22 Ogis
Doktrin mo Ol Kavenan 89–92
“Wan Prinsipol Wetem Wan Promes”
Taem yu stap rere blong tij, tingting long olgeta prinsipol we oli kamaot klia long yu taem yu bin stap stadi long ol seksen 89–92 long wik ia.
Raetemdaon Ol Filing mo Tingting blong Yu
Invaetem Man blong Serem Wanem Oli Gat
Hemia samfala kwestin we yu save yusum blong leftemap tingting blong ol memba blong klas blong oli serem wan samting aot long skripja stadi blong olgeta: ?Wanem nao yu bin ridim, long wik ia, we i bin mekem fet blong yu long Jisas Kraes i kam strong moa? ?O i bin mekem se yu biliv strong moa se Josef Smit i bin kasem koling olsem wan profet? ?Wanem nao yu bin ridim we i bin helpem yu blong andastanem gud moa plan ia we Papa long Heven i gat long ol pikinini blong Hem?
Stap Tijim Doktrin
Tok blong Waes i wan “prinsipol wetem wan promes.”
-
Plante pipol oli save luk long Tok blong Waes olsem wan lis blong ol samting “blong mekem,” o blong “no mekem.” Blong helpem ol memba blong klas blong tingting hevi long ol prinsipol biaen long instraksen ia, invaetem olgeta blong luklukgud insaed long Doktrin mo Ol Kavenan 89 wetem ol kwestin olsem long maen blong olgeta: ?From wanem Lod i givim Tok blong Waes long yumi? ?Wanem nao revelesen ia i stap tijim yumi abaot Papa long Heven mo plan we Hem i gat blong yumi? Toktok we i stap long “Sam Moa Risos,” i save help tu. Sapos yu filim se bae i save helpem ol memba blong klas, yu save invaetem olgeta blong raetem wan lis, antap long bod, abaot ol helti mo ol rabis praktis we Lod i putumaot long Doktrin mo Ol Kavenan 89:5–17. Oli save luklukbak long “Helt long Bodi mo blong Filing” insaed long Blong Ol Yut Oli Kam Strong (24–27) mo ademap long lis blong olgeta ol nara samting we oli faenem. ?Olsem wanem nao ol promes we oli stap long ol ves 18–21 oli bin kamtru insaed long ol laef blong yumi?
-
Hemia i wan nara wei blong helpem ol memba blong klas blong toktok raon long ol prinsipol insaed long Tok blong Waes. Yu save serem klas long trifala grup, mo askem wanwan grup blong ridim seksen 89, blong lukaotem ol ansa long wan long ol kwestin ia: ?Wanem prinsipol i save leftemap tingting blong wan we i stap gat hadtaem blong obei long Tok blong Waes? ?Wanem prinsipol i save helpem yumi blong yumi no stap jajem olgeta we oli stap gat hadtaem blong obei long Tok blong Waes ia? ?Wanem prinsipol i save givim kamfot long yumi taem yumi gat ol helt problem i nomata se yumi stap laef folem Tok blong Waes? Olsem pat blong aktiviti ia, yu save serem eksperiens blong Presiden Dieter F. Uchtdorf taem hem i bin stap tren blong kam wan paelot blong faet (luk long “Continue in Patience,” Ensign o Liahona, May 2010, 58). Leftemap tingting blong ol memba blong klas blong tingtingbak long wan samting we oli bin filim strong blong mekem long taem blong storian, mo givim olgeta taem blong raetemdaon ol filing mo tingting blong olgeta.
God i talemaot Tok blong Waes blong helpem ol pikinini blong Hem.
Fas Presidensi i holem “ol ki blong kingdom.”
-
Aotlaen blong wik ia, insaed long Kam Folem Mi—Blong Wanwan Man, Woman mo Famli i talem blong ol memba oli luklukgud insaed long Doktrin mo Ol Kavenan 90:1–17 blong lanem abaot Fas Presidensi. Yu save askem ol memba blong klas blong oli save serem wanem oli bin lanem long hom aot long aktiviti ia, o yu save luklukgud insaed long ol ves ia olsem wan klas. Ol memba blong klas oli save faenem tu ol sentens insaed long, “Come, Listen to a Prophet’s Voice” (Hymns, no. 21) o wan nara singsing abaot ol profet, we i go wetem ol tijing we oli stap long ol ves ia. ?Olsem wanem seves blong Fas Presidensi i helpem yu blong save Papa long Heven mo Jisas Kraes?
“Spirit i talemaot trutok.”
-
Long wol tedei, yumi fesem ol mesej we, insaed, i gat “plante samting we oli tru” mo “plante samting we oli no tru” (ol ves 1–2). Invaetem ol memba blong klas blong lukluk insaed long seksen 91 blong kasem kaonsel abaot Apokrifa we i save helpem olgeta blong faenemaot trutok insaed long ol mesej we oli kam blong kasem. ?Wanem eksampol nao oli save serem long hao nao Spirit i bin helpem olgeta blong luksave trutok?
Sam Moa Risos
Tok blong Waes.
Presiden Boyd. K. Packer i bin tijim:
“Tok blong Waes, God i bin ‘givim olsem wan prinsipol wetem wan promes’ [Doktrin mo Ol Kavenan 89: 3]. Toktok ia, prinsipol, insaed long revelesen, i wan impoten toktok. Wan prinsipol, i wan trutok we i stap strong, i wan loa, wan rul we yu save yusum mo folem blong lidim yu blong mekem ol desisen. Plante taem, ol prinsipol, i no gat tumas ditel long hem. Hemia i mekem se yu yu fri blong faenem rod blong yu wetem wan trutok, wan prinsipol, we i stap strong, olsem wan angka blong yu.
“Ol memba oli stap raet blong askem sapos samting ia, o nara samting ia i agensem Tok blong Waes. Oli save gud se ti, kofi, ol strong dring mo tabak, oli agensem Tok blong Waes. Prinsipol ia, oli no talem plante samting abaot hem. Be, yumi tijim prinsipol ia tugeta wetem ol blesing blong promes. I gat plante evri dei fasin, ol adiksen samting we wan i save dring, o i save kakae, o i save pulum long nus, mo i stikim hem wetem, we bae i spolem tugeta samting ia, bodi mo spirit, we oli no tokbaot insaed long revelesen ia. …
“Givim ona long prinsipol blong Tok blong Waes, mo bambae yu kasem ol blesing blong promes” (“The Word of Wisdom: The Principle and the Promises,” Ensign, May 1996, 17–18).
Stap Kam Antap long Fasin blong Yumi blong Stap Tij
Serem testemoni blong yu plante taem. “Simpol mo tru witnes blong yu abaot wan trutok i save gat paoa blong lidim tingting blong olgeta we yu stap tijim. … Hem i no nid blong toktok blong yu i flas, o i longfala. Eksampol, hem i wan simpol testemoni abaot ol blesing we yu bin kasem taem yu bin laef folem Tok blong Waes. (Luk long Teaching in the Savior’s Way, 35.)