Kam Miting, i kam long Worthington Whittredge

3–9 Mei

Doktrin mo Ol Kavenan 46–48

“Lukaotem Wetem Strong Tingting, Ol Presen Ia we Oli Moa Gud Bitim Ol Narawan”

Taem yu stap ridim Doktrin mo Kavenan 46–48, Tabu Spirit bae i save testifae long yu abaot ol trutok insaed long ol seksen ia. Taem yu stap raetemdaon mo luklukbak long ol tingting mo filing we yu bin kasem, bae i save helpem yu blong faenem ol wei blong helpem ol memba blong klas blong faenemaot ol semfala trutok ia.

Raetemdaon Ol Filing mo Tingting blong Yu

Invaetem Man blong Serem Wanem Oli Gat

I save help blong ol memba blong klas oli serem, wanwan taem, olsem wanem skripja stadi blong olgetawan, o famli skripja stadi i stap gohed. Eksampol. Taem ol memba blong klas oli serem wan niu tingting abaot wan samting we olgeta, o wan memba blong famli i faenemaot long wik ia, yu save askem olgeta wanem nao oli bin stap mekem long taem blong stadi blong olgeta, we i mekem se oli kasem ol niu tingting ia.

Stap Tijim Doktrin

Doktrin mo Ol Kavenan 46:1–7

Yumi mas welkamem evriwan insaed long Jos Ia blong Jisas Kraes.

• Long plante, olsem wanem mo wanem oli filim insaed long ol miting blong Jos, i save lidim tingting blong olgeta blong stap strong insaed long Jos. Ol instraksen blong Lod insaed long Doktrin mo Ol Kavenan 46:1–7 i save helpem ol memba blong wod blong yu blong krietem moa eksperiens blong welkamem man mo ol visita, mo tu, blong oli gat moa wosip eksperiens we i gat mining. Ol memba blong klas oli save luklukgud insaed long ol ves ia, mo lukaotem ol prinsipol we i go wetem ol miting blong Jos, mo listim wanem oli faenem long bod. Long wanwan samting we i stap long lis ia, klas i save toktok raon se, prinsipol ia i luk olsem wanem taem oli praktisim.

• ?Olsem wanem nao ol instraksen blong Lod we oli stap insaed long Doktrin mo Ol Kavenan 46 i helpem ol memba blong klas blong luk ol miting blong Jos olsem wan janis blong filim Tabu Spirit? Yu save invaetem ol memba blong klas blong luklukgud insaed long Doktrin mo Ol Kavenan 46: 2 mo afta, toktok raon long wetaem nao oli bin luk ol lida mo ol tija oli lidim ol miting wetem Tabu Spirit. ?Wanem nao i rol blong olgeta we oli stap kam long ol miting ia? Tingting blong invaetem ol memba blong klas blong serem ol taem we oli bin filim se Tabu Spirit i bin lidim mo i bin help long wan miting.

• Maet yu save invaetem samfala memba blong klas blong oli save serem eksperiens blong olgeta abaot fas taem we oli bin kam long wan miting blong Jos Ia blong Jisas Kraes blong Ol Lata-dei Sent. ?Wanem nao i helpem olgeta blong oli fil welkam? ?Wanem advaes oli save givim long ol nara memba blong helpem olgeta blong mekem ol miting blong Jos blong yumi i welkamem gud ol man? Olsem wanem yumi save yusum kaonsel blong Lod we i stap long Doktrin mo Ol Kavenan 46:1–7? Letem olgeta oli praktisim wanem bae oli talem, o mekem, sapos oli luk wan fren i wokbaot i go long japel, o long klasrum blong fasfala taem.

• Wan hym olsem “’Tis Sweet to Sing the Matchless Love” (Hymns, no. 176 o 177) i save helpem ol memba blong klas blong tingting mo toktok raon long sam wei blong mekem ol miting blong Jos i mekem man i filim moa welkam mo i leftemap tingting blong olgeta. Maet ol memba blong klas oli save singsing hym ia tugeta mo oli serem ol aedia we oli kam long ol toktok blong singsing abaot wei blong helpem ol narawan blong oli filim lav blong God long jos.

  

  Lod i tijim se evriwan i welkam insaed long Jos blong Hem.

Doktrin mo Ol Kavenan 46:7–33

Papa long Heven i givim ol presen long saed blong spirit blong gud blong ol pikinini blong Hem.

• Ol fasfala Sent oli bin biliv strong se Tabu Spirit i save soemaot ol samting. ?Olsem wanem nao yu save helpem ol memba blong klas blong oli bildimap fet blong olgeta se ol presen ia oli save kamkamaot long laef blong yumi tedei? Blong stat, yu save invaetem ol memba blong klas blong ridim Doktrin mo Ol Kavenan 46:7–33; oli sidaon tutu, o long ol smol grup. Askem olgeta blong lukaotem faef presen long saed blong spirit, mo blong oli toktok raon long ol wei we oli bin luk ol presen ia oli bin kamkamaot long laef blong olgeta, o long laef blong wan we oli save—wetem tu, ol pipol insaed long klas. ?Wanem nao oli faenem we oli save serem wetem klas blong oli bildimap fet blong olgeta long ol presen ia?

• Lod i talem se ol presen we oli kam long Spirit, oli blong gud blong olgeta we oli fetful mo oli no blong “kasem wan saen” (ves 9). Maet ol memba blong klas oli save toktok raon long, hao nao, ol presen long saed blong spirit oli blong gud blong olgeta we oli fetful. ?Olsem wanem nao ol presen ia oli helpem olgeta we oli wantem blong kasem o mekem testemoni blong olgeta long saed blong gospel, i kam strong moa?

• Sam pipol oli lavem God mo oli traem blong obei long ol komanmen blong Hem, be oli no filim se oli bin gat eksperiens blong eniwan long ol presen ia we i kam long Spirit. Olsem wanem nao, kaonsel we i stap long Doktrin mo Ol Kavenan 46:7–33 i save help?

Doktrin mo Ol Kavenan 47

Tabu Spirit i save lidim yumi taem yumi stap mekem ol koling blong yumi.

• Plante pipol oli save andastanem wanem Jon Witma i bin filim taem hem i bin wantem stret save se koling blong hem i kam long God. Mebi ol memba blong klas oli save serem sam semmak eksperiens we oli bin gat. ?Wanem nao yumi faenem insaed long Doktrin mo Ol Kavenan 47 we maet i bin mekem Jon Witma i gat tras long hemwan long saed blong wok ia?

Stap Kam Antap long Fasin blong Yumi blong Stap Tij

Rol blong yu olsem wan tija. Blong stap tij i moa bitim blong jes presentem sam infomesen we yu rere long olgeta. Long medel blong sam moa samting, i minim blong krietem wan ples we ol memba blong klas oli save lan mo oli save faenemaot ol trutok olgetawan, mo oli save serem wanem we oli bin lanem wetem ol narawan. Eksampol. Truaot long lesen, askem ol memba blong klas abaot eksperiens blong olgeta blong stap stadi long ol skripja long hom.