“17–23 Mei. Doktrin mo Ol Kavenan 51-57: ‘Wan Wokman we I Fetful, I Stret, mo I Waes,’” Kam Folem Mi—Blong Sandei Skul: Doktrin mo Ol Kavenan 2021 (2020)
“17–23 Mei. Doktrin mo Ol Kavenan 51–57,” Kam Folem Mi—Blong Sandei Skul
Fasfala Hol long Graon, i kam long James Taylor Harwood
17–23 Mei
Doktrin mo Ol Kavenan 51–57
“Wan Wokman we I Fetful, I Stret, mo I Waes”
Samtaem, insperesen blong wanem blong tijim i save kam taem yu stap toktok raon long ol skripja wetem wan memba blong famli, o wan fren.
Raetemdaon Ol Filing mo Tingting blong Yu
Invaetem Man blong Serem Wanem Oli Gat
Tingting blong serem ol toktok ia we oli kam long Elda Quentin L. Cook: “Hop blong mi, i we, wanwan long yumi bae i luklukbak long wanwan long yumi mo i luklukbak long yumi olsem wan famli, long saed blong ol wok we yumi responsibol from mo mas ansa from” (“Stewardship—a Sacred Trust,” Ensign o Liahona, Nov. 2009, 94). Afta, yu save askem ol memba blong klas wanem nao oli bin lanem aot long ol seksen 51–57 long saed blong wok we oli gat blong lukaot long hem.
Stap Tijim Doktrin
Doktrin mo Ol Kavenan 1:9, 15–20
Lod i wantem yumi blong stap ol wokman we yumi fetful, stap stret mo waes.
-
?Olsem wanem nao bae yu helpem ol memba blong klas blong tingting long ol toktok blong Lod we oli stap long seksen 51 mo olsem wanem bae oli praktisim ol toktok ia? Antap long bod, yu save raetem ?Wanem nao Lod i givim long mi blong lukaot long hem? mo invaetem ol memba blong klas blong raetem ol ansa blong olgeta (luk long “Sam Moa Risos” blong kasem sam moa aedia). Afta, oli save luklukgud insaed long ol ves 9, 15–20 blong faenem ol prinsipol we bae i tijim olgeta olsem wanem blong kam ol man o ol woman we oli save lukaotgud ol samting we oli stap long lis blong olgeta. O yu jes save lukluk nomo long ol toktok ia, “fetful,” “stret,” mo “waes” insaed long ves 19, mo toktok raon long hao nao, wanwan long ol toktok ia i save lidim yumi blong mekem wok we Lod i givim long yumi blong lukaot long olgeta. Maet bae i help blong lukluk long toktok ia “Ful Sapot” insaed long Gaed blong Ol Skripja (olskripja.churchofjesuschrist.org).
Ol memba we oli bin stap laef folem loa blong konsekresen, oli bin donetem evri samting we oli gat i go long Jos.
Doktrin mo Ol Kavenan 52:10; 53:3; 55:1–3
Presen ia we i Tabu Spirit, yumi kasem tru long fasin blong man i putum han antap long hed blong yumi.
-
Plante ves insaed long ol revelesen ia oli tokbaot fasin blong kasem Tabu Spirit tru long fasin blong putum han antap long hed blong man. Sapos yufala i toktok raon long hemia, bae i helpem klas blong yu, yu save askem ol memba blong klas blong yu wanem oli lanem aot long Doktrin mo Ol Kavenan 52:10; 53:3; 55:1–3 long saed blong presen we i Tabu Spirit. Blong save moa long saed blong topik ia, luk long Ol Wok 8:14–17; 19:1–6. Maet ol memba blong klas oli save tokbaot eksperiens blong olgeta, we oli bin kasem presen we i Tabu Spirit, o wanem nao oli save mekem blong gohed blong kasem paoa blong Hem insaed long laef blong olgeta.
Doktrin mo Ol Kavenan 52:9–11, 22–27
Yumi save serem gospel long weaples yumi stap long hem.
-
Taem we Lod i sendem samfala lida blong Jos i go long Misuri, hem i talem long olgeta blong oli mas mekyus blong taem ia we oli stap travel mo “prij folem rod” (ol ves 25–27). Sapos yufala i ridim Doktrin mo Ol Kavenan 52:9–11, 22–27, i save lidim yufala blong toktok raon abaot hao yumi save serem gospel “folem rod,” o long taem blong nomol wokbaot blong laef blong yumi. Ol memba blong klas oli save tokbaot olsem wanem oli mekem blong serem gospel i kam wan nomol samting long laef blong olgeta.
Doktrin mo Ol Kavenan 52:14–19
God i givim wan paten blong stap longwe long fasin blong man i trikim yu mo blong yu harem nogud from.
-
Blong presentem paten ia we Lod i talemaot long Doktrin mo Ol Kavenan 52:9–11, 22–27, yu save serem ol eksampol blong sam nara paten we bae ol memba blong klas oli savegud long hem, olsem ol paten blong stap bildimap ol samting, o ol paten blong fasin. Maet ol memba blong klas oli gat ol eksampol blong olgetawan we oli wantem serem. ?From wanem ol paten oli impoten? ?Olsem wanem yumi save praktisim paten we i stap long ol ves 14–19 we i save helpem yu blong stap longwe long trik mo harem nogud we i stap long wol tedei?
Mi save tanem mi i go long Lod taem joes blong ol narawan oli mekem mi harem nogud.
-
Plante long yumi oli harem nogud tumas taem wan we yumi bin dipen long hem, i no kipim ol komitmen blong hem. Hemia i bin hapen long Ol Sent long Kolesvil, Niu Yok, we oli bin ting blong stanemap haos long graon blong Leman Kopli long Ohaeo. Blong lan aot long eksperiens ia, ol memba blong klas oli save luklukbak long heding blong seksen 54 (luk tu long Saints, 1:125–28; “A Bishop unto the Church,” Revelations in Context, 78–79). Oli save traem pikjarem long maen se oli gat wan fren we i stap wetem Ol Sent long Kolesvil, mo afta, oli faenem kaonsel we i stap long seksen 54, we oli save serem wetem fren blong olgeta. O, oli save luklukgud insaed long revelesen blong faenem wan samting we i save helpem wan we i stap safa from joes blong wan narawan. (Yu save poenemaot promes we i stap long ves 6 i go long olgeta we oli kipim ol kavenan blong olgeta.)
-
Doktrin mo Ol Kavenan 54:10 i gat insaed samfala sentens we ol memba blong klas blong yu oli save faenem se oli gat mining, olsem: “gat fasin blong wet longtaem long hadtaem,” “lukaotem mi fastaem,” mo “sol blong olgeta i spel.” Ol memba blong klas oli save jusum wan sentens blong tingting hevi mo stadi long hem, mo oli yusum ol futnot mo ol nara risos blong luklukgud insaed long ol nara skripja. Afta long hemia, oli save serem tingting blong olgeta.
Sam Moa Risos
Ol samting we yumi gat blong lukaot long ol.
Presiden Spensa W. Kimbol i bin eksplenem: “Insaed long Jos, wan samting we yumi gat long lukaot, i wan samting we oli givim wetem wan tabu tras long saed blong spirit o long saed blong laef long wol ia, we bambae yu mas ansa from. From se evri samting oli blong Lod, yumi, yumi stap lukaot nomo long ol bodi, ol maen, ol famli mo ol propeti. (Luk long Doktrin mo Ol Kavenan 104:11–15.) Wan fetful wokman blong lukaot long samting, i wan ia we i yusum stret fasin blong rul, blong kea long olgeta pipol blong hem, mo i lukaot long olgeta we oli pua mo olgeta we oli stap long nid” (“Welfare Services: The Gospel in Action,” Ensign, Nov. 1977, 78).
Stap Kam Antap long Fasin blong Yumi blong Stap Tij
Helpem olgeta we oli stap lanem samting blong sapotem wanwan long olgeta bakegen. Mekem se klas i wan ples we olgeta we oli lan oli sapotem mo leftemap tingting blong wanwan. Invaetem olgeta blong serem ol aedia mo ol teknik we bae i givim strong sapot long stadi blong olgetawan mo famli stadi. (Luk long Teaching in the Savior’s Way, 36.)