“Eberi 12–18. Reirei ao Berita aika Tabu 37–40: ‘Ngkana Kam Aki Katiteuanaaki Tiaki Au Bwai Ngkami,’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Eberi 12–18. Reirei ao Berita aika Tabu 37–40,” Nakomai, Iriirai—Ibukin te Reirei n Tabati: 2021
Eberi 12–18
Reirei ao Berita aika Tabu 37–40
“Ngkana Kam Aki Katiteuanaaki Tiaki Au Bwai Ngkami”
Imwain bairean te bwai ae ko na karaoia n te kiraati, tataro mwaaka ni kamatebwaia Reirei ao Berita aika Tabu 37–40. Ko na bae ni karekea te kairi n tamnei n am katauraoi n reirei ngkana iai iroum moa am taneiai ma koroboki aika tabu aikai.
Korei Am Namakin
Kaungaa te Tibwatibwa
Iangoia ni koroia iaon te burakibooti, Ngke I wareka Reirei ao Berita aika Tabu 37–40, I namakinna ae e tuangai te Uea . A kona kaain te kiraati n tibwauaia bwa a na kanga ni kabanea te tiententi. Kaungaia bwa a na tibwauai kiibu man aia wareware bwa mwakoron aia kaeka.
Reirei te Reirei
Reirei ao Berita aika Tabu 37–38
E ikotiira te Atua ni kakabwaiaira.
-
N tabetai e bebete riki n reirei man taian kaotioti inanon Reirei ao Berita aika Tabu ngkana ti iangoira n aia tabo aomata ake ngaia ake a moan n anganaki. Ni buokiia kaain te kiraati ni karaoa aei ma tiekition 37–38, ko kona ni kaoia n iangoia bwa angkoa a maeka i Fayette, New York, n 1831. A kona kaain te kiraati n iangoia bwa ngkoa ngaia Iotebwa Timiti ao ni wareka mwakoro 37 nakoia. Ti na kanga n tia ni kaeka nakon te tua aei? Tao a kona kaain te kiraati n iangoia ae iai raoraoia ae aki tangiria n ikotaki nako Ohio; a kona n karaoa te kakaae n mwakoro 38 ibukin reirei aika a na kona ni kaungaia raoraoia bwa ana kakaonimaki nakon te tua n ikotiia. (Ngkana e riai, ko kona ni kairiia n ae onoti nakon kiibu 1–4, 11–12, 17–22, ao 27–33.) A kona naba kaain te kiraati n iai nanoia n tibwauaia bwa a kanga reirei aika titebo n tia ni buokiia ngkana a kainnanoia ni karinea te tua ae taraa ni matoatoa.
-
Aika Itiaki ni Boong aika Kaitira aikoa manga tuangaki bwa a na ikotaki man te nako n te tabo teuana, ma ti teimatoa ni ikotaki inanon utu, n uoote, ao n titeiki. Ni maroroakinna bwa e kanga te ikotaki aei ni kakabwaiaira n te bong aei, ko kona ni bwenaua te kiraati inanon uoua te kurubu. Tuangakin teuana te kurubu bwa e na karaoa te kakaae n Reirei ao Berita aika Tabu 38:31–33 ao n tarai kakabwaia are e kaineti nakon ikotakin te utu, ao tuangiia kaain te kurubu ake tabeua ni karaoa te kakaae n te kibuntaeka naba anne ao n tarai kakabwaia ake a kaineti nakon te ikotaki inanon uoote ao titeiki. A kona ngkanne n tibwaua aia iango ma kain te kiraati. Ti kanga ni kakabwaiaki man n ikotaki bwa kain te kiraati n te Reirei n Tabati?
Reirei ao Berita aika Tabu 38:24–27
A riai Ana aomata te Atua ni katiteuanaaki.
-
Aika Itiaki aika ikotaki i Ohio a roko man aia kaangaanga aika kakaokoro, ma e tuangiia te Uea bwa a na tokinikai iaon kakaokoroia ao “ni katiteuanaaki” (te kibu 27). Bukin tera ti kabwaka n tabetai n noriia aomata tabeman bwa a katiteuanaaki? Kaungaia kaain te kiraati n iangoia bwa a kanga n tabeakiniia tabeman ngkana a wareka Reirei ao Berita aika Tabu 38:24–27. Tera ae nanonaki bwa ti na karineia tarira ao mwanera n arora? Bukin tera e kaangaanga ni kan riki ni koaua bwa ana aomata te Atua ngkana tiaki katiteuanaaki?
-
Warekan Reirei ao Berita aika Tabu 38:24–27 e kona ni kairiira nakon te marooro iaon te katiteuanaaki n ara reitaki—bwa membwa n te uoote, utu, ao a mwaiti riki. Witeo “A Friend to All” ke “Love in Our Hearts” iaon ChurchofJesusChrist.org e kona n ibuobuoki. Te katooto, a kona kaain te kiraati n tibwauai rongorongo ke namakin man te witeo are e buokiia ni kaotaia riki n taian reirei inanon kiibu 24–27. A kona naba n iangoi ao n tibwauai iango ibukin te titiraki n aron “Tera ae I kona ni karaoia ni buoka ara uoote n namakina riki te katiteuanaaki?”
Reirei ao Berita aika Tabu 38:39; 39–40
E tangiria te Tama ni kan aganiira te kaubwai ae akea tokina.
-
Karaoan te tiaata e na buokiia kaain te kiraati ni maroroakina Reirei ao Berita aika Tabu 38:39. N te kaoram teuana, a kona kaain te kiraati ni koroi inanona “kaubwain te aonaaba,” ke bwaai ake a iangoaki bwa a kakawaki ikai ma aki reitinako nakon te maiu are imwiina. N te kaoram are teuana, a kona ni koroi inanona “kaubwai aika akea tokina,” ke bwaai ake a kakawaki iroun te Atua ao a kona n akea tokina. Tera taneiai ake a tia n reireiniira ae kaubwain te maiu akea tokina a kakawaki riki nakon kaubwain te aonaaba?
-
James Covel, n aroia aika mwaiti ibuakora, iai nanoia aika raraoi. Ma kabwakana ni karinei ana kaetieti te Atua bon te kauring ae kakawaki nakoira ni kabane. Ni buokiia kaain te kiraati n reirei man ana taneiai Covel, ko kona ni kaoia tabeman mai ibuakoia bwa a na ukoukora mwakoro 39 ibukin bwaai aika e tuangiia te Uea bwa a na karaoi. A kona ake tabeman ni ukoukori kakabwaia ake e berita ibukiia ngkana e ongotaeka. A kona naba ni ukoukora mwakoro 40 ni kakaea tera bukina ngkai e aki karekei kakabwaia aikai James Covel. E na kanga te taneiai aei ni kaineti nakoira? Tera “raraomaeakinan bwain te aonaaba” aika a totokoira man karekean ana taeka te Atua ae “e onrake n te kakukurei”? (Reirei ao Berita aika Tabu 40:2).
Kanakoraoan Ara Anga reirei
Tai kataia n rinanoi bwaai ni kabane. “E mwaiti te bwai ae e na maroroakinaki n te reirei, ma e aki riai bwa ti karaoi bwaai ni kabane n tain teuana te kiraati bwa ti aonga n riing nanoia tabeman—n taainako teuana ke uoua iango aika kakawaki a bon tau” (Reirei n Ana Kawai te Tia Kamaiu, 7). Te Tamnei ae Raoiroi, iango mairouia kaain te kiraati, ao iango man te kamataata aio e kona ni buokiko n ataa te tabo ae ko na kabanea am tai iaona.