“Eberi 5–Eberi 11. Reirei ao Berita aika Tabu 30–36: ‘Ko Weteaki Bwa Ko Na Tataekina Au Euangkerio,’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Eberi 5–Eberi 11. Reirei ao Berita aika Tabu 30–36,” Nakomai, Iriirai—Ibukin te Reirei n Tabati: 2021
Eberi 5–Eberi 11
Reirei ao Berita aika Tabu 30–36
“Ko Weteaki Bwa Ko Na Tataekina Au Euangkerio”
Ngkana ko wareka Reirei ao Berita aika Tabu 30–36, tera rongorongo aika ko namakin bwa a kaineti nakoia naake ko reireiniia? Tera ae na ibuobuoki ni kaungaia n tibwaua te euangkerio ma tabeman?
Korei Am Namakin
Kaungaa te Tibwatibwa
A kona kaain te kiraati n tibwaua te bwai ae a warekia inanon Reirei ao Berita aika Tabu 30–36 are e kaungaia bwa a na tibwaua te euangkerio.
Reirei te Reirei
Reirei ao Berita aika Tabu 30–36
Ti weteaki bwa ti na tataekina ana euangkerio Iesu Kristo.
-
Te kamataata n te wiiki aei inanon Nakomai, Iriirai—Ibukiia Aomata n Tatabemaniia ao Utu karaoa te ukeuke n Reirei ao Berita aika Tabu 30–36 ibukin te bwai ae titiraki te Uea ibukiia Ana mitinare ao tera ae E berita ibukiia. A kona kaain te kiraati n tibwaua te bwai ae a kunea. (Taraa, te katooto, Reirei ao Berita aika Tabu 30:8; 31:3–5; 32:1, 5; 35:24.) Tao ko kona ni kaoia bwa a na korea te reta nakon temanna ae e mitinare ngkai ke ae e katauraoi nakon ana mition ao karin tabeua ana kaetieti ao ana berita te Uea.
-
Ko reireiniia kairake ake a katauraoi n nako ni mitinare? Ngkana ngaia, ko kona ni kaoia kaain te kiraati n tatabemaniia nako bwa a na ukoukora te mwakoro teuana man Reirei ao Berita aika Tabu 30–36 ao kakaea te bwai ae na kaungaia bwa a na nako ni beku. Ko kona n tuangiia bwa mitinare ake a taekinaki inanon mwakoro aikai a boou ao aki tau aia atatai n te Ekaretia. Tera ae a tau iai bwa a na tibwaua te euangkerio? Ko na bae n tangiria ni kaota te witeo aika koreaki inanon “Bwaai n Ibuobuoki Riki Tabeua.” Tera ae a kataui witeo aikai bwa ti na beku bwa mitinare ao ti na kanga ni kona ni katauraoi?
-
Tiaki aomata ni kabane aika a reke aia tai ni beku bwa te mitinare ae bwanin ana tai, ma ti kona ni kaoia aomata ni kabane nakon Kristo ao ni kakauongo nakon te rongorongo iaon Kaokan bwaai. A kona kaain te kiraati ni koroi kawai aika kaokoro ae a kona ni “kauka [wiia]” (Reirei ao Berita aika Tabu 33:8–10). Tera tabeua taai aika ti tataneiai ma ngaai aika ti na tibwauai iai ara onimaki ma tabeman? Tera te reirei inanon Reirei ao Berita aika Tabu 30–36 aika kaineti nakon tibwauaan te euangkerio ni kawai aikai? Iangoia n titirakiniia tabeman kaain te kiraati ake a tia ni karekei atatai aika raraoi n tibwauai aia iango ao ni kaekai titiraki mairouia kaain te kiraati.
-
E berita te Uea nakon Ezra Thayer ao Northrop Sweet bwa ngkana a kauki wiia n tibwaua te euangkerio, a na “riki n ai aron Nibwaai are ngkoa” (Reirei ao Berita aika Tabu 33:8). Tera katei aika iai iroun Nibwaai ae kona n irekereke ma tibwauaan te euangkerio? (taraa, te katooto, 1 Nibwaai 3:7; 4:6; 10:17; 17:15; 2 Nibwaai 1:27–28). A kanga katei aikai ni buokiira n ara mwakuri n tibwaua te euangkerio?
Tamneie anga reirei te mitinareE tuangiira te Uea bwa ti na tataekina te euangkerio n ara bong n aron te Ekaretia n taai akekei.
Reirei ao Berita aika Tabu 32–33; 35
E katauraoira te Uea ibukin te mwakuri ae E tangiria bwa ti na karaoia.
-
E kanga te Uea n tia ni buokiira ni karaoa Ana mwakuri? Te marooro iaon maiuia aomata aika kabwarabwaraaki inanon Reirei ao Berita aika Tabu 32–33, 35 e kona n riki bwa te tabo ae raoiroi ni waaki mai iai ibukin iangoan atatai aikai. Te katooto, ko kona n tibwauaia ma te kiraati rongorongon miin Ezra Thayer inanon “Bwaai n Ibuobuoki Riki Tabeua” ao ngkanne kaoia kaain te kiraati bwa a na wareka Reirei ao Berita aika Tabu 33:1–13, are bon iteran te kaotioti nakon Ezra Thayer. E kanga te Uea ni katauraoa Ezra ibukin te mwakuri are e tangiria te Uea bwa e na karaoia? (taraa Reirei ao Berita aika Tabu 33:2). Ko kona naba n tuanga kaain te kiraati bwa e na tibwauai tabeua rongorongon te reitaki imarenan Parley P. Pratt ao Sidney Rigdon (taraa “Bwanaan Kaokan Bwaai: Aia Koaua Ake a Moantaai n Rairaki” inanon Nakomai, Iriirai—Ibukiia Aomata n Tatabemaniia ao Utu). E kanga te reitaki aei ni kakabwaia te Ekaretia? Tera te bwai ni kakoaua ae ti nooria bwa e mena bain te Uea inanon maiuia mwaane aikai? A kona kaain te kiraati n tibwauai aia atatai ake a buokiia n noora te Uea n ataa te kawai naba anne.
Bwaai n Ibuobuoki Riki Tabeua
Miin Ezra Thayer.
Ezra Thayer e koroia bwa tabeua te tai imwain ae bwabetitoaki, e karekea te mii ni burabeti are e “roko iai te mwaane ao ni uotia nakoiu te ninira ni beeba ao ni kaotia nakoiu, ao te bwai ni katangitang naba ao e tuangai bwa N na [katangnga]. I tuangnga bwa akea ae I tuai man [kakatangitang] inanon maiu. E taku ko kona ni [katangnga], kataia. … E karaoa tangina ae moan te kabanea n tamaroa ae I tuai man ongongo mai imwaiina” (“Revelation, Okitobwa 1830–B, Revelation Book 1,” historical introduction, josephsmithpapers.org). Ngke e karekea te kaotioti imwiina Iotebwa Timiti ibukin Ezra Thayer ao Northrop Sweet, ae e koreaki ngkai bwa Reirei ao Berita aika Tabu 33, e kabwarabwara Ezra te kaotioti are tuangaki n te mii n aron te ninira ni beeba.
Kanakoraoan Ara Anga reirei
Kaungaa te tabo ae karineaki. “Buokiia kaain te kiraati n oota bwa ngaiia n tatabemaniia nako a roota tamneia kaain te kiraati. Kaungaiia bwa a na buokiko ni katea te tabo, ae ukinako, ae tangiraki, ao ni karineaki bwa aonga aomata nako n namakina te mano n tibwauai aia taneiai, n aia titiraki, ao aia kakoaua” (Reirei n ana Kawai te Tia Kamaiu, 15).