“Maati 29–Eberi 4. Itita: ‘Ngai Are E Maiu, Ngai Are E Tiringaki,’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Maati 29–Eberi 4. Itita,” Nakomai, Iriirai—Ibukin te Reirei n Tabati: 2021
Maati 29–Eberi 4
Itita
“Ngai Are E Maiu, Ngai Are E Tiringaki”
Akea te bwai ae kakawaki riki ibukira bwa ti na ataia nakon Ana Mwakuri ni Kamaiu Iesu Kristo. Iangoi taekaia aomata ake a na ira am kiraati, tera ae e na kona ni buokiia ni kakorakorai aia onimaki iroun Iesu Kristo?
Korei Am Namakin
Kaungaa te Tibwatibwa
Ngkai a tia kaain am kiraati ni kamatebwaia Reirei ao Berita aika Tabu n te ririki aei, a na kunea rongorongon te Tia Kamaiu aika uaana nakoia. Moana te kiraati man anganakiia aia tai n tibwauai kiibu aikai. E kanga ara reirei iaon Reirei ao Berita aika Tabu n tia ni kakorakorai ara onimaki iroun Iesu Kristo?
Reirei te Reirei
Iesu Kristo e kakoroa nanon te “mwakuri ni kamaiu ae kororaoi.”
-
Bukina bwa te Mwakuiri ni Kamaiu bon te reirei ae kakawaki, iangoia ni kabanea te tai ae tau ni kakoaua bwa a na ota iai kaain te kiraati. Ni karaoan aei, ko kona ni koroi iaon te burakibooti titiraki n aron aikai: Tera Ana Mwakuri ni Kamaiu Iesu Kristo? E kanga n roota aron maiu ni katoabong? E kanga n roota maiu ae akea tokina? N na kanga ni karekea mwaakan te Tia Kamaiu ni kabomwi? Anganiia kaain te kiraati tabeua te miniti n iangoi titiraki aikai ao ni kakaei inanon booki aika tabu kiibu aika ana buokia ni kaekai. A kona kaain te kiraati ni koroi aia kibu ni booki aika tabu iaon te burakibooti, ao ko kona ni maroroakin tabeua mai ibuakoia n te kiraati. Aikai tabeua katooto: Ruka 22:39–44; 1 Ioane 1:7; 2 Nibwaai 2:6–9; Motiaea 3:5–13, 17–18; Aramwa 7:11–14; Moronaai 10:32–33; Reirei ao Berita aika Tabu 19:16–19; 45:3–5.
-
E na kona ni uaana ibukiia kaain te kiraati ni matakuakina te witeo “The Savior Suffers in Gethsemane” (ChurchofJesusChrist.org) imwain warekan oin ana taeka te Tia Kamaiu n taekan Karawawataakina Reirei ao Berita aika Tabu 19:16–19. A kanga kiibu aikai ni kakorakora ara kakaitau nakon ana mwakuri ni kamaiu Iesu Kristo? Te witeo n te Itita ae ko kona n tibwauaia a koreaki inanon “Bwaai n Ibuobuoki Riki Tabeua.”
TamneiE Tataro IesuUean te Tataro, iroun Yongsung Kim
Reirei ao Berita aika Tabu 76:11–14, 20–24; 110:1–10
Te Burabeti Iotebwa Timiti e kakoaua bwa e maiu Iesu Kristo.
-
Iotebwa Timiti e noora te Tia Kamaiu ae uti ao e kaota ana koaua ae mwaaka bwa e maiu Iesu Kristo. Ni buokiia kaain te kiraati ni kamatebwaia ana koaua Iotebwa Timiti, ko kona ni bwenauaia nakon uoua te kurubu ao n anganiia kurubu aikai bwa a na wareka Reirei ao Berita aika Tabu 76:11–14, 20–24 ke 110:1–10. Kaoia kaain te kiraati n tatabemaniia bwa a na kakaea teuana te taeka inanon kiibu aikai are e kabwarabwara te Tia Kamaiu. A kona kaain te kiraati temanna imwiin temanna ni koroi taeka aika a kunei iaon te burakibooti, ao kona kabongnai aia taeka ni wakina te marooro iaon taekan anuan maiun ao mwaakan te Tia Kamaiu. E kanga ana koaua Iotebwa Timiti ni kakorakorai ara onimaki iroun te Atua ao ana mition Iesu Kristo?
-
Tabeman kaain te kiraati a tia n reiti aia reirei nakon Reirei ao Berita aika Tabu ma taeka ao reirei n te boki n anene “I Ataia E Maiu Iesu” (Anene, nambwa. 136; taraa Te kamataata n te wiiki aei n Nakomai, Iriirai—Ibukiia n Tatabemaniia ao Utu). Tao a na bae n tangiria n tibwaua te bwai ae a tia ni kunei. Ko kona naba ni wareka ke n anenea te anene aei n te kiraati ao n tarai reitaki ma koroboki aika tabu aikai: Reirei ao Berita aika Tabu 6:34; 45:3–5; 84:77; 98:18; 138:23. Ti na kanga n tia n ataia bwa e maiu te Tia Kabooi Maiura?
Reirei ao Berita aika Tabu 29:26–27; 42:45–46; 63:49; 88:14–17, 27–31; 93:33–34
Ibukin Iesu Kristo, ti na bane ni mangauti.
-
Ni buokiia kaain te kiraati ni maroroakinna bwa tera ae reiakinaki n Reirei ao Berita aika Tabu ibukin te mangauti, ko kona ni kaoia bwa a na iangoia ae raoraom ke kaain am utu a titirakiniko bwa tera nanon te mangauti. Ti na kanga ni kona ni buoka te aomata anne bwa e na oota n nanon te mangauti? Kaungaia kaain te kiraati bwa a na ukoukora Reirei ao Berita aika Tabu 88:14–17, 27–31 ibukin te bwai ae e na kona n ibuobuoki. Koroboki aika tabu tabeua aika a ibuobuoki bon Aramwa 11:40–45 ao Aramwa 40:21–23. Tera ae ti na kona n tibwauaia ma raoraora ke kaain ara utu n namakina te kimwareirei are e reke man te reirei iaon te mangauti?
-
Ko na kanga ni buokiia kaain te kiraati ni kantaninga ana bwaintangira te Tia Kamaiu n te mangauti? Tao ko kona ni koroia iaon te burakibooti Ibukin Iesu Kristo … ao kaoia kaain te kiraati bwa a na tarai inanon kibu aikai ibukin taeka ake a na kona ni katabwanina te kibu n taeka aei: Reirei ao Berita aika Tabu 29:26–27; 42:45–46; 63:49; 93:33–34. A kanga koaua inanon kiibu aikai n iai mwiia n te kawai ae ti taraa iai te mate? A kanga n rooti maiura ni katoabong?
Bwaai n Ibuobuoki Riki Tabeua
Kanakoraoan Ara Anga reirei
Buokiia kaain te kiraati bwa a na ukoukorii koroboki aika tabu. “Tabeki titiraki are a kainnanoia taan reiakinaki bwa a na kakaei kaekaaia inanon koroboki aika tabu. … Buokiia n ataia bwa e ngae ngke a koreaki booki aika tabu n ririki aika mwaiti n nako, iai inanoia are e na kaeka te Uea nakon titiraki ao kaangaanga aika ti bane ni kaitarai” (Reirei n Ana Kawai te Tia Kamaiu, 30).