“Maati 22–28. Reirei ao Berita aika Tabu 29: ‘Iesu Kristo E Na Ikoikotiia Ana Aomata,’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Maati 22–28. Reirei ao Berita aika Tabu 29,” Nakomai, Iriirai—Ibukin te Reirei n Tabati
A Na Bane Ni Katorobubua Bubuan Wae, iroun J. Kirk Richards
Maati 22–28
Reirei ao Berita aika Tabu 29
Iesu Kristo E Na Ikoikotiia Ana Aomata
Te kawai ae moan te kakawaki ni katauraoi n anga reirei Reirei ao Berita aika Tabu 29 bon man te kamatebwai ma te tataro mwaaka ao n ukoukora ana kairi te Tamnei. Iangoi kawai riki tabeua ni kaoa te Tamnei nako nanon maium, n aron te aki mamatam, te nako n te tembora, ke ni buokiia tabeman.
Korei Am Namakin
Kaungaa te Tibwatibwa
N Reirei ao Berita aika Tabu 29:5, ao e tuangiia Aika Itiaki te Uea, “Tabekaarake nanom ao bwaina te kukurei,” Ko kona ni kaoia kaain te kiraati bwa a na tibwaua te bwai teuana ae a reiakinna n aia kamatebwai i bon irouia ke ma aia utu are e karikiia bwa a na “tabekarake [nanoia] ao ni bwaina te kukurei.”
Reirei te Reirei
Tamara are i Karawa e katauraoa te babaire ibukin kamaiuara.
-
Teuana te kawai ni kaungaa te reirei n te mweenga bon man karaoan waaki ni kakukurei aika a kuneaki inanon te kamataata n te wiiki ae aki maan n nako inanon Nakomai, Iriirai—Ibukiia Aomata n Tatabemaniia ao Utu. Te katooto, ko kona ni karinani iaon te burakibooti mwakoron te babaire ni kamaiu, n aron te te maiu imwain te maiu aei, Karikibwai, Ana Mwakuri ni Kamaiu Iesu Kristo, ao a mwaiti riki. A kona kaain te kiraati n tibwa te bwai ae a reiakinna man Reirei ao Berita aika Tabu 29 iaon taekan mwakoron te babaire aei. Ko kona n anganiia naba bwa a na tibwaua te bwai ae a na anga reirei iaona man te mwakoro aei nakon temanna ae aki ataa ana babaire te Atua.
Reirei ao Berita aika Tabu 29:1–8, 14–21
Iesu Kristo E Na Ikoikotiia Ana Aomata imwain Kauaokina.
-
Ni buokiia kaain te kiraati n ataia bwa bukin tera Iesu Kristo e ikoikotiia Ana aomata, ko kona ni kaoia bwa a na wareki kiibu 1–8 ao maroroakin titiraki iaon taekan te ikoikotaki, n aron: Ti kanga n tia n taneiai n aron ikoikotakira iroun Kristo ao kawakinara, n aron te moa aine ae ikoikotiia ao ni kawakinia natina? Ti kanga n ikoikotiira nakon te Tia Kamaiu? (taraa, te katooto, te kibu 2). A kona kaain te kiraati n tibwauaia bwa a kanga n tia ni kakabwaiaki man ikoikotakiia ao n taromauri ma kaain te Ekaretia.
Tamneite moa aine ma natinaIraua te Tai, iroun Liz Lemon Swindle
-
Ni buokiia kaain te kiraati n iangoa taekan tabeia ni buoka Tamara are i Karawa ni ikoikotiia natina, ko kona n tibwauai ana taeka Beretitenti Russell M. Nelson inanon “Bwaai n Ibuobuoki Riki Tabeua.” Ke ko kona ni kaota te witeo “Ana Tia Kakoaua te Atua” (ChurchofJesusChrist.org). Tera ae ti reiakinna n rongorongon te ikoikotaki man taian rongorongo aikai? A kanga rongorongo aikai ni kamatoa te bwai ae taekinna te Uea inanon Reirei ao Berita aika Tabu 29:1–8?
-
Tabeua bwaai aika riki ni boong aika kaitira aika kabwarabwaraaki inanon Reirei ao Berita aika Tabu 29:14–21 e kona ni karawawata nakoia kaain te kiraati. N na tibwaua te bwai ae a namakinna. Bukin tera te Uea e kauringiira ibukin bwaai aika riki aikai? Tera koaua aika kakukurei aika ti reiakin ibukin te Tia Kamaiu ao te ikoikotaki man kiibu 1–8? E kanga te ikoikotaki ni buokiira n ingainga nakon bwaai aika riki aikai ma te onimaki irarikin te maaku? Ngkai mwakoron am marooro, ko kona n anenea te anene ibukin te ikoikotaki, n aron “Israel, Israel, God Is Calling” (Anene , nambwa. 7), ao maroroakina te bwai ae kabwarabwaraaki n te anene ibukin ikoikotakiia Iteraera.
Reirei ao Berita aika Tabu 29:34–35
Ana tua ni kabane te Uea bon iai te tamnei iai.
-
E ngae ngke tabeua tuua a taraa n ae bwain te maiu aei, tuua ni kabane bon iai tamnein te Uea iai. N te aro bwa ko na oota n te koaua aei, a kona kaain te kiraati ni bane ni wareki kiibu 34–35 ao ni koroi tabeua tuua iaon te burakibooti, n raonaki ma reirei n te tamnei ao kakabwaia aika irekereke nakoia n tatabeua. A kona n tibwauai katooto man maiuia ke man booki aika tabu ake a tia ni buokiia n noori ana tua te Atua n tamnei. E kanga te waaki ni kakukurei aei n roota te kawai ae ti tarai iai tuua?
Bwaai n Ibuobuoki Riki Tabeua
Ibuobuoki n Ikotakin Iteraera.
E reirei Beretitenti Russell M. Nelson:
“Ni koauana aikai bon boong aika kaitira, ao te Uea e kawaekoa Ana mwakuri n ikotakia Iteraera. Te ikoikotaki aei bon te bwai ae moan te kakawaki ae e a karaoaki ngkai iaon te aba. Akea riki kabotauana n abwabwakina, akea riki kabotauana ni kakawakina, akea riki kabotauana ni mimitongina. Ao ngkana ko kan rineia, ngkana ko tangiria, ko kona ngkoe n riki bwa mwakorona. Ko kona n riki bwa buburan mwakoron te bwai ae bubura, te bwai ae tamaroa, te bwai ae mimitong!
“Ngkana ti taetae iaon te ikoikotaki, ti taekina kakawakin te koaua aei: ni kabaneia natin Tamara are i Karawa, n iteran te roki aika uoua, e tau n ongoraeaki rongorongon ana euangkerio Iesu Kristo ae kaokaki. A baireia i bon ibukiia ngkana a kan ataa ae bati riki. …
“E a tia Tamara are i Karawa ni kawakin ninikorian Arona aika mwaiti—tao, n na kangai, Ana kabanea n tamaroa n tiim—ibukin te kabanea n tai. Ninikorian arona aikanne—taan takakaro aika kabanea n nakoraoi aikanne, booto aikanne—bon ngkami!” (“Hope of Israel” [te bootaki n taromauri ni kabutaa te aonaaba ibukiia kairake, Tuun 3, 2018], ChurchofJesusChrist.org).
Kanakoraoan Ara Anga reirei
Anga reirei n ae mataata ao ni bebete. Irarikin kataakin kamatakuaia kaain am kiraati, reirei taian reirei n ae mataata ao ni bebete. Ko kona n onimakinna ae “tamaroan ana taeka te Atua” e na iai “mwiina ae korakora riki n aia iango aomata nakon … bwaai riki tabeua” (Aramwa 31:5).