“Maati 1–7. Reirei ao Berita aika Tabu 20–22: ‘Moan Katean Ana Ekaretia Iesu Kristo,’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Maati 1–7. Reirei ao Berita aika Tabu 20–22,” Nakomai, Iriirai—Ibukin te Reirei n Tabati: 2021
Mweengan Peter Whitmer, iroun Al Rounds
Maati 1–7
Reirei ao Berita aika Tabu 20–22
“Moan Katean Ana Ekaretia Iesu Kristo”
Korei mwiin am namakin n tamnei ngkana ko kamatebwaia Reirei ao Berita aika Tabu 20–22. Tabeua namakin aikai a kona ni kairiira nakon iango are e na buokiko ngkana ko anga reirei.
Korei Am Namakin
Kaungaa te Tibwatibwa
N aia kametabwai n te mweenga, a na bae n tia kaain te kiraati ni karekei atatai aika raba n taian kakabwaia ni karekean te Ekaretia ae koaua iaon te aba. Kaoia bwa a na tibwaua te kibu man mwakoro aikai are a kabwarabwara bwa bukin tera a kakaitau ibukin kaokakin te Ekaretia.
Reirei te Reirei
Reirei ao Berita aika Tabu 20–21
Ana Ekaretia Iesu Kristo e a tia ni kaokaki.
-
A kona kaain te kiraati n reke rakaia man kamatebwaian bwaai aika titebo imarenan Ana Ekaretia Iesu Kristo ao te Ekaretia are E kateia Kristo n taai akekei. Ko kona ni koreia iaon te burakibooti te tiata ma aua ana kaoram ae koreaki inanona Reirei, Otenanti, Kariaia n te Nakoanibonga, ao Burabeti. Ko kona ni katauraoi rongorongon Ana Ekaretia Kristo n taai akekei: Mataio 16:15–19; Ioane 7:16–17; Ebeto 19–22; 3 Nibwaai 11:23–26; Moronaai 4–5. A kona kaain te kiraati n atai kibuntaeka aika a reirei taekan Ana Ekaretia Kristo ao ni koroi taekaia inanon te kaoram ae kaineti ma ngaia iaon te burakibooti. (Tabeua taekaia a kona ni kaineti nakon ae raka riki iaon teuana te kaoram.) A kona ni karaoa aekan aei ibukin kiibu aikai n taekan Ana Ekaretia Kristo ae kaokaki: Reirei ao Berita aika Tabu 20:17–25, 60, 72–79; 21:1–2. Tera ae ko reiakinna n taekan Kaokan Ana Ekaretia Kristo man te kabotau aei?
Reirei ao Berita aika Tabu 20:37, 75–79; 22
Otenanti aika tabu a buokira n riki n aekan te Tia Kamaiu.
-
Anganiia kaain te kiraati aia tai ni kamatebwai bwaai aika kainnanoaki ibukin te bwabetito ae kabwarabwaraaki n Reirei ao Berita aika Tabu 20:37, ao n tuangiia bwa a na iangoi raoi titiraki n aron aikai: A kanga reirei aikai ni buokiira ni katauraoi bwa ti aonga ni bwabetitoaki nakon ana Ekaretia te Uea? Tera ae nanonaki bwa ti na katoka aran Kristo iaora? (taara Motiaea 5:5–12). Tera ae buokiko ni kateimatoa “nanom ni beku ibukin [Iesu Kristo] nakon te toki”?
-
Tera te reirei ni mwakoro 22 n reireia taekan te bwabetito? Tuangiia kaain te kiraati bwa ai angkoa iai raoraoia ae e a tia ni bwabetitoaki nakon te ekaretia teuana. A kona ni wareka te mwakoro aei ao ni kakaei reirei aika a na buokiia raoraoia n ataia bwa bukin tera te bwabetito nakon Ana Ekaretia te Tia Kamaiu ae kaokaki bon te bwai ae riai. A kona kaain te kiraati ni karaoa te takakaro aei n te kaotioti n te kiraati ke ni kakauoman.
-
Wareka Reirei ao Berita aika Tabu 20:75–79 ni bootaki, ao kaoia kaain te kiraati bwa a na iangoi bwaai aika a reireinaki man kiibu aikai iaon taekan te Tia Kamaiu ao Mwaakana inanon maiura. Tera taekan kibuntaeka aika a rianako ngkana ti wareki tataro n toa n te kawai aei? Bukin tera e kakawaki kanakin te toa ni katoa wiiki?
Tamneiriikan a tibwaa te ToaTe toa bon te otenanti ae tabu.
Reirei ao Berita aika Tabu 76:22–24
Te mwakuri n ibuobuoki n te nakoanibonga e kakabwaiaia kaain te Ekaretia ma aia utu.
-
Kabwarabwaraan taben te nakoanibonga inanon Reirei ao Berita aika Tabu 20:38–60 e kona ni buokiia kaain am kiraati ni karababa otaia n te mwakuri n ibuobuoki n te nakoanibonga. Tao kam kona ni kaoia n iangoa bwa raoraoia ae e a tibwa bwabetitoaki ke kaain te utu bon iaon kawaina ni katabuaki nakon aobiti n te nakoanibonga. A na kanga ni kabonganai kiibu aikai bwa e aonga ni buokia n ataa tabena? Tera katooto aika a na kona n tibwauai ni buokiia n ataia bwa e na kanga kakoroan nanon mwakuri aikanne ni kona ni buokiia n riki n aekakin Iesu Kristo? Tao a kona ni karaoia n te kaotioti te marooro aei.
Irarikin anne, a na kanga ni kabonganai kiibu aikai ni buoka te titita ae e a tibwa bwabetoaki n nooria bwa e na kanga ni kona n ibuobuoki n te mwakuri ae kabwarabwaraaki ikai? (Te rongorongo inanon “Bwaai n Ibuobuoki Riki Tabeua” e kona n ibuobuoki.)
Reirei ao Berita aika Tabu 21:4–7
Ti kakabwaiakaki ngkana ti karekei ana taeka te Uea rinanon Ana burabeti.
-
Reirei ao Berita aika Tabu 21 iai inanona rongorongo aika a korakora iaon taekaia ana burabeti te Uea. Ni buokiia kaain te kiraati n iangoi ao ni maroroakin rongorongo aikai, tuangiia bwa a na ukeukeri kiibu 4–7 ibukin te kibuntaeka ae a tangiria n ataia raoi ao ni korea te kibuntaeka iaon te burakibooti. Rinei tabeua kibuntaeka, ao ni maroroakinna n te kiraati aron ae a nanonna. Tera ae a reireiniira kibuntaeka aikai ibukin irakin ana burabeti te Uea?
Bwaai n Ibuobuoki Riki Tabeua
Ti bane ni mwakuri ma mwaakan te nakoanibonga.
“A katabuaki mwaane nakon aobiti n te nakoanibonga, ngkai aine ao mwaane a kaoaki bwa a na taneiai ma mwaakan ao kakabwaia n te nakoanibonga ni maiuia. …
“… [Aine] a kabwarabwara ao a tataro n taai n taromauri, a karaoi nakoa ni kairiiri aika mwaiti ao te ibuobuoki, a irii kauntira n te nakoanibonga n te karinan n te tabo ao ni kabuta, ao ni karaoi mwakuri n tataekina te euangkerio ni kabutaa te aonaaba. Ni kawai aikai ao tabeua riki, aine a kamwakura te kariaiakaki n te nakoanibonga e ngae ngke a aki katabuaki nakon te aobiti n te nakoanibonga. …
“… N taian wewete n te Ekaretia, otenanti n te tembora, te reitaki n te utu, ao te aki karongoa, ibuobuoki irouia n tatabemaniia, aine ao mwaane Aika Itiaki a mwakuri ma te mwaaka ao te kariaiakaki n te nakoanibonga. Inaomataia mwaane ao aine aikai ni kakoroan nanon Ana mwakuri te Atua rinanon Mwaakana bon mwakoron Ana euangkerio Iesu Kristo ae kakawaki” (Atuun Reirei n te Euangkerio, “Ana Reirei Iotebwa Timiti ibukin te Nakoanibonga, te Tembora, Aine,” topics.ChurchofJesusChrist.org).
Kanakoraoan Ara Anga reirei
Ti uaia n reirei. Ngkai ngkoe te tia reirei, ko reiakinna ma kaain am kiraati ni kabane. Kaota nanom ni kan reirei mairouia man am kakauongo nakon aia atatai aika nano.