“Maati 8–14. Reirei ao Berita aika Tabu 23–26: ‘Kakorakora te Ekaretia,’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Maati 8–14. Reirei ao Berita aika Tabu 23–26,” Nakomai, Iriirai—Ibukin te Reirei n Tabati: 2021
Maati 8–14
Reirei ao Berita aika Tabu 23–26
“Kakorakora te Ekaretia”
Imwain ae ko wareka te kamataata aei, wareka Reirei ao Berita aika Tabu 23–26 ao iangoi reirei aika ko namakin bwa a na kakorakoraia kaain am kiraati. Ngkanne iangoi bwaai n ibuobuoki aika a na buokiko n reirei, n raonaki ma ake a taekinaki n te kamataata.
Korei Am Namakin
Kaungaa te Tibwatibwa
Tera kakabwaia aika ti a tia n rinanoi ngkana ti “kabanea [ara] tai nakon kamatebwaiakan koroboki aika tabu”? (Reirei ao Berita aika Tabu 26:1). Ti kanga n tia n namakina te Tamnei inanon mweengara? Tao a kona kaain te kiraati n tibwauaia bwa a kanga n tia n tokanikai iaon kaangaanga ao katabetabe ni kabanea te tai nakon kamatebwaian booki aika tabu i bon iroum ao n am utu.
Reirei te Reirei
Reirei ao Berita aika Tabu 23–26
Ti bane ni kona ni kakorakora te Ekaretia.
-
Ko na bae n tangiria ni ukoukoria ma kaain te kiraati nanon ae ko na “kaunga te ekaretia” (Reirei ao Berita aika Tabu 25:7). Tao e kona temanna n tibwaua te kabwarabwara n te rikitinare te taeka ae kaunga ke katooto n te kaunganano ae a tia n nooria. Tera aanga ae ti na kona ni kaungaira n tatabemaniira? E kanga aei ni kakorakora te Ekaretia? Tera riki ae ti reiakinna inanon Reirei ao Berita aika Tabu 23–26 aika a kona ni buokiira ni kakorakora te Ekaretia? Ko kona naba ni maroroakinna bwa a na kanga ni kabonganaaki reirei aikai ni kakorakorai mweengara. Ni kabonganai reirei aikai nakon ara mwakuri n ibuobuoki, ko kona n rinanon mwakoron ana rongorongo Titita Bonnie H. Cordon “Becoming a Shepherd” (Ensign ke Riaona, Nob. 2018, 74–76).
E kona te Tia Kamaiu n tabekiira rake “ni kamaiura man [rawawatara].”
-
Te kaotioti inanon Reirei ao Berita aika Tabu 24 e anga bwa e na “kakorakora, kaungaa, ao n reireina” Iotebwa ao Oliver n tain te kataaki (Reirei ao Berita aika Tabu 24, atuun te mwakoro; taraa naba Aika Itiaki, 1:94–96). Ko na bae ni kaoa te kiraati ni ukoukora te mwakoro aei ibukin kakoauana ae te Uea e ataa Iotebwa ao ana kaangaanga. E kanga te Uea n kaekaa kainnanon Iotebwa? E kanga ni karaoa naba anne ibukira ni boong aikai? Iangoia n titirakiniia kaain te kiraati bwa a na tibwaua aia atatai ngkana a namakinna bwa e atai aia kaangaanga te Uea ao ni buokiia n aia kaangaanga.
TamneiIesu Kristo e kamaiuia aomataE Kamaiuia Aoraki Aika a Kakaokoro, iroun J. Kirk Richards
Emma Smith bon te “aine ae rineaki.”
-
Ni buokiia kaain te kiraati ni kakaai bwai aika kakawaki n ana kaotioti te Uea nakon Emma Smith, iangoa te waaki ni kakukurei aei: Tuangiia kaain iteran te kiraati bwa a na ukoukora mwakoro 25 ibukin bwaai aika e tuangaki Emma iroun te Uea bwa e na karaoi, ao tuangiia are te iterana bwa a na ukoukori bwaai aika E berita bwa E na karaoi. Kaoia bwa a na koroi bwaai aika a kunei ao n tibwauaia imarenaia n tatabemaniia. Tabeman kaain te kiraati a kona n tibwauai reirei ake a uaana nakoira.
-
Tera taeka ao kibuntaeka inanon mwakoro 25 aika a boutoka ana taeka te Uea nakon Emma Smith, “Ngkoe te aine ae ko rineaki”? (te kibu 3). A kona naba kaain te kiraati ni maroroakinna bwa e kanga Emma ni maiuakin reirei inanon te kaotioti aei. Bwaai n ibuobuoki aika ibuobuoki e raonaki ma te witeo “Te Aine ae Rineaki” (ChurchofJesusChrist.org), “Ngkoe te aine ae ko rineaki” (Revelations in Context, 33–39), ao “Bwanaa man Kaokan Bwaai” inanon Te kamataata n te wiiki aei inanon Nakomai, Iriirai—Ibukiia Aomata n Tatabemaniia ao Utu.
-
Ni kaineti ma Reirei ao Berita aika Tabu 25:11–12, e kanga te Uea n namakin katangitang aika tabu? Tao a kona kaain te kiraati ni maroroakin kawai ni kabonganai anene ni kaoa te Tamnei nakon mweengaia.
Reirei ao Berita aika Tabu 25:5, 14
Ti riai n ukeuke ni karekea “te nano ae nimamannei.”
-
Te Uea e reireina Emma bwa e “na teimatoa n te nano ae nimamannei” (Reirei ao Berita aika Tabu 25:14; taraa naba te kibu 5). Ni ukoukoria bwa tera ae nanonaki n aei, ko kona ni korea Nimamannei iaon te burakibooti ao kaoia kaain te kiraati bwa a na koreia irarikina tera te taeka ae karikiia bwa a na iangoia. Bwa a na kona n ukoukora mwakoro 25 ibukin taeka ao kibuntaeka ae a namakinna bwa a irekereke ma te taeka ae te nimamannei ao n tibwaua te bwai ae a kunea. Iangoia n tibwaua te rongorongo mairoun Unimwaane David A. Bednar inanon “Bwaai n Ibuobuoki Riki Tabeua.” Bukin tera e kakawaki bwa ko na nimamannei?
Reirei ao Berita aika Tabu 25:10, 13
Ti riai n nimamannei ibukin bwain te aonaaba ae e na nakoraoi riki.
-
Ni buokiia kaain te kiraati ni kabutaa nako ana reirei te Uea ni “katikui bwain te aonaaba aei, ao n ukoukori bwaai aika raoiroi riki” (Reirei ao Berita aika Tabu 25:10), ko kona n tuangiia bwa a na koroi katotoon “bwain te aonaaba aei” ao katotoon “bwain te [aonaaba] ae nakoraoi riki.” Tera te reirei ae ti kona n tibwauaia ma ngaira n tatabemaniira bwa e na buokiira ni kabanea riki ara tai ni bwaai aika akea tokiia? E kanga te reirei n te kibu 13 n irekereke nakon te kouru aei?
Bwaai n Ibuobuoki Riki Tabeua
Te nimamannei bon te korakora.
E kabwarabwara Unimwaane David A. Bednar: “Anuan maiun Kristo n nimamannei n taainako e aki mataata n ara aonaaba ngkai. Te nimamannei bon te korakora, tiaki te mamaara, e mwamwakuri, e aki aoriori, e ninikoria, e aki nakonnano, e rau, e aki riao, e nanorinano, e aki iangoia i bon irouna, e akoi, e aki iowaawa. Te aomata ae nimamannei e aki kai anaaki nanona, n aki kai rootaki, ke ni kan bwabwaoti ao n tauroi ni butimwaai aia mwakuri tabeman” (“Te Nimamannei ao te Nanorinano i Nanona,” Ensign ke Riaona, Meei 2018, 32).
Kanakoraoan Ara Anga reirei
Kaota am koaua bwa iai kakabwaia aika beritanaki. Ngkana ko kaoia kaain te kiraati bwa a na karaoa te bwai ae a reiakinna, kaota am koaua ni kakabwaia aika e a tia te Atua ni berita ibukiia (taraa Reirei n Ana Kawai te Tia Kamaiu, 35).