“Beberuare 22–28. Reirei ao Berita aika Tabu 18-19: ‘E Korakora Kakawakia Aomata,’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Beberuare 22–28. Reirei ao Berita aika Tabu 18–19,” Nakomai, Iriirai—Ibukin te Reirei n Tabati: 2021
Beberuare 22–28
Reirei ao Berita aika Tabu 18–19
“E Korakora Kakawakia Aomata”
Bon ti rinanon te Tamnei ae Raoiroi ae kona iai ni bitaki nanon te aomata. E reirei Beretitenti Henry B. Eyring, “Ngkana ko anga reirei iaon reirei aika tabu, e na roko te Tamnei ae Raoiroi” (“Te Marooro ma Unimwaane Richard G. Scott ao Unimwaane Henry B. Eyring” [Ana tititem n anga reirei n te kanako bwana ana Bootaki n Reirei te Aro, Aok. 11, 2003]).
Korei Am Namakin
Kaungaa te Tibwatibwa
Ni kawaekoaia kaain te kiraati bwa a na tibwaua aia atatai ma koroboki aika tabu aika warekaki ni bootaki Reirei ao Berita aika Tabu 18:34–36. Ngkanne tuangiia kaain te kiraati bwa a na tibwaua te kibu ae a warekia n te wiiki aei are a na kanga ni kinaa iai bwanaan te Uea.
Reirei te Reirei
Reirei ao Berita aika Tabu 18:10–16; 19:15–20, 39–41
E kimwareirei te Uea ngkana ti rairinanora.
-
A mwaiti aomata aika a kairekerekea te rairannano ma namakin aika buakaka. A kanga Ana taeka te Uea n Reirei ao Berita aika Tabu 18 ao 19 ni buokiia kaain te kiraati n noora te rairannano bwa te bwai ae kakukurei? Ko kona ni koroia iaon te burakibooti Te Rairannano bon ao titirakiniia kaain te kiraati bwa a na iangoi kawai ni kabanea te tiententi aei, ae boboto iaon te bwai ae a warekia man mwakoro 18 ao 19. (Iangoia n rinanoa Reirei ao Berita aika Tabu 18:10–16; 19:15–20, 39–41 n te kiraati.)
-
Tera ae nanonaki n “takaruaea te rairannano”? (Reirei ao Berita aika Tabu 18:14). A kona kaain te kiraati n iangoa te titiraki aei ngkana a wareka Reirei ao Berita aika Tabu 18:10–16. Bukin tera n tabetai aomata aki kan rairinanoia? Ti na kanga ni kaungaia naake ti tangiriia bwa a na nakon te Tia Kamaiu ao ni karekea te kabwarabure? Kaungaia kaain te kiraati bwa a na tarataraa te bwai teuana inanon Reirei ao Berita aika Tabu 18:10–16 ke 19:15–20 are e kona n ibuobuoki.
Reirei ao Berita aika Tabu 18:10–16
“E Korakora Kakawakia Aomata imatan te Atua.”
-
Ko na kanga ni buokiia kaain te kiraati n ataa aron kakawakira n tatabemanira nako imatan te Atua? Tao a kona ni wareka Reirei ao Berita aika Tabu 18:10–16 ao n tibwaua aia atatai are a kona iai n ataa kakawakia iroun te Atua. A kanga kiibu aikai n roota te kawai ae ti a tia n taraira iai i bon iroura? aomata tabeman? E kanga te Atua ni kaotia nakoira bwa ti kakawaki Irouna?
TamneiIesu ngke e taua te ataeinimwaane ae uarerekeKakawakia Aomata, iroun Liz Lemon Swindle
Reirei ao Berita aika Tabu 19:15–19
E korakai Iesu Kristo ibukiia aomata ni kabane.
-
Ko na kanga ni buokiia kaain te kiraati bwa a na namakina ana kakoaua te Tamnei ae Raoiroi ngkana a iangoa ana kabwarabwara te Tia Kamaiu ni korakaina n Ana angakarea ni kamaiu? (Reirei ao Berita aika Tabu 19:15–19). Tao kam kona ni kaoa temanna bwa e na anenea te anene ae mamaten nanoia n taekan te Tia Kamaiu. Ko kona naba ni kaota tamnein te Tia Kamaiu ao kaoia kaain te kiraati bwa a na wareki kiibu 15–19; ao ngkanne a na korei aia iango ao aia namakin. (Ana taeka Unimwaane D. Todd Christofferson inanon “Bwaai n Ibuobuoki Riki Tabeua” a kona naba ni kakorakora aia kakaitau kaain te kiraati ibukin karawawatakin te Tia Kamaiu.) Te tiententi n aron aei iaon te burakibooti e kona ni buokiia kaain te kiraati n iangoa: I kakaitau ibukin Ana Mwakuri ni Kamaiu Iesu Kristo ibukina bwa … Tabeman kaain te kiraati a tauraoi n tibwaua te bwai ae a koroia ao ni kaota aia kakoaua iroun Iesu Kristo.
Reirei ao Berita aika Tabu19:16–26, 34–41
Karaoakin ana kaantaninga te Atua e kainnanoa te anganano n taainako.
-
Ngkai a kaitara kaain te kiraati ma kaangaanga ae a na riai ni karaoi anganano ibukin te euangkerio, e kona ni kaunganano ibukiia n reiakina taekan te anga nano ae karaoia Martin Harris bwa e aonga ni boretiaki Ana Boki Moomon. Tao ko kona ni kaoa temanna bwa e na nakon te kiraati ma n tauraoi n taekina ana babaire Martin ni kaboa nako ana tabo ni man ibukin kaboan boretian Ana Boki Moomon (taraa Aika Itiaki, 1:76–78). Tera kiibu man mwakoro 19 ae a bae n tia ni buokia ni karaoa ana babaire? Ko na bae n tangiria ni kaoia kaain te kiraati n tibwauaia bwa e kanga Ana Boki Moomon n tia ni kakabwaiaia ao ni kakaitaua Martin Harris ibukin ana anganano ao ibukiia tabeman ake anganano bwa e aonga ni boretiaki te boki.
-
Tao e kona temanna n te kiraati n tibwaua te anganano ae a tia ni karaoia ibukin te Uea. E na kona aei ni kairiia kaain te kiraati n iangoa kukurein nanoia nakon te anganano. Kaungaia bwa a na tibwaua te bwai ae a nooria man Reirei ao Berita aika Tabu 19 are e kaungaia bwa a na karaoi anganano bwa aonga ni kona ni karaoa a na kaantaninga te Atua (tarai riki kiibu 16–26, 34–41).
Bwaai n Ibuobuoki Riki Tabeua
Boon Ana Tangira te Atua.
Ni kaineti ma Reirei ao Berita aika Tabu 19:18, E taku Unimwaane D. Todd Christofferson: “Ti a iangoa boon ana tangira te Atua ae kakawaki. … Kainnanona i Ketetemwane ao iaon te kaibangaki e korakora riki nakon ae kona te aomata n te aonaaba ni kaitaraa. E ngae n anne, ibukin Ana tangira ibukin Tamana ao ibukira, E kakoroa raoi nanon ana beku ni uaa te toki, ao n tokina, E kona n anganiira te maiu ae mamate ao te maiu ae akea tokina” (“Abide in My Love,” Ensign ke Riaona, Nob. 2016, 50).
Kanakoraoan Ara Anga reirei
Karaoa te otabwanin are e kaoa te Tamnei. A mwaiti kawai aika ko kona ni kaoa iai te Tamnei nakon am kiraati. Te katangitang ae maraara e karekea te rau. Kaotakin te tangira ao te kakoaua e kona ni karekea te tangira, te tabo ae iai te tamnei iai. (Taraa Reirei n Ana Kawai te Tia Kamaiu, 15.)