“Beberuare 1–7. Reirei ao Berita aika Tabu 10–11: ‘Bwa Ko Aonga n Tokanikai,’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Beberuare 1–7. Reirei ao Berita aika Tabu 10–11,” Nakomai, Iriirai—Ibukin te Reirei n Tabati: 2021
Moan Koroboki ni katotoon Ana Boki Moomon.
Beberuare 1–7
Reirei ao Berita aika Tabu 10–11
“Bwa Ko Aonga n Tokanikai”
Tera bwaai aika ko rootaki iai ngkana ko wareka Reirei ao Berita aika Tabu 10–11? Tera iango aika a roko nakoim iaon kainnanoia aomata aika ko reireiniia?
Korei Am Namakin
Kaungaa te Tibwatibwa
N anganiia kaain te kiraati aia tai n taetae ibukin te bwai ae a reiakinna n aia kamatebwai ni booki aika tabu ao ma aia utu, ko kona ni koroia iaon te burakibooti Reirei ao Berita aika Tabu 10 ao Reirei ao Berita aika Tabu 11. Tabeman kaain te kiraati a kona ni koroia, iaan atuun te rongorongo, nambwan te kibu are a kunea iai te koaua ae kakawaki. Rinei tabeua kiibu, ao kaoia tabeman kaain te kiraati n tibwauai koaua aika a kunei ikekei.
Reirei te Reirei
Reirei ao Berita aika Tabu 10:1–33
Tatan e ukoukoria ni kamauna ana mwakuri te Atua.
-
Reirei ao Berita aika Tabu 10 e kona ni buokiia kaain te kiraati ni kinaa ao ni katoka ana mwakuri Tatan ni kamaunaa aia onimaki. N anga tabeua rongorongon ngkoa te mwakoro aei, ko kona ni kaoa temanna kaain te kiraati n tibwaua ana rongorongo Martin Harris ngke e kabuai 116 baan Ana Boki Moomon ake a tia n rairaki (taraa atuun te mwakoro ibukin Reirei ao Berita aika Tabu 3 ao Aika Itiaki, 1:50–53). A kona ngkanne kaain te kiraati n ukeukera Reirei ao Berita aika Tabu 10:1–33 ni kakaea ana babaire Tatan ibukin baana ake a bua. Tera ae ti reiakinna man kiibu aikai iaon ana mwakuri Tatan ao bukin tera e karaoi bwaai aikai? (taraa naba te kibu 63). E kanga ni mwakuri ni kawai aika titebo ma ara bong? E kanga te Uea ni buokiira n tokanikai iaon Tatan ni maiura?
Reirei ao Berita aika Tabu 10:34–52
Wanawanan te “Uea e korakora riki nakon ana kamwamwane te riaboro.”
-
Ngkana ti namakina te bwarannano ibukin ara bure, ngkana ti kunea te kantaninga n atakina bwa e kanga te Uea n anga maiuna ibukin te bure are a karaoia Iotebwa Timiti ao Martin Harris ngke a aki ongotaeka nakon te Uea ao ni kabuai 116 baan Ana Boki Moomon ake a rairaki. Iangoia bwa ko na kanga ni buokiia kaain te kiraati ni karekea te kantaninga n te karaki aei. Te katooto, ko kona ni kaoia bwa a na tibwaua te bwai ae a reiakinna n taekan te Uea man Reirei ao Berita aika Tabu 10:34–52 (taraa naba Reirei ao Berita aika Tabu 3:1–3). A kona kaain te kiraati n tibwauaia bwa a kanga n tia n noora wanawanan te Uea “e korakora riki nakon ana kamwamwane te riaboro” (Reirei ao Berita aika Tabu 10:43). E kanga te atatai aei ni kakorakora ara onimaki Irouna?
TamneiMoomon ngke e kauarerekei kanoan bwaatua kooraMoomon ngke e Kauarerekei Kanoan taiani Bwaatua, iroun Tom Lovell
Ngkana ti bubutia te Atua, ti na karekea.
-
Te kamataata n te wiiki aei n Nakomai, Iriirai—Ibukiia Aomata n Tatabemaniia ao Utu e kaoira bwa ti na wareka Reirei ao Berita aika Tabu 11 ae kanga a koreaki ibukira. Tao a kona kaain te kiraati n iai nanoia n tibwaua te bwai teuana man te mwakoro ae kaineti riki nakoia. A kanga ni baireia bwa a na karaoa te bwai ae a reiakinna?
-
Teuana te kawai ni kaungaa te marooro iaon taekan Reirei ao Berita aika Tabu 11 bon kaoakiia kaain te kiraati ni kakaea te reirei inanon te mwakoro ao ni korea te titiraki ibukina. Aekaki n titiraki aikanne a kona n ae “Tera ae nanonaki bwa ko na nim ma Kristo ma nanom ni kabane?” (te kibu 19) ke “Ti na kanga ni karekei ana taeka te Atua?” (te kibu 21). A kona kaain te kiraati ni katikui aia titiraki ietan te mwakoro ni beeba ao ni bwatina aia beeba ni katobibia te ruu, ni karin iango ao kaeka aika a kona n reke nakon aia titiraki n tatabemaniia. (E na kona n ibuobuoki n tibwaua te kiraati nakon kurubu moa aika uarereke.) A kona ngkanne n tibwauaia ma kaain te kiraati tabeua atatai aika a nano ake a koreaki irouia tabeman iaon te titiraki aei.
Reirei ao Berita aika Tabu 11:8–26
E na anganiira Tamneina te Atua ngkana ti katauraoira n Ana kawai.
-
A kona kaain am kiraati ni kakabwaiaaki man tataekinana bwa ko na kanga ni kinaa oin am kaotioti rinanon te Tamnei? Ngkana e kona, ko na bae ni moana am marooro man kaoakiia bwa a na iangoia ae ngkoa are a tuangaki bwa a na koroi tabeua koaua n aron karekean oin am kaotioti. Tera ae a na karinna man Reirei ao Berita aika Tabu 11:8–26? Te katooto, tera ae a na koroia iaon te katauraoi ni karekea te kairi ibukin maiura ao kaekaan ara titiraki? Tera ae a na taekinna iaon aron kinakin kaeka ngkana a roko? Kaoia kaain te kiraati bwa a na iangoa raoi aron kabonganakin te bwai ae a reiakinna ngkana a kekeiaki ni ukoukora oin aia kaotioti.
Ngkai bon mwakoron te waaki ni kakukurei aei, ko kona n tibwaua te rongorongo aei mairoun Titita Julie B. Beck, te Beretitenti ni Kabuta ngkoa n te Bootaki n Aine: “Te konabwai n tau ibukin, karekea, ao ni mwakuri iaon oin am kaotioti bon ti ngaia te rabakau ae moan te kakawaki ae kona ni karekeaki n te maiu aei” (“And upon the Handmaids in Those Days Will I Pour Out My Spirit,” Ensign ke Riaona, Meei 2010, 11).
Kanakoraoan Ara Anga reirei
Kairekerekeia te koraki ake a rinanon te kaangaanga. Tera ae ko kona ni karaoia ngkana iai kaain te kiraati ae taraa n aki nakoraoi ma kaain te kiraati ni kabane? N tabetai teuanne ke neienne e ti kainnanoia ae e na kairaki. Iangoia n tuanga te aomata aei bwa e na iri n te reirei ae e na roko. Ngkana teuanne ke neienne e aki kaekako n te moan tai, teimatoa ni kaota te tangira ao te tabeaianga. (Taraa Reirei n ana Kawai te Tia Kamaiu, 8–9.)