“Beberuare 8–14. Reirei ao Berita aika Tabu 12–13; Iotebwa Timiti—Rongorongo 1:66–75: ‘I Aomi Raou Ni Mwakuri,’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Beberuare 8–14. Reirei ao Berita aika Tabu 12–13; Iotebwa Timiti—Rongorongo 1:66–75,” Nakomai, Iriirai—Ibukin te Reirei n Tabati: 2021
Beberuare 8–14
Reirei ao Berita aika Tabu 12–13; Iotebwa Timiti—Rongorongo 1:66–75
“I Aomi Raou Ni Mwakuri”
N aron te Tamnei ae Raoiroi ngke e kabebetea ana iango Iotebwa Timiti ao Oliver Cowdery ni kaineti ma koroboki aika tabu, E kona ni kaungako ngkana ko tataro mwaaka n am kamatebwai Reirei ao Berita aika Tabu 12–13 ao Iotebwa Timiti—Rongorongo 1:66–75.
Korei Am Namakin
Kaungaa te Tibwatibwa
Teuana te kawai ni kaungaa te tibwatibwa bwa a na titirakinaki kaain te kiraati bwa a kanga ni kamatebwai booki aika tabu. Tera ae a karaoia ni kakaei atatai aika nano inanon booki aika tabu n te wiiki aei?
Reirei te Reirei
Te Nakoanibonga ae te Aaron e kaokaki iroun Iotebwa te Tia Bwabetito.
-
Teuana te kawai ni maroroakin koaua inanon Reirei ao Berita aika Tabu 13 bon ibukiia kaain te kiraati n taekinna bwa e kanga te mwakoro aei ni buokiia kairake n ataa te Nakoanibonga ae te Aaron. Tera ae reirei mwakoro 13 iaon taekan te Nakoanibonga ae te Aaron are a riai ataeinimwaane ao ataeinnaine n ataia? N anganiia aomata ni kabane aia tai n iria, ko kona n tuangiia kaain te kiraati ni maroroakina te titiraki aei n ikatoatoa ao n tibwaua te bwai ae a reiakinna mairouia n tatabemaniia ma te kiraati.
-
Te kamataata n te wiiki aei n Nakomai, Iriirai—Ibukiia Aomata n Tatabemaniia ao Utu e katautau bwaai n ibuobuoki ake a na kona ni kabwarabwarai kibuntaeka tabeua inanon Reirei ao Berita aika Tabu 13. Ko kona ni butiia kaain te kiraati bwa a na tibwaua te bwai ae a reiakinna man kamatebwaian bwaai n ibuobuoki aikai. Ni kawaekoa te marooro iaon kiing ake a taekinaki n te mwakoro aei, ko kona ni kaoti bwaninin kiing ao kaoia kaain te kiraati bwa a na taetae iaon kiing ake a kariaiira bwa ti na karaoi. Te kabwarabwara iroun Titita Ruth ao Unimwaane Dale G. Renlund inanon “Bwaai n Ibuobuoki Riki Tabeua” e kona naba n ibuobuoki. Tera kakabwaia aika ti kona ni karekei man kiingin te Nakoanibonga ae te Aaron? E na kanga maiura ni kaokoro n akean kakabwaia aikai?
-
Iteran bwaai aika a tamaroa ni kaokan te euangkreri bwa e kairekerekeira n te mwakuri naba are a karaoia mwaane ao aine inanon booki aika tabu: ni katea abanuean te Atua iaon te aba. E karikiira , bwa ti na, “mwakuri” ma ngaia. Tera ae nanonaki n riki bwa raou ni mwakuri n ana mwakuri te Uea? Mataio 3:13–17; Ruka 1:13–17; 3:2–20 e kona ni buokiia kaain te kiraati n ataa raoi te mwakuri ae karaoia Ioane te Tia Bwabetito.
TamneiIotebwa Timiti e bwabetitoa Oliver CowderyIotebwa Timiti e Bwabetitoa Oliver Cowdery, iroun Del Parson
Iotebwa Timiti—Rongorongo 1:66–75
Otenanti a anganiira te kona ni karekea mwakan te Atua.
-
N anganiia aia tai kaain te kiraati ni kakoaua i bon irouia taekan kakabwaia ake a reke man karekean otenanti n te nakoanibonga, ko kona ni kaoia bwa a na rinanon Iotebwa Timiti—Rongorongo 1:66–75, n raonaki ma te bwai ae e na taraaki n te kibu 71, ni kakaei kakabwaia ake a karekei Iotebwa ao Oliver imwiin te bwabetito ao te katabu n te nakoanibonga. A kanga otenanti ni katauraoa te mwaaka n tamnei? A kona ngkanne kaain te kiraati n tibwaua oin aia taneiai ngke a tia n namakina mwakan te Atua are e roko man karekean otenanti n te nakoanibonga n aron te bwabetito, te toa, ke otenanti n te tembora. Ko kona naba ni kaota te witeo “Kakabwaia n te Nakoanibonga” (ChurchofJesusChrist.org) bwa mwakoron te marooro.
-
A kona kaain te kiraati ni buokaki man karaoakin te tiaata are e na kaoti kakabwaia man otenanti n te nakoanbonga. Te katooto, ko kona ni koroia iaon te burakibooti atuun rongorongo n aron Otenanti ao Kakabwaia. A kona kaain te kiraati ni ukori kiibu n aron aikai ni kanoaa te tiaata: Ioane 14:26; Mwakuri 2:38; Reirei ao Berita aika Tabu 84:19–22; 131:1–4; Iotebwa Timiti—Rongorongo 1:73–74. A kona ni karin kakabwaia tabeua ake a tia ni karekei ibukin otenanti aikai. A kona n tibwaua aia atatai ngkana a namakinna bwa otenanti ake a karekei a uota mwakan te Tia Kamaiu nakon maiuia.
Bwaai n Ibuobuoki Riki Tabeua
Tera kingin te nakoanibonga?
Unimwaane Dale G. Renlund ao kainabana, Ruth, a anga te kabwarabwara aei iaon taekan kiingin te nakoanibonga.
“Te taeka kiingin te nakoanibonga e kabonganaaki ni uoua kawai aika a kakaokoro. Te moan e kaineti nakon te koaua ke te tai are anganaki ni kabane naake a karekea te Nakoanbonga ae te Aaron ke te Merekitereka. … Te katooto, naake iai irouia te Nakoanibonga ae te Aaron a karekei kiingin aia mwakuri n ibuobuoki anera ao te euangkerio ni katauraoi ibukin te rairannano ao te bwabetito n te kateboaki iaan te ran ibukin kamaunaan bure (taraa Reirei ao Berita aika Tabu 13:1; 84:26–27). Ake iai irouia te Nakoanibonga ae te Merekitereka a taui kiingin bwain abanuea aika raba, kiingin te atatai ibukin te Atua, ao kiing ni kabane n ana kakabwaia n tamne te Ekaretia (taraa Reirei ao Berita aika Tabu 84:19; 107:18). …
“Te kauoua ni kawai ae kabonganaki iai te taeka kiingin te nakoanibonga nakon te kairiiri. Mataniwi n te nakoanibonga a karekei tabeua riki kiing n te nakoanibonga, te mwiokoaki n tararuaa ana mwaanga te Ekaretia ke te kooram. Ni kaineti ma aei, kiingin te nakoanibonga bon te kariaia ao te mwaaka ni kaetii, ni kairii, ao n tararua te Ekaretia” (Te Nakoanibonga ae te Merekitereka: Atakin te Berita, Maiuakinan Reirei [2018], 26).
Kanakoraoan Ara Anga reirei
Kaota Am Koaua n taainako. “Am kakoaua ae bebete, ibukin te koaua n tamnei e na iai mwiina ae korakora iaoia naake ko reireiniia. … E aki kainnanoaki bwa e na taekinaki raoi ke n abwabwaki” (Reirei n Ana Kawai te Tia Kamaiu, 11). Iangoia n tibwaua am kakoaua ae onoti ibukin te Nakoanibonga ae te Aaron ngkai ko maroroakina Reirei ao Berita aika Tabu 13.