“Tianuare 25–31. Reirei ao Berita Aika Tabu 6–9: ‘Aio Tamnein te Kaotioti,’” Nakomai, Iriirai—Ibukin te Reirei n Tabati: Reirei ao Berita Aika Tabu 2021 (2020)
“Tianuare 25–31. Reirei ao Berita Aika Tabu 6–9,” Nakomai, Iriirai—Ibukin te Reirei n Tabati: 2021
Tianuare 25–31
Reirei ao Berita aika Tabu 6–9
“Aio Tamnein te Kaotioti”
Reirei ao Berita Aika Tabu 6–9 e reirei taian reirei aika kakawaki iaon karekean te kaotioti. Kabonganai reirei aikai man ukoukoran te kaotioti bwa ko na kanga ni buokiia kaaina n reirei man mwakoro aikai.
Korei Am Namakin
Kaungaa te Tibwatibwa
Ni kaungaia kaain te kiraati bwa a na tibwauai aia taneiai ni kamatebwaia Reirei ao Berita Aika Tabu 6–9, ko na bae ni kaoia bwa a na maroroakina, n riaina, aia namakin n tamnei aika a karekei n tain aia kamatebwai. Tera taian rongorongo aika e karekei te Uea ibukiia?
Reirei te Reirei
Reirei ao Berita Aika Tabu 6; 8–9
E taetae te Tama nakoiu rinanon “Tamnein te koaua.”
-
E mwaiti ae e na reireiniira te Uea iaon taekan oin am kaotioti inanon mwakoro aikai, ao ko na aki kona n anga reirei iaona ni kabane n teuana te kiraati. E na kona n ibuobuoki ngkana ko kamaenakoa te kiraati inanon teniua te kururubu ao tuangiia kain te kurubu n tatabeua nako bwa a na kamatebwaia mwakoro 6, 8, ke 9, n taratarai kaekaan titiraki n aron aikai: E kanga te Tamnei ae Raoiroi n taetae nakoira? Ti na kanga ni kinai oin ara kaotioti? Ti na kanga ni katauraoira bwa ti aonga ni karekea te kaotioti? Ngkanne temanna man kurubu aikanne e kona n tibwauaia ma kain te kiraati tera bwaai ae a kunea kain aia kurubu. Ko kona naba ni kaungaia kaain te kiraati bwa a na tibwauai aia taneiai ma aron kinakin oin aia kaotioti. Te katooto, iai te bwai inanon Reirei ao Berita Aika Tabu 6:22–24 are e kauringiira n te taneiai are ti a tia ni karekea?
-
Taekinakin oin am kaotioti e kona n aki kakukurei nakoia aomata n am kiraati aika a tataro ibukin te kairi ma a aki namakinna ae a karekei. E na kona ni buokiia n ataia ae Oliver Cowdery e a tia ni kaitara naba te aekaki ni kaangaanga anne ngke e aki kona n rairairi n aron are e a tia ni kantaningaia. Tao ko kona ni kaoia kaain te kiraati n ukoukora ana reirei te Uea nakon Oliver ni mwakoro 9. Tera te mwakoro n te rongorongo aei ae kona ni buoka temanna ae namakinna bwa e aki kaekai aia titiraki te Uea? Taian rongorongo inanon “Bwaai n Ibuobuoki Riki Tabeua” a kona naba n ibuobuoki.
TamneiOliver CowderyOliver Cowdery, iroun Lewis A. Ramsey
Reirei ao Berita aika Tabu 6–7
“Are ko tangiria mai irou ao e na bon reke nakoim.”
-
Te kamataata n te wiiki aei n Nakomai, Iriirai—Ibukiia Aomata n Tatabemaniia ao Utu bubuti aekakin taeka aika okioki n aron te nano inanon mwakoro aika 6–7. Tao a kona kaain te kiraati n tibwaua te bwai ae a reiakinna man te mwakuri anne, ke ko kona ni karaoa te waaki ni kakukurei ni kabane n ikotaki n te kiraati. Tera ae a rereiniira ara mwakuri ni katoabong ni bwaai aika mamate nanora iai? E na kanga te Uea ni buokiira ni bitii nanora?
Reirei ao Berita aika Tabu 6:29-37
Ngkana ti taraa te Uea ao e kona ni buokiira n tokanikai iaon raraomara ao maakura.
-
Bukin tera n tabetai ti “maaku … ni karaoa ae raoiroi”? (te kibu 33). A kona kaain te kiraati ni kona n anga tabeua bukina, n raonaki ma iango man Reirei ao Berita Aika Tabu 6:29–37 are e anganiia te ungannano ni karaoa ae raoiroi.
-
Ni moanakin te marooro bwa e kanga Iesu Kristo ni buokiira “n aki raraoma, aki maaku” (te kibu 36), ko kona n tuangiia kaain te kiraati ni koroia iaon te mwakoro ni beeba tabeua bwaai aika a na kona ni maakui aomata. (Unimwaane Ronald A. Rasband e anga tabeua katooto n ana rongorongo “Ko na Aki Karekeko n te Kaangaanga” [Ensign ke Riaona, Nob. 2018, 18].) Ngkanne ko kona ni warekia ni kabaibati tabeua mai ibuakon beeba aikai ao ni maroroakinna bwa e kanga te Tia Kamaiu ao Mwaakana ni kamaiu ni kona ni buokira ngkana ti maaku. Reirei ao Berita aika Tabu 6:29–37 iai iango aika nano inanona (taraa naba 1 Ioane 4:18). Tera ae nanonaki n “taraa [Kristo] n am iango ni kabane”? (te kibu 36). E kanga kabanean am iango iaon te Tia Kamaiu ni buokiira ngkana ti namakina te raraoma ke te maaku?
Bwaai n Ibuobuoki Riki Tabeua
Ataakina bwa e kanga ni kaekai taian tataro Tamara are i Karawa.
“Inanon maiu ao I a tia n reiakinna bwa n tabetai I aki karekea kaekaan au tataro ibukina bwa e ataia te Uea bwa I tuai tauraoi. Ngke E kaeka, ao n tainako ‘teutana imwiin teutana’ [2 Nibwaai 28:30] ibukina bwa anne ae I kona n anga ke n iai nanou ni karaoia” (Robert D. Hales, “Waiting upon the Lord: Thy Will Be Done,” Ensign ke Riaona, Nob. 2011, 73).
“Tera ae ko karaoia ngkana ko a tia ni katauraoiko raoi, n tia n tataro ma nanom ni koaua, tataninga n te tai ae riai ibukin te kaeka, ao n teimatoa n aki karekea te kaeka? Ko tangiria n anga te kakaitau ngkana e riki anne, bwa ibukin kakoauaan Ana koaua. Ngkana ko maiu ma te kororaoi ao am rinerine e boraoi ma ana reirei te Tia Kamaiu ao ko kainnanoia bwa ko na mwakuri, waaki ma te onimaki. … Ngkana ko maiu ma te raoiroi ao ni waaki ma te onimaki, e na aki kariaia te Atua bwa ko na waaki nakon ae raroanako n akea namakinan te kauring ngkana ko a tia ni karaoa te babaire ae bure” (Richard G. Scott, “Using the Supernal Gift of Prayer,” Ensign ke Riaona, Meei 2007, 10).
Kanakoraoan Ara Anga reirei
Kaota te aki nanououa n aia konabwai taan kamatebwai. Tabeman aomata n am kiraati a bae n aki koaua n aia konabwai n reirei taekan te euangkerio. Iangoia bwa ko na kanga ni kona ni kakoaua nakoia bwa a kekeiaki ni kamatebwai i bon irouia, te Tamnei ae Raoiroi e na reireiniia. (Taraa Reirei n Ana Kawai te Tia Kamaiu, 29.)