“Ritembwa 28–Tianuare 3. Reirei ao Berita aika Tabu 1: ‘Ongora, O Ngkami Kaain au Ekaretia,’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Ritembwa 28–Tianuare 3. Reirei ao Berita aika Tabu 1,” Nakomai, Iriirai—Ibukin te Reirei n Tabati: 2021
Ritembwa 28–Tianuare 3
Reirei ao Berita aika Tabu 1
“Ongora, O Ngkami Kaain au Ekaretia”
Ngkana ko wareka Reirei ao Berita aika Tabu 1, iangoi kiibu aika ko na kabanea am tai iai n am kiraati ao ko na kanga ni buokiia kaain te kiraati n reirei man kiibu aikai.
Korei Am Namakin
Kaungaa te Tibwatibwa
Ko na bae ni moana am kiraati n reirei iaon Reirei ao Berita aika Tabu man titirakinaia kaain te kiraati n aron aia namakin iaon kamatebwaiakan te boki aei ni koroboki aika tabu n te ririki aei. Tera kibuntaeka man mwakoro 1 ae buokiia n namakina te kukurei ni wareka Reirei ao Berita aika Tabu? Tao ko kona n tuangiia bwa a na kamatebwaia mwakoro 1 ibukin te kibu are a na ti bwauaia ngkana a kataia n anaa nanon temanna bwa e na wareka te boki ae tabu aei.
Reirei te Reirei
E kaoira te Uea bwa ti na “reiakin tuua aikai.”
-
Ngkana ko maroroakina ana “kabwarabwara” te Uea n Reirei ao Berita aika Tabu (te kibu 6), e na ibuobuoki ibukin temanna n te kiraati ni kamatataa bwa tera te kabwarabwara ao te kantaninga iai n te boki. Ngkanne a kona kaain te kiraati ni maroroakinna bwa e kanga mwakoro 1 ni buoka te kantaninga anne ibukin Reirei ao Berita aika Tabu. Ibukin te katooto, tera oin te kantaninga ibukin te boki ae mwakoro 1 ni kabwarabwaraana? Tera kaantaninga ngkai iai n te boki? Tera ae ti kunea n te mwakoro aei are e kona ni kakorakora te kawai ae ti wareka iai Reirei ao Berita aika Tabu n te ririki aei?
-
Te kamataata n te wiiki aei n Nakomai, Iriirai—Ibukiia Aomata n Tatabemaniia ao Utu e kaoira bwa ti na iangoia bwa ti na kanga ni karaoa ana tua te Uea ni “ukoukori tuua aikai” (te kibu 37). A na kona kaain te kiraati n tibwaua te bwai ae a baireia bwa a na karaoia n te ririki aei ni karaoa aia kamatebwai iaon Reirei ao Berita aika Tabu bwa e na uaana. Tera te bwai ae a na ukoukoria? E kanga ni kaokoro ae ukeraki ma ae e warekaki? Tera te kawai ni kamatebwai ae a tia ni kunea ae na rangi n ibuobuoki?
Reirei ao Berita aika Tabu 1:1–6, 23–24, 37–39
E taetae te Atua rinanoia Ana toro, ao a na korobukin Ana taeka.
-
A mwaiti mai ibuakora aika iai aia utu, raoraoia, ao aia reitaki aika aki titebo aia koaua ma ngaira ibukiia burabeti aika maiu. A kona kaain te kiraati n tibwauai koaua aika a kunei ni mwakoro 1 are a kona ni kabonganai ni kaekaa temanna ae titiraki ibukin aia koaua irouia aia burabeti. Ko na bae ni bubutiia bwa a na ti tarai riki kiibu 1–6 ao 37–39. Tera ae a taekinaki ni kiibu aikai ibukin te Uea ao Ana burabeti?
-
A na bae n iai nanoia kaain te kiraati n reiakinna ae ngkana e weteaki te kauntira iroun Iotebwa Timiti ni maroroakina boretiakin ana kaotioti te Burabeti, tabeman kaain te kauntira a totokoa te iango. A rangi ni maama n aron ana konabwai Iotebwa ni koroboki, ao a raraoma bwa e na kona ni karekea riki te kaangaanga ni boretiakin te kaotioti ibukiia Aika Itiaki (taraa Aika Itiaki, 1:140–43). E kanga mwakoro 1 n taekin tabeaianga aikai? (taraa, te katooto, ni kiibu 6, 24, 38).
-
Mwanewen te anene “Nakomai, Ongora nakon Bwanaan te Burabeti” (Anene, nambwa. 21) e anga reirei iaon tabeua aekaki n reirei ake a reiakinaki inanon mwakoro 1. Tao kam kona ni bootaki n anenea ke ni wareka mwanewen te kuna ao ni kaoia kaain te kiraati ni ukori rain inanon te anene ao kiibu ni mwakoro 1 are e reirei te aekaki n reirei naba anne.
Tamneite tetere n te maungatabu ni kabutaE taetae te Atua nakoira rinanon Ana toro.
Reirei ao Berita aika Tabu 1:12–30, 35–36
E kaoka Ana euangkerio te Uea bwa e na buokiira ni kaitarai kakaewenako nakoira ni boong aikai.
-
Tera iango aika a karekei kaain te kiraati ngke a wareka te kabwarabwara ni boong aikai inanon kiibu 13–16? Tera ae riki n te aonaaba n te bong aei ake a kakoroi nanon taetae ni burabeti ibukin kabwarabwara aikai? Kaungaia kaain te kiraati bwa a na tibwaua te bwai ae a kunea inanon mwakoro 1 are e na buokiia n namakina te rau ao te koaua n aki tabe ma kakaewenako n ara bong aei.
-
Ni buokiia kaain te kiraati n iangoi kakabwaia aika iroura ibukina bwa e a tia ni kaokaki te euangkerio, ko kona ni koroia iaon te burakibooti Tera ae a reirei kiibu 17–23 bwa bukin tera e kaoka Ana Euangkerio te Uea? A kona kaain te kiraati n ukoukorii kiibu aikai ao n tibwauai aia iango i bon imarenaia. Te katooto, a kanga koaua ni kaokaki rinanon Iotebwa Timiti ni buokiira ni kakorakora ara onimaki? (taraa te kibu 21).
Reirei ao Berita aika Tabu 1:19–28
Te Uea e kabonganaia aika “mamaara ao aki reirei” ni kakoroa nanon Ana mwakuri.
-
Teuana te botoniango ae kakawaki n Reirei ao Berita aika Tabu 1 bon tabeia aika “mamaara ao aki reirei” n ana mwakuri te Uea aika tamaroa ni boong aikai (te kibu 23). Kaoia kaain te kiraati bwa a na karaoa aia kamatebwai iaon kiibu 19–28 n reiakinna bwa e kanga taeka aika “mamaara” ao “aki reirei” ni kaineti nakoira ngkai ngaira ana toro te Uea. Ngkai a tibwaua te bwai ae a kunea, ko kona ni maroroakin titiraki n aron aikai: Tera katei aika e tangiria te Uea bwa e na iai irouia Ana toro? Tera ae na kakoroa bukina te Uea rinanoia Ana toro ni boong aikai? A kanga taeka ni burabeti inanon kiibu aikai ni koro bukiia rinanon te aonaaba n oin maiura?
Kanakoraoan Ara Anga reirei
Buokiia taan kamatebwai bwa a na tangiri koroboki aika tabu. Te koaua naba anne are e kaungaia Aika Itiaki n taai akekei e kona ni buokiira ni kaitarai kakaewenakoara n te bong aei. Ngkana ko anga reirei iaon Reirei ao Berita aika Tabu, buokiia kaain te kiraati ni karaoi reitaki imarenan ana rongorongo te Uea nakon Iotebwa Timiti ao tera ae e na taekinna te Uea nakoia. (Taraa Reirei n Ana Kawai te Tia Kamaiu, 21.)