“Tianuare 4–10. Iotebwa Timiti—Rongorongo 1:1–26: ‘I Noora te Boua ae te Ota,’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Tianuare 4–10. Iotebwa Timiti—Rongorongo 1:1–26,” Nakomai, Iriirai—Ibukin te Reirei n Tabati: 2021
Te Buakoako ae Tabu, iroun Greg K. Olsen
Tianuare 4–10
Iotebwa Timiti—Rongorongo 1:1–26
“I Noora te Boua ae te Ota”
Uringnga bwa te katauraoi ae moan te kakawaki bon kamatebwaian booki aika tabu ao maiuakinan te bwai ae ko reiakinna. E kona te Tamnei ni buokiko n ataa te bwai ae ko na kabanea am tai iaona n te kiraati.
Korei Am Namakin
Kaungaa te Tibwatibwa
Tera atatai aika nano ae a karekei kain te kiraati ngke a kamatebwaia Iotebwa Timiti—Rongorongo 1:1–26 n te wiiki aei? Tao ko kona ni kaota tamnein Iotebwa Timiti ke te Moan ni Kaotioti ao kaoia kaain te kiraati bwa a na koroi iaon te burakibooti tabeua atatai aika nano man aia kamatebwai, n raonaki ma kiibu ake a kunei. A kona naba n tibwaia bwa a kanga aia koaua iroun Iotebwa Timiti ao ana mition n rikirake ngkai a reirei taekana n te wiiki aei.
Reirei te Reirei
Iotebwa Timiti—Rongorongo 1:5–18
Ngkana ti titiraki ma te onimaki, ao e na kaekaira te Atua.
-
A kona kain am kiraati ni kabotaua nanon Iotebwa ni ukoukora te koaua n te aonaaba are a reireinaki iai iango aika a kakaokoro. A kanga iango aika kakaokoro n ara bong n titebo ma are e kaitara ma ngaia? Ni boukia kaain te kiraati bwa ti kanga ni kunei kaekaan ara titiraki, ko kona ni kaoia bwa a na koroi iaon te burakibooti kawai aika kakaokoro aika a ukoukori iai aia koaua aomata. Ngkanne a kona n rinanon Iotebwa Timiti—Rongorongo 1:5–18 ao ni karin bwaai aika e karaoi Iotebwa Timiti ni kakaei kaekaan ana titiraki.
-
A kona kaain te kiraati n tibwauaia bwa a kanga n ira ana banna ni katooto Iotebwa Timiti n aia ukeuke ibukin te koaua ao e kanga te Atua n tia ni kaekai. Ana rongorongo Beretitenti Russell M. Nelson inanon “Bwaai n ibuobuoki Riki Tabeua” e kaoti tabeua kawai aika ti kona ni ukeukeri iai koaua mairoun te Atua.
Tamneite ataeinnaine ae tataroTe tataro e kariaira bwa ti na reitaki iai ma te Atua.
Iotebwa Timiti—Rongorongo 1:15–20
Iotebwa Timiti e noora te Atua te Tama ao te Nati, Iesu Kristo.
-
Te Moan Kaotioti e kaoki tabeua koaua iaon taekan te Atua are e kaokoro ma ake a kakoauaaki n ana tai Iotebwa. A kona kaain te kiraati ni wareka Iotebwa Timiti—Rongorongo 1:15–20 ao ni kinai bwaai tabeua ake a reiakin ibukin te Atua. Bukin tera e kakawaki bwa ko na atai koaua iaon taekan te Atua aikai?
-
Ngkana e kawara ara kiraati Iotebwa Timiti, tera ae ti na titirakinna ibukin ara taneiai? Te witeo “Butia te Atua: Ana Moan Kaotioti Iotebwa Timiti” (ChurchofJesusChrist.org) e kona n anganiia kaain te kiraati atatai riki tabeua aika nano iaon Ana Moan Kaotioti Iotebwa Timiti (taraa naba “Bwaai n Ibuobuoki riki Tabeua”). Tao a kona n iangoia bwa a na kanga ni kabanea te tiententi n aron aei: “Bukina bwa e bon riki te Moan Kaotioti, I ataia bwa …” Tera kakabwaia aika a tia n reke inanon maiura ibukin te Moan Kaotioti?
-
N reitia ma tamnein am marooro, a kona kaain te kiraati ni wareka ke n anenea “Ana Moan Tataro Iotebwa Timiti” (Anene n Taromauri, nambwa. 26). Tera te bwai ae buokiira ni kaotaira te anene aei n ataa ao n namakina te Moan Kaotioti? Tao a kona kaain te kiraati tabeman n tibwauaia bwa a kanga n tia n ataia i bon ibukiia bwa Iotebwa e bon noora raoi te Atua te Tama ao Iesu Kristo n te Buakonikai ae Tabu. Ke ko kona ni kaoia mitinare aika bane aia tai (ke te mitinare ae e a tibwa oki) n roko n te kiraati ao n taekinna bwa e kanga te Moan Kaotioti n tia ni kairoroi maiuia aomata ake e reireiniia.
Iotebwa Timiti—Rongorongo 1:21–26
Ti kona n teimatoa ni koaua nakon te bwai ae ti ataia, e ngae ngke a aki butimwaaira tabeman.
-
A na kona kaain te kiraati ni kaotii tabeua bwaai aika e a tia Iotebwa Timiti n rinanoi ngke e moanna n tuangiia aomata tabeman taekan ana mition (taraa Iotebwa Timiti—Rongorongo 1:21–26). Tao a kona n tibwauai kiibu ake a kaungaia ngkana tabeman a kaitarai aia koaua.
-
Ngkana iai kaain te uoote aika a tia n rinanon te kakaitara ibukina ngkai ngaiia kaain te Ekaretia, iangoia n tuangiia bwa a na katauraoia bwa a na roko n te kiraati ao n tibwauaia bwa a kanga ni kateimatoa ni kakorakora aia onimaki. Tera ae ti reiakinna man ana banna ni katooto Iotebwa Timiti’ Iotebwa Timiti—Rongorongo 1:21–26?
Bwaai n Ibuobuoki Riki Tabeua
Ira Ana banna ni katooto Iotebwa.
Beretitenti Russell M. Nelson e anga reirei:
“Te Burabeti Iotebwa Timiti e katea te banna ni katooto ibukira bwa ti na iria ni kaekai ara titiraki. E kaungaaki n ana berita Iakobo are ngkana akea ana rabakau temanna i buakomi, ao e na butia te Atua [taraa Iakobo 1:5], te ataeinimwaane ae Iotebwa e uota ana titiraki aei nakon Tamara are i Karawa. E ukoukora te kaotioti ae onoti, ao ana ukeuke e kauka te euangkerio ni kabanean boong aikai.
“N te kawai naba anne, tera ae ko ukoukoria ae kaukaki nakoim? Tera te wanawana ae akea iroum? Tera te kainnano ae ko namakinna ae e na kawaekoaaki n ataaki ke ni kaotako iai? Ira ana katooto te Burabeti Iotebwa. Kakaea te tabo ae rau ae ko kona n nako iai n taainako. Kananorinanoko imatan te Atua. Tataro i nanom nakon Tamam are i Karawa. Rairaki Nakoina ibukin taian kaeka ao ibukin te rau” (“Te Kaotioti ibukin te Ekaretia, Te Kaotioti ibukin Maiura,” Ensign ke Riaona, Meei 2018, 95).
Ana Moan Kaotioti Iotebwa Timiti.
Ni wareki kabwarabwara iaon te Moan Kaotioti ake a taekin iai tabeua rongorongon Iotebwa Timiti, taraa Aomata aika Itiaki, 1:14–16.
Kanakoraoan Ara Anga reirei
Ukoukora oin am kaotioti. Tai tarai kamataata aikai bwa kanga kaetieti ake ko riai n irii ngkana ko anga reirei. Ma, kabonganai ni kakorakorai iango ao ni katanoata te kairi mai ieta ngkana ko iangoi reirei inanon booki aika tabu ao kainnanoia aomata aika ko reireiniia.