“Tianuare 18–24. Reirei ao Berita aika Tabu 3–5: ‘E Na Bon Waaki Nako Au Mwakuri,’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Tianuare 18–24. Reirei ao Berita aika Tabu 3–5,” Nakomai, Iriirai—Ibukin te Reirei n Tabati: 2021
Tain te Tai i Buranti, iroun James Taylor Harwood
Tianuare 18–24
Reirei ao Berita aika Tabu 3–5
“E Na Bon Waaki Nako Au Mwakuri”
Kamatebwaia Reirei ao Berita aika Tabu 3–5 imwain ae ko rinanon iango n te kabwarabwara aei e na buokiko ni karekei kairi mairoun te Tamnei ae Raoiroi. Te kamataata n te wiiki aei n Nakomai, Iriirai—Ibukiia Aomata n Tatabemaniia ao Utu e kona ni buokiko ni kaotako n rongorongo ake a kaineti ma te kaotioti aika koreaki inanon mwakoro aikai.
Korei Am Namakin
Kaungaa te Tibwatibwa
Anganiia tabeman kaain te kiraati tabeua te miniti bwa a na rinanoi koroboki aika tabu ake a wareki ni mwengaia ao kakaea te kibuntaeka ae a kunea bwa e uaana. Ngkanne kaoia bwa a na tibwaua te bwai ae a reiakinna ma te aomata temanna n te kiraati.
Reirei te Reirei
Reirei ao Berita aika Tabu 3:1–15
Ti riai n onimakina te Atua nakon ae makakin te aomata.
-
N aron Iotebwa Timiti, a bane n iai ara taneiai ngke ti namakina te kairoroaki mai irouia tabeman aomata ni karaoa te bwai ae ti ataia bwa e bure. Tera koaua aika ti na reiakin man Reirei ao Berita aika Tabu 3:1–15 aika a na kona ni buokiira n teimatoa n onimakina te Atua ngkana ti kaitara ma taian kaangaanga aikanne?
-
E riai Iotebwa Timiti ni katuaeaki ibukin makakin te aomata nakon riki te Atua, ma e kainnanoa naba te kaungaaki. Kaoia kaain te kiraati bwa a na taraa mwakoro 3 bwa e kanga te Uea ni katuaea ao ni kaunga Iotebwa. Te katooto, a kona ni koroi iaon te burakibooti kibuntaeka man kiibu 1–15 aika iai inanona ana katuua te Uea ao kibuntaeka riki tabeua aika iai inanona Ana kaunganano n rairinanoia ao n teimatoa n onimaki. Tera ana taneiai Iotebwa ae reireiniira bwa e kanga te Tia Kamaiu ni buokiira n tokanikai iaon ara bure?
E tuangira te Uea bwa ti na toro Irouna ma nanora ni kabane.
-
Anua ake a kabwarabwaraki ibukiia ana toro te Uea ake a koreaki n Reirei ao Berita aika Tabu 4:5–6 bon anuan maiun naba Iesu Kristo. Ni buokiia kaain te kiraati bwa a na reiakina ae mwaiti riki, ko kona ni kaoia bwa a na rinea teuana mai ibuakon anua ao ni kakaei nanon ke koroboki riki aika tabu are e buokiia n ataa te anua ni maiu (taraa, n aron te katooto, te rongongo mai iroun Titita Elaine S. Dalton inanon “Bwaai n Ibuobuoki Riki Tabeua”). Ko kona ni kaoia tabeman aomata bwa a na tibwauai baike a kunei. A kona naba n tibwauaia bwa bukin tera te anua are a rineia bon te bwai ae kainnanoaki ibukin te mwakuri n abanuean te Atua. Ti na kanga ni karikirakei riki anua aikai? (taraa te kibu 7).
-
Reirei ao Berita aika Tabu 4 e taekinaki nakon Iotebwa Timiti te Ikawai., are e tangiria ni kan ataia bwa e na kanga n ibuobuoki n Ana mwakuri te Uea. E kona naba te mwakoro aei ni buokiira ngaira ake iai nanora ni kan beku ibukin te Uea. Aio te kawai teuana ni kamatebwaia te mwakoro aei: a kona kaain te kiraati ni mwakuri inanon kurubu aika uarereke ni korea kabwarabwaraan te mwakuri ibukin ana toro te Atua, ni kabongana mwakoro 4 bwa te bwai ni kairi. A kanga konabwai aikai ni kaokoro ma kabwarabwaraan mwakuri ake tabeua? Bukin tera anua aikai a tau ni karaoan ana mwakuri te Atua? Te rongorongo iroun Unimwaane David A. Bednar inanon “Mwakuri n Ibuobuoki Riki Tabeua” e kona ni buokiia kaain te kiraati n ataa kakawakin karikirakean anua aikai.
Te kakoaua ibukin te koaua a roko nakoia naake a nanorinano ao n onimaki.
-
Ngkana bwaatua aika koora a kaotaki bwa e na nooria te aonaaba, e na aki anne anai nanoia aomata ni kabane bwa e koaua Ana Boki Moomon? Bukin tera ke bukin tera ko aki? (taraa Reirei ao Berita aika Tabu 5:7). Tao a kona kaain te kiraati ni kamatebwaia mwakoro 5 ibukin atatai aika nano ake a na kona ni buokiia ni kaekaa temanna ae titiraki ibukin kakoauaan ae e bon koaua Ana Boki Moomon. Tera te bwai ae reireina Iotebwa Timiti ao Martin Harris te Uea are e kona ni buokiira ni karekei oin ara kakoaua ni koauan te euangkerio?
TamneiMartin HarrisMartin Harris, iruon Lewis A. Ramsey
Bwaai n Ibuobuoki Riki Tabeua
Te Tamaroa nanona te korakora.
Titita Elaine S. Dalton e anga kabwarabwaraan te taeka ae tamaroa: “Tamaroa bon te taeka ae tiaki bati n ongongo n taian bootaki, ma te taeka n Ratine virtus nanona te korakora. Aine ao mwaane aika tamaroa a bwaina te kamoamoaki ao te korakora mai inanoia. A onimaki ibukina bwa a kororaoi ni karekea ao ni kairaki iroun te Tamnei ae Raoiroi” (“A Return to Virtue,” Ensign ke Riaona, Nob. 2008, 79).
N riki bwa te mitinare.
E taku Unimwaane David A. Bednar: “Te waaki n riki bwa te mitinare e aki kainnanoa te ataeinimwaane bwa e na bwaina te kunnikai ae mainaina ao te neketai [ke te ataeinnaine bwa e na bwaina te kaboraoi] nakon te reirei ni katoa bong ke n ira te kainibaire ibukin te mitinare ibukin te nako ni matu ke te uti. … Ma ko kona n rikirake inanom ni beku ibukin te Atua [taraa Reirei ao Berita aika Tabu 4:3], ao ko kona ni moanna n iango n aron aia iango mitinare, wareki bwaai aika a wareki mitinare, n tataro n aron aia tataro mitinare, ao n namakin n aron aia namakin mitinare. Ko kona n totokoi ana kairoro te aonaaba are e karika te Tamnei ae Raoiroi bwa e na kitaniko, ao ko kona n rikirake ma te aki nanokokoraki ni kinaa ao ni kaeka nakon ana wirikiriki te tamnei” (“Becoming a Missionary,” Ensign ke Riaona, Nob. 2005, 45–46).
Kanakoraoan Ara Anga reirei
Titiraki iaon titiraki ake a kaungaa te marooro ae uaana. Titiraki ake a raka iaon teuana rekeia ae eti e kaoia taan kamatebwai bwa a na anga aia kaeka ni bon aia iango, aia namakin, ao aia atatai. Te katooto, ko kona n titiraki, “Ko na kanga n ataia ngkana e taetae te Atua nakoim?” (Taraa Reirei n Ana Kawai te Tia Kamaiu, 33.)