“Tianuare 11–17. Reirei ao Berita aika Tabu 2; Iotebwa Timiti—Rongorongo 1:27–65: ‘Nanoia Naati Ana Rairaki Nakoia Tamaia,’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Tianuare 11–17. Reirei ao Berita aika Tabu 2; Iotebwa Timiti—Rongorongo 1:27–65,” Nakomai, Iriirai—Ibukin te Reirei n Tabati: 2021
E Weteai n Arau, iroun Michael Malm
Tianuare 11–17
Reirei ao Berita aika Tabu 2; Iotebwa Timiti—Rongorongo 1:27–65
“Nanoia Naati Ana Rairaki Nakoia Tamaia”
Imwain ae ko wareki iango inanon te kamataata aei, kamatebwaia Reirei ao Berita aika Tabu 2 ao Iotebwa Timiti—Rongorongo 1:27–65, ao korei am namakin n tamnei.
Korei Am Namakin
Kaungaa te Tibwatibwa
Ni kaungaia kaain te kiraati bwa a na tibwaua aia atatai aika nano ao aia taneiai ae a tia ni karekei ngke a reirei taekan kiibu aikai, ko kona n tuangiia bwa a na tibwaua te kibu are e kaungaia bwa a na kabanea aia iango nako iai nakon ae a tataneiai iai. Tera ae anaa nanoia n te kibu aei?
Reirei te Reirei
Iotebwa Timiti—Rongorongo 1:27–65
E weteaki Iotebwa Timiti bwa e na karaoa a na mwakuri.
-
A na kona kaain am kiraati ni kakabwaiakaki man rinanoan te karaki n Iotebwa Timiti—Rongorongo 1:27–65? Ko kona ni kaoa temanna kain te kiraati bwa e na kabwarabwara ni kakimototoa, ke a kona kaain te kiraati ni karaki nakoia n tatabemananiia n ikatoatoa ke ni kurubu aika uarereke. Kaungaia bwa a na karin kabwarabwarakiia are a kona ni uring. E kanga te karaki aei ni kakorakorai ara koaua n ana wewete Iotebwa Timiti mai ieta? Tera reirei aika ti reiakin man te karaki aio n aron karaoakin Ana mwakuri te Atua?
-
Iangoia ni kaotai bwaai ke tamnei ake a kaineti nakon ana mwakuri Iotebwa Timiti are e weteaki bwa e na karaoia, n aron Ana Boki Moomon ke tamnein te tembora. A kona kaain te kiraati ni kunei kiibu n Iotebwa Timiti—Rongorongo 1:33–42 are e reirei taekan ana mition te Burabeti. E kanga ana mwakuri te Atua ibukin Iotebwa Timiti ni kaineti ma ana mwakuri te Atua ibukira? Tera ae a reireiniira ara burabeti aika maiu ibukin te mwakuri aei?
E roko Eria bwa e na rairi nanora nakoia ara bakatibu.
-
A na kona kaain am kiraati ni kakabwaiakaki iaon te marooro bwa antai Eria ao taekan te mwaaka ni kabaebae are e kaokia? A kona kaain te kiraati ni wareka taekan Eria inanon te Baibara Rikitinari ke te Kairi nakon Koroboki aika Tabu ke n rinanon te karaki man maiuna (taraa 1 Uea 17–18). Tera ae karakaa te rongorongo aei nakon otara n Reirei ao Berita aika Tabu 2? Ko kona naba n taekina taekan nanon kabaeakin te bwai teuana. Tao a kona tabeua bwaai n ibuobuoki, n aron tiinin te amwarake, te baeki te buratitiki ibukin kawakinan te amwarake ma rokana ae katikitiki, ke te kabaebae are e kateimatoa te beeba. A na kanga bwaai aikai ni buokiira n ataia bwa tera ae nanonaki ni kabaeaia utu ni kabane? E kanga te mwaaka aei n ibuobuoki ni kakoroa nanon te kantaninga ni karikan te aonaaba? (taraa Reirei ao Berita aika Tabu 138:47–48 ao ana rongorongo Beretitenti Russell M. Nelson inanon “Bwaai n Ibuobuoki Riki Tabeua”). Ni buokiia kaain te kiraati n ataia bwa e kanga te taetae ni burabeti inanon Reirei ao Berita aika Tabu 2 ni korobukina, ko kona ni maroroakina Reirei ao Berita aika Tabu 110:13–16.
-
Tao reiakinan taekan “berita aika karaoaki nakoia taama” (Reirei ao Berita aika Tabu 2:2) e na buokiia naake ko reireiniia bwa a na oota raoi ni mwaakan te nakoanibonga are e kanakoa Eria bwa e na kaokaki. Antai raoi “taama”? (taraa Reirei ao Berita aika Tabu 27:9–10). Tera berita aika e karaoi te Uea ma Aberaam, Itaaka, ao Iakobo? (taraa Karikani Bwaai 17:1–8; 22:16–18; 26:1–5, 24; 28:11–15; Aberaam 2:8–11). Tera ae nanonaki n “unikan” berita aikai inanora? E na kanga karaoan aei ni bitii nanora nakoia ara bakatibu?
Palmyra New York Tembora
-
Ni kaungaia kaain te kiraati n rairi nanoia nakoia aia bakatibu, ko kona ni kaoia tabeman membwa ni kaira te marooro iaon atuun te rongorongo. Iangoia ni karina te tia rabakau n te tembora n te uoote ao n rongorongon te utu. Ko kona ni moanna man warekan Reirei ao Berita aika Tabu 2:2–3 ao ni kaoi marooro aika a na tibwauai taan kairiiri are a bitaki iai nanoia nakoia aia bakatibu. Tera ae a tia n riki inanon maiuia are e buokiia ni kan reirei rongorongoia aia bakatibu? Tera iango aika a kona n anga ni buokiia kaain te kiraati ake tabeman n irekereke ma rongorongon te utu ao te mwakuri n te tembora? Te rongorongo iroun Beretitenti Dallin H. Oaks inanon “Bwaai n Ibuobuoki Riki Tabeua” ao witeo “Kakabwaia Aika a tia Ni Beritanaki n Rongorongon te Utu” ao “Ngkana ti Karimoa Moa te Atua” (ChurchofJesusChrist.org) e kona naba ni kaungaia kaain te kiraati. Ko kona naba ni kanakoia membwa nakon FamilySearch.org ibukin iango.
Bwaai n Ibuobuoki Riki Tabeua
Te kantaninga n te Karikibwai.
Beretitenti Russell M. Nelson e anga reirei:
“Te maiu ae akea tokina, e kona n reke man te Mwakuri ni Kamaiu, bon aan raoi bukin te Karikibwai. N taekinan te rongorongo n te aro ae buakaka, ngkana aki kabaeaki utu n tembora aika tabu, te aonaaba ae bwanin e na bon urubekeaki n rokona.
“Te kantaninga ibukin te Karikibwai, te Bwaka, ao te Mwakuri ni Kamaiu a bane ni katiteuanaki n te mwakuri ae tabu ae karaoaki inanon ana tembora Ana Ekaretia Iesu Kristo ibukiia Aika Itiaki ni Boong aika Kaitira” (“Te Mwakuri ni Kamaiu,” Ensign, Nob. 1996, 35). Taraa naba Mote 1:39.
A kona aomata ni kabane ni karaoa te bwai teuana.
Beretitenti Dallin H. Oaks e reirei: “N te mwakuri ni kaboakiia maate a mwaiti mwakuri aika a na karaoaki. … Ara mwakuri bwa ti na aki kairoroia aomata ni kabane bwa a na karaoi bwaai ni kabane, ma ti na kaungaia aomata ni kabane bwa a na karaoa te bwai teuana” (“Family History: ‘In Wisdom and in Order,’” Ensign, Tuun 1989, 6).
Kanakoraoan Ara Anga reirei
Kairiia taan reireinaki ake a aki kamatebwai koroboki aika tabu ni mweengaia. Kakoaua bwa kaain te kiraati ni kabane a namakina te mwengaraoi n iri ao ni kaoti aia iango nakon te marooro, riki nakoia naake a aki wawareware ni mweengaia.