dagiti Santo nga agsagsagana nga umakar

Immakar dagiti Santo iti Kirtland, ni Sam Lawlor

Abril 12–18

Doktrina ken Katulagan 37–40

“No Saankayo nga Agkaykaysa Saankayo a Kukua”

Sakbay ti panagplanom no anianto ti aramidem iti klase, nainkararagan nga adalem ti Doktrina ken Katulagan 37–40. Nalabit nga ad-adda nga umawatkanto iti naespirituan a pannarabay iti panagsaganam a mangisuro no umuna nga addaanka kadagiti napapateg a bukod a padas kadagitoy nasantuan a kasuratan.

Isuratmo dagiti Impresionmo

icon iti panagbibinninglay

Yawis ti Panagbibinninglay

Ibilangmo ti panagisurat iti pisarra, Kabayatan iti panangbasak iti Doktrina ken Katulagan 37–40, nariknak nga ibagbaga ti Apo kaniak . Mabalin nga ibinglay dagiti miembro ti klase no kasano nga ileppasda ti binatog. Allukoyem ida a mangibinglay kadagiti bersikulo manipud iti panagbasada kas paset dagiti sungbatda.

icon iti panangisuro

Isuro ti Doktrina

Doktrina ken Katulagan 37–38

Ummongennatayo ti Dios tapno bendisionannatayo.

• No dadduma nalaklaka ti makasursuro manipud kadagiti paltiing iti Doktrina ken Katulagan no panunotentayo ti bagbagitayo nga adda iti lugar dagiti tao a sigud a nakaitedan dagitoy. Tapno matulongan dagiti miembro ti klase a mangaramid iti daytoy kadagiti benneg 37–38, mabalinmo nga awisen ida a mangipapan nga agnanaedda iti Fayette, New York, idi 1831. Mabalin nga ipapan ti maysa a miembro ti klase nga isuna ni Joseph Smith ket ibasana ti benneg 37 kadakuada. Kasano koma ti mabalin a reaksiontayo iti daytoy a bilin? Nalabit a mabalin nga ipapan dagiti miembro ti klase nga addaanda iti maysa a gayyem a saanna a kayat ti makiummong iti Ohio; mabalinda a sukisoken ti benneg 38 para kadagiti pagbatayan a mabalin a mangallukoy iti gayyemda nga agbalin a napudno iti bilin nga agguummong. (No kasapulan, mabalinmo nga iturong ida nangnangruna kadagiti bersikulo 1–4, 11–12, 17–22, and 27–33.) Mabalin pay nga agtallugod dagiti miembro ti klase a mangibinglay no kasano a natulongan ida dagit isu met la a pagbatayan idi kasapulanda ti agtungpal iti maysa a bilin a kasla narigat.

• Saanen a mabilin dagiti Santo iti Ud-udina nga Aldaw nga agguummong babaen ti yaakarda iti maysa a lokasion, ngem agguummongtayo pay laeng kas pamilia, ward, ken stake. Tapno mapaglilinnawagan no kasano a bendisionannatayo daytoy a panagguummong iti agdama, mabalinmo a bingayen ti klase iti dua a grupo. Idawat iti maysa a grupo a mangsukisok iti Doktrina ken Katulagan 38:31–33 ket mangsapul kadagiti bendision a mayaplikar iti panagguummong kas pamilia, ken idawat iti sabali pay a grupo a mangsukisok iti isu met la a binatog ket mangsapul kadagiti bendision a mayaplikar iti panagguummong kas ward ken stake. Kalpasanna mabalinda nga ibinglay dagiti kapanunotanda iti klase. Kasano a mabendisionantayo babaen ti panagguummong a sangkamaysa kas maysa a klase iti Sunday School?

Doktrina ken Katulagan 38:24–27

Nasken nga agkaykaysa dagiti tao ti Dios.

• Dagiti Santo a naguummong iti Ohio ket naggapu manipud nadumaduma a kasasaad, ngem binilin ida ti Apo a mangparmek kadagiti nagdudumaanda ket “agkaykaysa” (bersikulo 27). Apay a no dadduma mapaaytayo a mangibilang kadagiti tao a kas kapadpada? Allukoyem dagiti miembro ti klase a mangutob no kasano ti panangtratoda kadagiti dadduma bayat ti panangbasbasada iti Doktrina ken Katulagan 38:24–27. Ania ti kayat a sawen ti ipateg dagiti kakabsattayo a lallaki ken babbai kas iti bagbagitayo? Apay nga imposible ti agbalin a pudno a tattao ti Dios no saantayo nga agkaykaysa?

• Ti panangbasa iti Doktrina ken Katulagan 38:24–27 ket mabalin a mangiturong iti panaglilinnawag maipapan iti panagkaykaysa kadagiti relasiontayo—kas miembro ti ward, pamilia, ken dadduma pay. Dagiti video “A Friend to All” wenno “Love in Our Hearts” iti ChurchofJesusChrist.org ket mabalin a makatulong. Kas pagarigan, mabalin nga ibinglay dagiti miembro ti klase dagiti palawag wenno karirikna manipud iti video a mangtulong kadakuada a makaawat a nasaysayaat kadagiti pagbatayan kadagiti bersikulo 24–27. Mabalinda pay nga utoben ken ibinglay dagiti kapanunotan maipapan iti maysa a saludsod kas iti “Ania ti maaramidko a mangtulong iti wardmi a makarikna nga ad-adda a nagkaykaysa?”

Doktrina ken Katulagan 38:39; 39–40

Tarigagayan ti Ama nga ited kadatayo dagiti kinabaknang ti kinaagnanayon.

• Ti panagaramid iti maysa a tsart ket mabalin a makatulong kadagiti miembro ti klase tapno mapaglilinnawagan ti Doktrina ken Katulagan 38:39. Iti maysa a kolum, mabalin nga ilista dagiti miembro ti klase ti “kinabaknang ti daga,” wenno dagiti banag a maibilang a napateg ditoy ngem saan nga agpaut agingga iti sumaruno a biag. Iti sabali a kolum, mabalinda nga ilista ti “kinabaknang ti kinaagnanayon,” wenno dagiti banag nga ipateg ti Dios ken makapagpaut iti agnanayon. Ania dagiti padas a nangisuro kadatayo a dagiti kinabakang ti kinaagnanayon ket napatpateg ngem dagiti kinabaknang ti lubong?

• Addaan ni James Covel, kas iti adu kadatayo, kadagiti nalinteg a tarigagay. Ngem ti saanna a panagtungpal iti panangiturong ti Apo ket maysa a napateg a ballaag kadatayo amin. Tapno matulongan dagiti miembro ti klase a masursuruan manipud iti padas ni Covel, mabalinmo nga awisen ida a mangsukisok iti benneg 39 para kadagiti banag nga indawat ti Apo kenkuana nga aramidenna. Mabalin a sukisoken dagiti dadduma dagiti bendision a naikari kenkuana no nagtungpal koma isuna. Mabalinda pay a sukisoken ti benneg 40 a mangtakuat no apay a saan a naawat ni James Covel dagitoy a bendision. Kasano a mabalin a mayaplikar kadatayo ti padasna? Ania dagiti “pakaseknan iti lubong” a no dadduma manglapped kadatayo iti panangawat iti balikas ti Dios “a siraragsak”? (Doktrina ken Katulagan 40:2).

Panangpadur-as iti Panangisurotayo

Saanmo a padasen nga isuro ti amin a banag. “Adu ti paglilinnawagan iti tunggal adalen, ngem saanmo a nasken nga isuro ti amin a banag iti maysa a panagklase tapno masagidmo ti puso ti maysa a tao—masansan nga umdasen ti maysa wenno dua a kangrunaan a punto” (Panangisuro iti Wagas ti Mangisalakan, 7). Ti Espiritu Santo, dagiti masao dagiti miembro ti klase, ken dagiti kapanunotan iti daytoy a balabala ket makatulong kenka a mangammo no sadino ti ipokusmo.