Abril 19–25

Doktrina ken Katulagan 41–44

“Ti Lintegko a Mangituray iti Simbaanko”

Saanyo a kabaelan kas maysa a klase a paglilinnawagan ti tunggal pagbatayan a maisuro iti Doktrina ken Katulagan 41–44. Agkalikagum a manggun-od iti inspirasion a mangtulong kadakayo a pumili kadagiti pagbatayan nga adda pakainaiganna iti klasem.

Isuratmo dagiti Impresionmo

Yawis ti Panagbibinninglay

Idi naipablaak dagiti paltiing iti benneg 42 impablaak ni Joseph Smith a “siraragsak [dagiti Santo] a nangawat” (“Letter to Martin Harris,” Feb. 22, 1831, josephsmithpapers.org). Allukoyem dagiti miembro ti klase a mangibinglay iti ania man a banag manipud iti bukod ken sangapamiliaan a panagadalda iti daytoy a lawas a siraragsak nga inawatda.

Isuro ti Doktrina

Doktrina ken Katulagan 41–42

Dagiti linteg ti Dios ti mangituray iti Simbaanna ken makaituray iti biagtayo.

• Iti Doktrina ken Katulagan 41, tinulongan ti Apo dagiti Santo a nagsagana nga umawat iti lintegna, nga ipalgakna sumagmamano laeng nga aldaw kalpasanna (kitaen iti benneg 42). Kasano a mabalin a natulongan ti paltiing iti benneg 41 dagiti Santo nga umawat iti linteg ti Dios? Tapno matulongan dagiti miembro ti klase a mangsungbat iti daytoy a saludsod, mabalinmo nga awisen ida a mangbasa iti Doktrina ken Katulagan 41:1–6 ken magsapul kadagiti pagbatayan a makatulong kadatayo nga umawat iti linteg ti Dios. Kasano a mayaplikartayo dagitoy a pagbatayan no addaantayo kadagiti gundaway nga umawat iti panangiturong manipud iti Apo?

• Ti balabala iti daytoy a lawas iti Umaykayo, Sumurot Kaniak—para kadagiti Indibidual ken Pamilia ket mangisingasing iti panangbingay iti benneg 42 iti lima a grupo dagiti bersikulo, a ti tunggal maysa ket mangidatag iti napateg a pagbatayan ti ebanghelio. Daytoy a pananggrupo-grupo ket mabalin a mangpalaka iti panaglilinnawag iti daytoy a benneg kas maysa a klase. Kas pagarigan, mabalinmo nga isurat dagiti reperensia iti pisarra ket awisem ti tunggal miembro ti klase a pumili iti maysa a grupo. Pabasam kadagiti miembro ti klase dagiti bersikuloda ket pasapulmo ti maysa a banag a mariknada a napateg kadatayo iti aldawtayo. Kalpasanna mabalinda nga ibinglay dagiti pagarigan manipud iti bukodda a biag nga mangipakpakita no kasano a mabendisionantayo no sakupentayo ti biagtayo babaen kadagitoy a paglintegan.

Doktrina ken Katulagan 41:9–11

Indawat ti Apo kadagiti katulonganna nga agsakripisioda.

• Ni Edward Partridge, ti umuna nga obispo ti naisubli a Simbaan, ket nabilin a mangpanaw iti propesionna ket “ibubosna ti amin a panawenna” nga agserserbi iti takemna. Nupay saan a naidawat daytoy a kasapulan kadatayo, ania ti masarakantayo kadagitoy a bersikulo a mabalin a mayaplikar iti serbisiotayo iti Dios? (Para iti ad-adu pay maipapan ken ni Edward Partridge, kitaen iti “A Bishop unto the Church,” Revelations in Context, 77–83.)

Doktrina ken Katulagan 42:61, 65–68; 43:1–7

Ti paltiing ket mangisangbay iti talna, rag-o, ken agnanayon a biag.

• Kas kadagiti nagkauna a lider iti Simbaan, mabalin nga adda saludsod dagiti miembro ti klasem a kasla “datdatlag” gapu ta agkasapulanda iti pannarabay manipud iti Apo. Mabalinmo nga allukoyen ida a mangisurat iti maysa a saludsodda wenno problema a pakasapulanda iti bukod a paltiing. Ania ti masarakantayo iti Doktrina ken Katulagan 42:61, 65–68 a makatulong kadatayo bayat ti panagkalikagumtayo a manggun-od iti paltiing?

• Tapno matulongan a mangipaawat kadagiti miembro no kasano a mangted ti Dios iti paltiing a mangtarabay iti Simbaanna, mabalinmo nga awisen ida a mangbasa iti Doktrina ken Katulagan 43:1–7. Mabalinda pay a buyaen ti video “Prophets and Revelation—Hearing His Voice” (ChurchofJesusChrist.org).

Doktrina ken Katulagan 43:8–10

Agtataripnongtayo a sangkamaysa tapno “iwanwan ken itandudo ti tunggal maysa.”

• Kasano a mausartayo ti Doktrina ken Katulagan 43:8–10 a mangisuro iti maysa a tao a makarikna a saan a kasapulan ti dumar-ay kadagiti miting iti Simbaan? Makatulong ti listaan iti “Dagiti Nainayon al Resources” a mangipokus iti panaglilinnawag maipapan kadagiti nadiosan a panggep dagiti korum ti priesthood ken Relief Society (mayaplikar met ti listaan kadagiti klase ti Young Women). Mabalin nga ibinglay dagiti miembro ti klase no kasano a nabendisionanda ti pannakiramanda kadagiti korum, Relief Society, ken kadagiti klase iti Simbaan. Ania ti ipasimudaagna a kaipapanan dagiti bersikulo 8–10 maipapan iti no ania ti nasken nga aramidentayo tapno agsagana ken makiraman kadagiti mitingtayo?

  

  Ti panagmimiting iti simbaan ket maysa a wagas tapno “maisuro ken maitandudo ti tunggal maysa.”

Dagiti Nainayon a Resources

No apay a nabukeltayo kadagiti korum ken Relief Society.

Inlawlawag ni Sister Julie B. Beck, sigud a Sapasap a Panguluen ti Relief Society, no apay a binukelnatayo ti Dios kadagiti korum iti priesthood ken Relief Society:

1. “Tapno mabukeltayo iti babaen ti priesthood ken maibatay iti pagtuladan ti priesthood.”

2. “Tapno ipamaysa dagiti annak a lallaki ken babbai ti Nailangitan nga Ama iti aramid ti pannakaisalakan ken tapno iraman ida iti daytoy. Nabukel a panagbalin nga adalan dagiti korum ken Relief Society nga addaan iti pagrebbengan a mangtulong iti aramid ti Ama a mangipatungpal iti agnanayon a biag para kadagiti annakna.”

3. “Tapno mangtulong kadagiti bishop a mangimaton a nasayaat iti pagidulinan ti Apo. Mairaman iti pagidulinan ti Apo ti ‘panawen, talento, panangngaasi, material, ken dagiti pakaseknan iti kuarta’ dagiti miembro ti Simbaan [Handbook 2: Administering the Church, 6.1.3, ChurchofJesusChrist.org]. Nasken a mausar dagiti talento dagiti Santo a pangtulong a mangaywan kadagiti nakurapay ken agkasapulan ken mangbangon iti pagarian ti Apo.”

4. “Tapno mangipaay iti pannakasaluad ken pagkamangan dagiti annak ti Nailangitan nga Ama ken dagiti pamiliada kadagiti ud-udina nga aldaw.”

5. “Tapno mangpapigsa ken mangsuporta kadatayo kadagiti akem ken pagrebbengantayo iti pamilia kas annak a lallaki ken annak a babbai ti Dios.” (“Why We Are Organized into Quorums and Relief Societies” [Brigham Young University devotional, Ene. 17, 2012], speeches.byu.edu.)

Panangpadur-as iti Panangisurotayo

Awis. “Imbes a kanayon a mangted kadagiti awis nga agaramid iti maysa a maitudo a banag, ibilang ti panangawis kadagiti agad-adal a mangpanunot kadagiti bukodda a wagas a mangyaplikar no ania ti nasursuroda” (Panangisuro iti Wagas ti Mangisalakan, 35).