Abril 5–Abril 11

Doktrina ken Katulagan 30–36

“Naawaganka a Mangikasaba iti Ebangheliok”

Bayat ti panangbasam iti Doktrina ken Katulagan 30–36, ania dagiti mensahe a marikna nga adda pakainaiganna kadagiti sursuruam? Ania ti mangtulongto a mangparegta kadakuada a mangibinglay iti ebanghelio kadagiti dadduma?

Isuratmo dagiti Impresionmo

Yawis ti Panagbibinninglay

Nalabit a makaibinglay dagiti miembro ti klase iti maysa a banag a nabasada iti Doktrina ken Katulagan 30–36 a mangparegta kadakuada a mangibinglay iti ebanghelio.

Isuro ti Doktrina

Doktrina ken Katulagan 30–36

Naawagantayo a mangikasaba iti ebanghelio ni Jesucristo.

• Ti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ket mangisingasing iti panangsukisok iti Doktrina ken Katulagan 30–36 no ania ti idawat ti Apo kadagiti missionary ken no ania ti ikarina kadakuada. Mabalin nga iburay dagiti miembro ti klase no ania ti nasarakanda. (Kitaen, kas pagarigan, iti Doktrina ken Katulagan 30:8; 31:3–5; 32:1, 5; 35:24.) Nalabit a mabalinmo nga awisen ida a suratan ti maysa a tao nga agdama nga agserserbi wenno agsagsagana nga agserbi iti mision ket iramanmo ti sumagmamano a pangiturong ken kari ti Apo.

• Isurom kadi dagiti agtutubo nga agsagsagana nga agserbi kas missionary? No kasta, mabalinmo nga awisen ti tunggal miembro ti klase a mangsukisok iti maysa a benneg manipud iti Doktrina ken Katulagan 30–36 ket mangsapul iti maysa a banag a mangparegta kadakuada nga agserbi. Mabalinmo nga ilawlawag a dagiti missionary a nadakamat kadagitoy a benneg ket kabarbaro ken awan padasda iti Simbaan. Ania ti nangpaikari kadakuada a mangibinglay iti ebanghelio? Mabalinmo met nga ipabuya ti maysa kadagiti video a nailista iti “Dagiti Nainayon a Resources.” Ania ti isingasing dagitoy a video maipapan no apay a nasken nga agserbitayo kas missionary ken no kasano a makapagsaganatayo?

• Saan nga amin ket addaan iti gundaway nga agserbi iti full-time a mision, ngem mabalintayo nga awisen dagiti dadduma nga umay ken ni Cristo ken dumngeg iti mensahe ti Panagungar. Mabalin nga agaramid dagiti miembro ti klase iti listaan dagiti nadumaduma a wagas a mabalinda nga “ungapen dagiti ngiwat[da]” (Doktrina ken Katulagan 33:8–10). Ania dagiti sumagmamano a gagangay a gundaway nga adda kadatayo tapno mangibinglay kadagiti pammatitayo kadagiti dadduma? Ania a balakad iti Doktrina ken Katulagan 30–36 ti mayaplikar iti panangibinglay iti ebanghelio kadagitoy a wagas? Ibilang ti panangidawat iti sumagmamano a miembro ti klase nga addaan kadagiti nasayaat a padas iti panangibinglay iti ebanghelio tapno mangibinglay kadagiti kapanunotanda ken mangsungbat kadagiti saludsod a mabalin nga adda iti klase.

• Inkari ti Apo kada Ezra Thayer ken Northrop Sweet a no ungapenda dagiti ngiwatda a mangibinglay iti ebanghelio, “agbalin[da] a kas daydi nagkauna a Nephi” (Doktrina ken Katulagan 33:8). Ania dagiti kababalin nga adda ken ni Nephi a mabalin a mainaig iti panangibinglay iti ebanghelio? (kitaen, kas pagarigan, iti 1 Nephi 3:7; 4:6; 10:17; 17:15; 2 Nephi 1:27–28). Kasano a makatulong kadatayo dagitoy a kababalin kadagiti panagkagumaantayo a mangibinglay iti ebanghelio?

  

  Idawat ti Apo kadatayo a mangikasaba iti ebanghelio iti aldawtayo kas iti nagkauna a Simbaan.

Doktrina ken Katulagan 32–33; 35

Isagananatayo ti Apo para iti aramid a kayatna nga aramidentayo.

• Kasano a matulongannatayo ti Apo a mangaramid iti trabahona? Ti panaglilinnawag maipapan iti biag dagiti tao a nailadawan iti Doktrina ken Katulagan 32–33, 35 ket mabalin a nasayaat a pangirugi a lugar para iti panagutob kadagitoy a padas. Kas pagarigan, mabalinmo nga ibinglay iti klase ti pakaammuan ni Ezra Thayer maipapan iti parmatana iti “Dagiti Nainayon a Resources” ket kalpasanna awisem dagiti miembro ti klase a mangbasa iti Doktrina ken Katulagan 33:1–13, a paset ti paltiing ken ni Ezra Thayer. Kasano nga isagsagana ti Apo ni Ezra para iti aramid a kayat ti Apo nga aramidenna? (kitaen iti Doktrina ken Katulagan 33:2). Mabalinmo pay nga idawat iti miembro ti klase a mangibinglay iti sumagmamano nga impormasion iti nagtaudan maipapan iti pagnaigan da Parley P. Pratt ken Sidney Rigdon (kitaen iti “Voices of the Restoration: Early Convert Testimonies” iti Umaykayo, Sumurot Kaniak—Para kadagiti Indibidual ken Pamilia). Kasano a nangpapigsa iti Simbaan daytoy a pagnaigan? Ania dagiti pakakitaan a makitatayo nga adda ti ima ti Dios iti biag dagitoy a lallaki? Nalabit a mabalin nga ibinglay dagiti miembro ti klase dagiti padas a nakatulong kadakuada a mangkita nga ammo ti Apo ida iti isu met la a wagas.

Dagiti Nainayon a Resources

Parmata ni Ezra Thayer.

Insurat ni Ezra Thayer a naminsan sakbay a nabuniagan, naaddaan iti parmata nga “immasideg kaniak ti maysa a lalaki a nangyeg kaniak iti nalukot a papel ket inyawatna kaniak, ken maysa pay a trumpeta ket imbagana kaniak a [patokarek] daytoy. Imbagak kenkuana a diak pay pulos [nangpatokar] iti ania man iti biagko. Kinunana a kabaelam a [patokaren] daytoy, padasem. … Daytoy ti kapintasan nga ayug a nangngegak” (“Revelation, October 1830–B, Revelation Book 1,” historical introduction, josephsmithpapers.org). Idi agangay nga inawat ni Joseph Smith ti maysa a paltiing para kada Ezra Thayer ken Northrop Sweet, a nakarekord itan kas Doktrina ken Katulagan 33, inyulog ni Ezra ti platiing kas nalukot a papel iti parmatana.

Panangpadur-as iti Panangisurotayo

Yalluloy ti naraem ken makaay-ayo nga aglawlaw. “Tulongam a maawatan dagiti miembro ti klasem a ti tunggal maysa kadakuada ket mangaring iti espiritu ti klase. Allukoyem ida a tulongandaka a mangipasdek iti silulukat, naayat, ken nadayaw nga aglawlaw tapno marikna ti tunggal maysa a natalgedda a mangibinglay kadagiti padas, saludsod, ken pammaneknekda” (Panangisuro iti Wagas ti Mangisalakan, 15).