Abril 26–Mayo 2

Doktrina ken Katulagan 45

“Matungpalton dagiti Kari”

Bayat ti panagadalmo iti Doktrina ken Katulagan 45, panunotem dagiti bersikulo, adaw manipud kadagiti lider ti Simbaan, padas, saludsod, ken dadduma pay a resources a mabalinmo nga usaren a mangisuro iti doktrina. Bayat ti panangisurom, awisem dagiti miembro ti klase a mangisurat kadagiti parikna nga umawat ken mangaramid iti plano nga agtignay kadagitoy.

Isuratmo dagiti Impresionmo

Yawis ti Panagbibinninglay

Mabalin nga isurat dagiti miembro ti klase iti panid ti papel ti numero ti bersikulo manipud iti Doktrina ken Katulagan 45 a nangparegta kadakuada. Kalpasanna mabalinmo a kolektaen dagiti papel, pumidut iti sumagmamano a dimo pilpilien, ken awisem dagiti miembro ti klase a nangisurat kadagitoy a basaenda dagiti bersikulo iti klase ket ibinglayda no apay a pinilida dagitoy. Allukoyem dagiti dadduma pay a mangibinglay kadagiti nalawag a pannakaammo ken pannakaawatda [insights].

Isuro ti Doktrina

Doktrina ken Katulagan 45:1–5

Ni Jesucristo ti Mangibabaet kadatayo iti Ama.

• Mailadawan kadi ti maysa a tao iti klasem no ania ti aramiden ti mangibabaet? Mabalin a makatulong a kitaen ti kayat a sawen ti mangibabaet iti maysa a diksionario. Iti daytoy a pannakaawat, mabalin a basaen dagiti miembro ti klase ti Doktrina ken Katulagan 45:3–5 iti sagpaparis. Mabalinda nga ibinglay iti tunggal maysa dagiti ania man a balikas wenno ragup dagiti balikas manipud kadagitoy a bersikulo a makatulong kadakuada a makaawat iti akem ni Jesucristo kas Mangibabaet kadatayo iti Ama. (Kitaen met iti 2 Nephi 2:8–9; Mosiah 15:7–9; Moroni 7:27–28; Doktrina ken Katulagan 29:5; 62:1.) Ibilang ti panangidawat kadagiti miembro ti klase a mangibinglay kadagiti riknada maipapan iti Mangisalakan iti panagbalinna a Mangibabaettayo.

Doktrina ken Katulagan 45:11–75

Saan a nasken nga agbutengtayo iti Maikadua a Yaay.

• Kasano a matulongam dagiti miembro ti klase a mangkita kadagiti napasnek a ballaag ken manamnama a kari iti benneg 45? Kas pagarigan, mabalinmo nga isurat iti pisarra dagiti paulo ti Padto ken Naikari a Bendision, ken mabalin nga isurat dagiti miembro ti klase iti baba dagitoy a paulo dagiti pannursuro a masarakanda iti Doktrina ken Katulagan 45:11–75. Apay a kayat ti Apo a maammuantayo dagitoy a banag a nasapsapa? Ania ti maaramidtayo tapno makaawat kadagiti naikari a bendision?

• Nalabit a mabalin nga ibinglay dagiti miembro ti klase ti balakad iti tunggal maysa maipapan no kasano ti agbalin nga optimistiko ken mangnamnama no maipasangotayo kadagiti didigra kas naipadto para iti aldawtayo (kas kadagiti nailadawan iti Doktrina ken Katulagan 45:11–75). Tapno matulongan dagiti miembro ti klase a mangpadpadaan iti Maikadua a Yaay nga addaan iti pammati imbes nga agbuteng, mabalinmo nga ipabuya ti video “Men’s Hearts Shall Fail Them” (ChurchofJesusChrist.org). Iti ania a kaipapanan a pakaupayan ti puspuso dagiti tao kadakuada iti panawentayo? (kitaen iti bersikulo 26). Ania a balakad ti inted ni Presidente Nelson iti daytoy a video a makatulong kadatayo a mangsango kadagiti nakabutbuteng a kasasaad nga addaan iti talna?

Doktrina ken Katulagan 45:31–32

“Agtakderkayo kadagiti nasantuan a lugar,” ket saankayo nga aggaraw.

• Mabalin nga agtallugod dagiti miembro ti klase a mangibinglay kadagiti nalawag a pannakaammo ken pannakaawat maipapan no kasano ti panangikarigatanda nga “agtakder kadagiti nasantuan a lugar,” kas iti imbalakad ti Apo iti Doktrina ken Katulagan 45:31–32. Kasano a makaparnuaytayo kadagiti nasantuan a lugar iti biagtayo? Ti palawag iti “Dagiti Nainayon a Resources” ken ti video “Stand Ye in Holy Places—Bloom Where You’re Planted” (ChurchofJesusChrist.org) mabalin a mangnayon kadagiti nalawag a pannakaammo ken pannakaawat iti daytoy a panaglilinnawag.

  

  Pangngarig dagiti Sangapulo a Babbalasang, ni Dan Burr

Dagiti Nainayon a Resources

“Agtakder kadagiti nasantuan a lugar.”

Insuro ni Sister Ann M. Dibb, sigud a miembro ti Young Women General Presidency, a ti pangiturong nga agtakder iti nasantuan a lugar ket saan nga aggaraw ket “mangilawlawag no kasano a maawattayo ti salaknib, pigsa, ken kappia kadagiti nariribuk a panawen.” Kalpasan ti pannakaammona a mabalin nga iraman kadagitoy nasantuan a lugar dagiti templo, kapilia, ken pagtaengantayo, kinunana a “mabalin ti tunggal maysa kadatayo ti mangsapul iti ad-adu pay a lugar.” Intuloyna:

“Mabalin nga umuna nga ibilangtayo ti balikas a lugar kas pisikal nga aglawlaw wenno lokasion iti heograpia. Nupay kasta, ti lugar mabalin a ‘naidumduma a kasasaad, posision, kasasaad ti panunot’ [Merriam-Webster.com Dictionary, “place,” merriam-webster.com]. Kaipapanan daytoy nasantuan a lugar mabalin nga iramanna pay ti dagiti kanito iti panawen—dagiti kanito no agpaneknek ti Espiritu Santo kadatayo, dagiti kanito no mariknatayo ti ayat ti Nailangitan nga Ama, wenno dagiti kanito no umawattayo iti sungbat kadagiti kararagtayo. Nangruna pay, mamatiak iti ania man nga oras nga addaankayo iti tured a mangitakder no ania ti umno, nangruna kadagiti kasasaad nga awan ti agtallugod a mangaramid iti kasta, mangparparnuayka iti nasantuan a lugar” (“Your Holy Places,” Ensign wenno Liahona, Mayo 2013, 115).

Panangpadur-as iti Panangisurotayo

Agbalin a sibibiag a pammaneknek. Bayat ti panagtulnogmo iti doktrina nga isursurom, kabaelamto ti mangiburay iti nabileg, bukod a pammaneknek a pudno. Ti Espiritu Santo ti mangipatalgedto iti pammaneknekmo iti puspuso dagiti miembro ti klasem. Ibilangmo dagiti pagbatayan nga isuromto iti daytoy a lawas ken kadagiti umay a lawas. Kasano a matungpalmo dagitoy a naan-anay? (Kitaen iti Panangisuro iti Wagas ti Mangisalakan, 13–14.)