tattao nga agmimiting iti libtong

Ti Miting iti Kampo, ni Worthington Whittredge

Mayo 3–9

Doktrina ken Katulagan 46–48

“Sapulenyo a Sipapasnek dagiti Kasayaatan a Sagut”

Bayat ti panangbasam iti Doktrina ken Katulagan 46–48, mabalin nga ipaneknek ti Espiritu Santo kenka maipapan kadagiti kinapudno kadagitoy a benneg. Ti panangisurat ken panangrebyu kadagiti impresion ket makatulong kenka a mangsapul kadagiti wagas tapno matulongan dagiti miembro ti klase a mangtakuat kadagitoy isu met la a kinapudno.

Isuratmo dagiti Impresionmo

icon iti panagbibinninglay

Yawis ti Panagbibinninglay

Mabalin a makatulong kadagiti miembro ti klase a mangibinglay, sagpaminsan, no kumustan ti bukod ken sangapamiliaan a panagadalda iti nasantuan a kasuratan. Kas pagarigan, no ibinglay dagiti miembro ti klase ti maysa a nalawag a pannakaammo ken pannakaawat maipapan iti maysa a banag a natakuatanda wenno ti miembro ti pamilia iti daytoy a lawas, mabalinmo a saludsoden kadakuada no ania ti ar-aramidenda kabayatan ti panagadalda a nangiparikna kadagita a nalawag a pannakaammo ken pannakaawat [insights].

icon iti panangisuro

Isuro ti Doktrina

Doktrina ken Katulagan 46:1–7

Nasken a pasangbayentayo amin iti Simbaan ni Jesucristo.

• Para iti adu, no kasano ken no ania ti mariknada kadagiti miting ti Simbaan ket napateg a makaimpluensia iti aktibidadda iti Simbaan. Dagiti pangiturong ti Apo iti Doktrina ken Katulagan 46:1–7 ket makatulong kadagiti miembro iti wardyo a mangparnuay iti naragragsak a panangpasangbay, napatpateg a padas iti panagdaydayaw para iti tunggal maysa ken para kadagiti sangaili. Mabalin a sukisoken dagiti miembro ti klase dagitoy a bersikulo, nga agsapsapul kadagiti pagbatayan a mainaig kadagiti miting ti Simbaan ket ilistada iti pisarra no ania ti nasarakanda. Para iti tunggal aytem iti listaan, mabalin a paglilinnawagan ti klase no ania dagiti pagarigan a mangipakita iti dayta a pagbatayan.

• Kasano a makatulong dagiti pangiturong ti Apo iti Doktrina ken Katulagan 46 kadagiti miembro ti klase a makitada dagiti miting ti Simbaan kas maysa a gundaway a mangrikna iti Espiritu Santo? Mabalinmo nga awisen dagiti miembro ti klase a mangsukisok iti Doktrina ken Katulagan 46:2 ken paglilinnawagan no nakakitadan kadagiti lider ken mannursuro a mangidaulo kadagiti miting babaen ti Espiritu Santo. Ania ti akem dagiti dumardar-ay kadagiti miting? Ibilangmo ti panangawis kadagiti miembro ti klase a mangibinglay kadagiti panawen idi nariknada ti miting nga inturong ken tinarabay ti Espiritu Santo.

• Nalabit a mabalinmo nga awisen ti sumagmamano a miembro ti klase a mangibinglay kadagiti padasda idi immuna a dimmar-ayda iti miting ti Ti Simbaan ni Jesucristo dagiti Santo iti Ud-udina nga Aldaw. Ania ti nangtulong kadakuada a nakarikna a napasangbayda? Ania a balakad ti itedda kadagiti dadduma pay a miembro tapno makatulong a mangaramid kadagiti miting ti Simbaan nga ad-adda pay a managpasangbay? Kasano a mayaplikartayo ti balakad ti Apo a masarakan iti Doktrina ken Katulagan 46:1–7? Bay-an nga agsanay dagiti miembro ti klase no ania ti ibagada no makitada ti maysa a ganggannaet a magna nga agturong iti kapilia iti umuna a gundaway.

• Ti maysa a himno kas iti “’Tis Sweet to Sing the Matchless Love” (Hymns, no. 176 wenno 177) ket makatulong kadagiti miembro ti klase a mangpanunot ken mangilawlawag no kasano a mapagbalin nga ad-adda a managpasangbay ken makaitag-ay dagiti mitingtayo iti Simbaan. Nalabit a mabalin nga aggigiddan nga agkanta dagiti miembro ti klase ken mangibinglay kadagiti kapanunotan manipud kadagiti balikas ti kanta maipapan no kasano a matulongam dagiti dadduma a makarikna iti ayat ti Dios iti simbaan.

  Dagiti miembro Iti simbaan

  Insuro ti Apo a mapasangbay ti amin iti Simbaanna.

Doktrina ken Katulagan 46:7–33

Mangted ti Nailangitan nga Ama kadagiti naespirituan a sagut para iti pagimbagan dagiti annakna.

• Sititibker a namati dagiti nagkauna a Santo kadagiti parangarang ti Espiritu Santo. Kasano a matulongam dagiti miembro ti klasem a mangpapigsa iti pammatida a dagitoy a sagut ket mabalin a maiparangarang iti biagtayo iti agdama? Mabalinmo nga irugi babaen ti panangawis kadagiti miembro ti klase a mangbasa iti Doktrina ken Katulagan 46:7–33 iti sagpaparis wenno babassit a grupo. Kiddawem kadakuada a mangsapul iti uray lima laeng a naespirituan a sagut ket paglilinnawagan dagiti wagas a nakitadan dagita a sagut a naiparangarang iti biagda wenno iti biag ti maysa a tao nga am-ammoda—agraman dagiti tao iti klase. Ania ti nasarakanda a mabalinda nga ibinglay iti klase a mangpapigsa iti pammatida kadagitoy a sagut?

• Impakdaar ti Apo a mairanud dagiti napudno kadagiti sagut ti Espiritu ken “saan a para iti tanda” (bersikulo 9). Nalabit a mabalin a paglilinnawagan dagiti miembro ti klase no kasano a mairanud dagiti napudno kadagiti naespirituan a sagut. Kasano a makatulong dagitoy a sagut kadagiti agtarigagay a manggun-od iti pammaneknekda iti ebanghelio.

• Sumagmamano a tao ti agayat iti Dios ken mangpadas a mangtungpal kadagiti bilinna ngem saanda a marikna a napadasandan dagiti ania man a sagut ti Espiritu. Kasano a makatulong ti balakad iti Doktrina ken Katulagan 46:7–33 ?

Doktrina ken Katulagan 47

Maiturongnatayo ti Espiritu Santo bayat ti panangipatungpaltayo kadagiti takemtayo.

• Adu a tao ti mabalin a manginaig iti no ania ti narikna ni John Whitmer idi tinarigagayanna ti pammatalged a naggapu iti Dios ti takemna. Mabalin nga ibinglay dagiti miembro ti klase dagiti isu met la a padas a napasaranda. Ania ti masarakantayo iti Doktrina ken Katulagan 47 a nakaited koma ken ni John Whitmer iti panagtalek iti naidutok nga aramidenna?

Panangpadur-as iti Panangisurotayo

Ti akemmo kas maysa a mannursuro. Ti panangisuro ket ad-adda pay ngem iti panangidatag laeng iti impormasion nga insaganam. Maibilang iti dadduma pay a banag, iramanna ti panangparnuay iti maysa nga aglawlaw a pakasursuruan ken pakatakuatan dagiti miembro ti klase kadagiti kinapudno para iti bagbagida ken pangibinglayanda no ania ti nasursuroda kadagiti dadduma. Kas pagarigan, iti intero nga adalen, kiddawem kadagiti miembro ti klase maipapan iti padasda iti panagadal kadagiti nasantuan a kasuratan iti pagtaengan.