Independence, Missouri, ni Al Rounds

Mayo 24–30

Doktrina ken Katulagan 58–59

“Siaanep a Makiraman iti Nasayaat nga Aramid”

Kalpasan ti panangbasam iti Doktrina ken Katulagan 58–59, ibilangmo dagiti sumaganad a saludsod: Ania ti mariknam a makaparegta nga ibinglaymo iti klasem? Ania ti namnamaem a matakuatandanto? Kasano a matulongam ida a mangtakuat kadagitoy a banag?

Isuratmo dagiti Impresionmo

Yawis ti Panagbibinninglay

Tapno maguyugoy dagiti miembro ti klase a mangibinglay no ania ti nasursuroda iti panagadalda iti nasantuan a kasuratan, mabalinmo nga isurat dagiti sumaganad a saludsod iti pisarra: Ania ti nasursurotayo? Kasano nga agbiagtayonto iti no ania ti nasursurotayo? Mabalin nga ilista dagiti miembro ti klase iti baba ti umuna a saludsod a nasarakanda iti Doktrina ken Katulagan 58–59. Kalpasanna mabalinda a bubosen iti sumagmamano a minuto a panangilawlawag dagiti kapanunotan para iti panagbiag babaen kadagita a kinapudno ken panagsurat kadagiti kapanunotanda iti baba ti maikadua a saludsod.

Isuro ti Doktrina

Doktrina ken Katulagan 58:1–5, 26–33

Dumteng dagiti parabur a mayannurot iti panagoras ti Dios ken ti kinapasnektayo.

• Isuro tiDoktrina ken Katulagan 58 dagiti kinapudno a makaisangbay iti talna kadagiti panawen ti pannubok. Mabalin a natakuatan dagiti miembro ti klase ti sumagmamano kadagitoy a kinapudno bayat ti panagadalda iti daytoy a benneg; awisem ida a mangibinglay no ania ti nasarakanda. Wenno mabalinda a sukisoken dagiti bersikulo 1–5, 26–33 iti klase, saggaysa wenno kada grupo, ti maysa a banag a mabalin a makatulong iti maysa a tao nga agsagsagaba iti rigat wenno asino man nga agur-uray iti naikari a bendision. Kalpasan ti panangiburay iti no ania ti nasarakanda, nalabit mabalin nga ibinglay ti sumagmamano a miembro ti klase a dagiti padas wenno dadduma pay a nasantuan a kasuratan a nangipatalged kadagiti kinapudno kadagitoy a bersikulo.

• Kas paset ti panaglilinnawag iti daytoy a pagbatayan, mabalinmo nga ipakita ti video “Hope Ya Know, We Had a Hard Time” (ChurchofJesusChrist.org) ket paglilinnawagan no ania ti mabalin nga aramidentayo tapno makatulong kadagiti maipaspasango kadagiti narigat a panawen. Makatulong pay ti adaw ni Sister Linda S. Reeves iti “Dagiti Nainayon a Resources” iti panangilawlawagmo. Kasano nga aringan dagiti balikas ni Sister Reeve ti wagas a panangkitatayo kadagiti pannuboktayo?

Doktrina ken Katulagan 58:26–29

Mabalin nga “agipatungpal[tayo] iti adu a kinalinteg” iti “bukod[tayo] a pagayatan.”

• Ania ti nasursuro dagiti miembro ti klase manipud iti panagadalda iti Doktrina ken Katulagan 58:26–29 iti daytoy a lawas? Nalabit a mabalinmo a bingayen ti klase iti kada grupo ket awisem dagiti miembro ti klase a mangilawlawag iti grupoda dagiti ragup ti balikas a masarakanda a napateg kadagitoy a bersikulo. Kasano a paregtaendatayo dagitoy a bersikulo nga “agipatungpaltayo iti adu a kinalinteg”? (bersikulo 27). Apay a kayat ti Apo a saantayo a “mapilpilit iti amin a banag”? (bersikulo 26). Ania ti isingasing dagitoy a bersikulo maipapan no ania ti tarigagayan ti Apo a pagbalinantayo?

Doktrina ken Katulagan 59:9–19

Ti Sabbath ti aldaw ti Apo.

• Tapno matulongan ti klasem nga agsukisok no ania ti insuro ti Apo kadagiti nagkauna a Santo iti Missouri maipapan iti Sabbath, mabalinmo nga awisen ida a mangsukisok iti Doktrina ken Katulagan 59: 9–19 ket ilistam iti pisarra no ania ti isuro kadatayo ti tunggal bersikulo maipapan iti Sabbath. Mabalin pay nga ibinglay dagiti miembro ti klase no kasano a pimmigsa ti pammaneknekda iti aldaw ti Sabbath bayat ti panangngilinda a nasantuan iti aldaw ti Sabbath. Sabbath.ChurchofJesusChrist.org addaan iti sumagmamano a video a makatulong a mangirugi iti panaglilinnawag.

• Iti Doktrina ken Katulagan 59, insuro ti Apo maipapan iti aldaw ti Sabbath nga inusar dagiti balikas kas “panagragsak,” “narag-o,” ken “naragsak” dagiti (bersikulo 14–15). Mabalin a saraken dagiti miembro ti klase dagiti balikas kas kadagitoy kadagiti bersikulo 9–19. Kalpasanna mabalin nga iburay dagiti miembro ti klase no ania ti aramidenda tapno mapagbalin a naragsak ti aldaw ti Sabbath. Kasano a mabalin nga usarentayo dagitoy a bersikulo a mangisuro kadagiti dadduma no apay a dayawentayo ti aldaw ti Sabbath?

• Kasta met a mabalin a gundaway daytoy a panaglilinnawag para kadagiti miembro ti klase a mangibinglay kadagiti kapanunotan maipapan no kasano nga usarenda ken dagiti pamiliada ti Sabbath a mangaramid kadagiti pagtaenganda a sentro a pagsursuruanda iti ebanghelio. Awisem ida a mangibinglay no kasano a makatulong kadakuada dagiti panagkagumaanda a makatulong kadakuada nga agtalinaed nga “ad-adda … nga awan mulitna iti lubong” (bersikulo 9).

  

  Ti sakramento ket napateg a paset iti panagdayaw iti Sabbath.

Dagiti Nainayon a Resources

Ti panagtutuoktayo ti mabalin a mangiwanwan kadatayo iti Mangisalakan.

Insuro ni Linda S. Reeves, sigud a miembro ti Sapasap a Panguluen ti Relief Society:

“Palugodannatayo ti Apo a mapadas ken masuboktayo, no dadduma iti kadakkelan a kabaelantayo. Nakitatayon ti biag dagiti ipatpategtayo—ket nalabit ti bukodtayo a biag —nauram iti daga ken nasdaawtayo no apay a pinalugodan ti managayat ken manangipateg a Nailangitan nga Ama a mapasamak dagiti kakasta a banag. Ngem dinatayo panawan iti tapok; nakatakder Isuna a nakatanggaya dagiti takiagna, a sigagagar nga aw-awisennatayo nga umasideg Kenkuana. … 

“… Aggagar a mangtulong kadatayo, mangliwliwa kadatayo, ket mangep-ep iti saemtayo no agpannuraytayo iti bileg ti Pannubbot ken dayawentayo dagiti katulagantayo. Dagiti pannubok ken panagtutuok a mapadasantayo ket mabalin a mismo a banag a mangiwanwan kadatayo nga umasideg Kenkuana ket kumpet kadagiti katulagantayo tapno makapagsublitayo iti sidongna ket umawat iti amin nga adda iti Ama” (“Claim the Blessings of Your Covenants,” Ensign wenno Liahona, Nob. 2013, 119–20).

Panangpadur-as iti Panangisurotayo

Siguraduem a mangisursuroka iti pudno a doktrina. “Agtultuloy a saludsodem iti bagim, ‘Kasano a matulonganto ti isursurok dagiti miembro ti klasek a mangpatibker iti pammatida ken ni Cristo, agbabawi, agaramid ken agtungpal kadagiti katulagan iti Dios, ken umawat iti Espiritu Santo?’” (Panangisuro iti Wagas ti Mangisalakan, 20).