mannalon nga adda bakana

Umuna a Muriski, ni James Taylor Harwood

Mayo 17–23

Doktrina ken Katulagan 51–57

“Napudno, Nalinteg, ken Masirib a Mangaywan”

No dadduma mabalin nga umay ti pammaregta maipapan iti no ania ti isuro bayat ti panangilawlawagmo kadagiti nasantuan a kasuratan iti maysa a miembro ti pamilia wenno gayyem.

Isuratmo dagiti Impresionmo

icon iti panagbibinninglay

Yawis ti Panagbibinninglay

Ibilang ti panangiburay kadagitoy a balikas manipud ken ni Elder Quentin L. Cook: “Namnamaek nga irebyunto ti tunggal maysa kadatayo kas indibidual ken kas pamilia dagiti panagaywan a pagrebbengan ken sungsungbatantayo (“Stewardship—a Sacred Trust,” Ensign wenno Liahona, Nob. 2009, 94). Kalpasanna mabalinmo nga idawat kadagiti miembro ti klase no ania ti nasursuroda manipud kadagiti benneg 51–57 maipapan kadagiti panangaywanda.

icon iti panangisuro

Isuro ti Doktrina

Doktrina ken Katulagan 51:9, 15–20

Kayat ti Apo nga agbalintayo a napudno, nalinteg, ken masirib nga agay-aywan.

• Kasano a matulongamto dagiti miembro ti klase a mangibilang no kasano a mayaplikar dagiti balikas ti Apo iti benneg 51 kadakuada? Mabalinmo nga isurat iti pisarra Ania ti intalek ti Apo kaniak? ket awisem dagiti miembro ti klase a mangilista kadagiti sungbatda (kitaen iti “Dagiti Nainayon a Resources” para kadagiti kapanunotan). Kalpasanna mabalinda a sukisoken dagiti pagbatayan kadagiti bersikulo 9, 15–20 a mangisuro kadakuada no kasano ti agbalin a nasaysayaat nga agay-aywan kadagiti banag iti listaanda. Wenno mabalin nga ipokusmo dagiti balikas a “napudno,” “nalinteg,” ken “masirib” iti bersikulo 19, nga ilawlawag no kasano a maiwanwannatayo ti tunggal maysa kadagitoy a balikas iti panangipatungpal kadagiti panagaywantayo. No kasapulan, aggigiddan a mangrebyu iti kaipapanan ti “Agaywan, Panagaywan” iti Pangiwanwan iti Nasantuan a Kasuratan (scriptures.ChurchofJesusChrist.org).

berde a kataltalonan

Indonar dagiti miembro nga agtungtungpal iti linteg ti pannangted-pateg ti amin nga adda kadakuada iti Simbaan.

Doktrina ken Katulagan 52:10; 53:3; 55:1–3

Maawat ti sagut ti Espiritu Santo babaen iti panangipatay kadagiti ima.

• Dakamaten ti adu a bersikulo kadagitoy a paltiing ti panangawat iti Espiritu Santo babaen ti panangipatay kadagiti dakulap. No ti panaglilinnawag maipapan iti daytoy a topiko ket napateg iti klasem, mabalinmo a saludsoden kadagiti miembro ti klase no ania ti masursuroda manipud iti Doktrina ken Katulagan 52:10; 53:3; 55:1–3 maipapan iti sagut ti Espiritu Santo. Para iti ad-adu pay iti daytoy a topiko, kitaen iti Dagiti Aramid 8:14–17; 19:1–6. Nalabit a mabalin nga isarita dagiti miembro ti klase maipapan iti padas iti yaawat iti sagut ti Espiritu Santo wenno no ania ti mabalinda nga aramiden tapno agtultuloy a mangawat iti impluensiana iti biagda.

Doktrina ken Katulagan 52:9–11, 22–27

Maibinglaytayo ti ebanghelio ni Jesucristo sadino man ti ayantayo.

• Idi nangibaon ti Apo ti sumagmamano a lider iti Simbaan iti Missouri, imbagana kadakuada a mangusar iti oras a nabubos iti panagdaliasat ket “mangasaba iti dalan” (dagiti bersikulo 25–27). Ti panagbasa iti Doktrina ken Katulagan 52:9–11, 22–27 ket makaiturong iti pagsasaritaan maipapan no kasano a makaibinglaytayo iti ebanghelio “iti dalan,” wenno kabayatan ti gagangay a turongen ti biagtayo. Mabalin nga isarita dagiti miembro ti klase no kasano nga aramidenda ti panangibinglay iti ebanghelio a gagangay a paset ti biagda.

Doktrina ken Katulagan 52:14–19

Inted ti Dios ti pagtuladan para iti panangliklik iti panangallilaw.

• Tapno mayam-ammo ti pagtuladan ti Apo iti Doktrina ken Katulagan 52:14–19, mabalinmo nga ibinglay dagiti pagarigan dagiti dadduma pay a pagtuladan a mabalin a pamiliar kadagiti miembro ti klase, kas kadagiti pagtuladan para iti panangbangon kadagiti banag wenno pagtuladan ti ugali. Mabalin nga addaan dagiti miembro ti klase iti bukodda a pagarigan nga ibinglay. Apay a napateg dagiti pagtuladan? Kasano a mayaplikartayo ti pagtuladan kadagiti bersikulo 14–19 a mangliklik iti pannakaallilaw a masarakantayo iti lubong iti agdama?

Doktrina ken Katulagan 54

Makaasidegak iti Apo no masaktannak gapu kadagiti pili dagiti dadduma.

• Adu kadakami ti nagsagaba iti pannakapaay idi saan a nagtungpal ti tao a nagpannurayanmi kadagiti karina. Daytoy ti napasamak kadagiti Santo iti Colesville, Nueva York, a nangnamnama nga agindeg iti daga ni Leman Copley iti Ohio. Tapno masursuruan manipud iti daytoy a padas, mabalin nga irebyu dagiti miembro ti klase ti paulo iti benneg 54 (kitaen met iti Saints, 1:125–28; “A Bishop unto the Church,” Revelations in Context, 78–79). Mabalinda nga ipapan nga adda maysa a gayyemda kadagiti Santo ti Colesville ket kalpasanna mangsarak iti balakad iti benneg 54 a mabalinda nga ibinglay iti gayyemda. Wenno mabalinda a sukisoken ti paltiing iti maysa a banag a makatulong iti maysa a tao nga agsagsagaba gapu kadagiti pili ti sabali a tao. (Mabalinmo nga ilawlawag ti kari iti bersikulo 6 kadagiti agtungpal kadagiti katulaganda.)

• Addaan tiDoktrina ken Katulagan 54:10 iti sumagmamano a ragup dagiti balikas a mabalin a masarakan dagiti miembro ti klase a napateg, kas iti “aganus iti panagtutuok,” “nasapa a nangsapul kaniak” ken “paginanaan dagiti kararuada.” Mabalin dagiti miembro ti klase ti mangpili iti ragup dagiti balikas nga utoben ken adalenda, nga us-usaren dagiti footnote wenno dadduma pay a resources nga agsukisok kadagiti mainaig a nasantuan a kasuratan. Kalpasanna mabalinda nga ibinglay dagiti kapanunotanda.

dagiti nainayon a resources icon

Dagiti Nainayon a Resources

Dagiti panagaywantayo.

Inlawlawag ni Presidente Spencer W. Kimball: “Iti Simbaan ti panagaywan ket sagrado a naespirituan wenno naindagaan a panagtalek a pakaaddaan iti sungsungbatan. Gapu ta kukua ti Apo ti amin a banag, datayo ti agaywan kadagiti bagi, panunot, pamilia, ken sanikuatayo. (Kitaen iti Doktrina Ken Katulagan 104:11–15.) Ti maysa a napudno nga agay-aywan ket maysa a mangaramat iti nalinteg a panangituray, mangtaripato iti bukodna, ket kitaenna dagiti nakurapay ken agkasapulan” (“Welfare Services: The Gospel in Action,” Ensign, Nob. 1977, 78).

Panangpadur-as iti Panangisurotayo

Tulongam dagiti agad-adal nga agsisinnuporta iti tunggal maysa. Mangparnuay iti aglawlaw ti klase a pagsisinnuportaan ken pagpipinnaregtaan dagiti agad-adal iti tunggal maysa. Awisem ida a mangibinglay iti kapanunotan ken estratehia a mangpadur-as iti bukod ken sangapamiliaan a panagadalda. (Kitaen iti Panangisuro iti Wagas ti Mangisalakan, 36.)