Mayo 10–16

Doktrina ken Katulagan 49–50

“Silaw Dayta Nagtaud iti Dios”

Tapno “mangisuro iti balikas ti kinapudno babaen ti Mangiliwliwa” (Doktrina ken Katulagan 50:17), agsapul iti nadiosan a pammaregta bayat ti panangutobmo iti Doktrina ken Katulagan 49–50. Kalpasanna agbalinka a nakasagana iti pangiturong ti Dios bayat ti panangisurom.

Isuratmo dagiti Impresionmo

Yawis ti Panagbibinninglay

Kas pangnayon iti panangibinglay kadagiti nalawag a pannakaammo ken pannakaawat a naawatda kabayatan ti panagadalda kadagiti nasantuan a kasuratan, mabalin a mairanud dagiti miembro ti klase manipud iti panangilawlawag no kasano nga umay dagiti nalawag a pannakaammo ken pannakaawat [insights]. Mabalinmo nga awisen dagiti miembro ti klase a mangibinglay iti tunggal maysa kadagiti nalawag a pannakaammo ken pannakaawat maipapan iti maysa a bersikulo iti Doktrina ken Katulagan 49–50 ket paglilinnawagan no ania ti nangiturong kadakuada kadagita a nalawag a pannakaammo ken pannakaawat [insights].

Isuro ti Doktrina

Doktrina ken Katulagan 49; 50:1–36

Matulongannak dagiti kinapudno ti ebanghelio a mangilasin kadagiti palso a pannursuro.

• Naited tibenneg 49 a mangipaneknek iti pudno a doktrina a nangatur no ania ti insursuro dagiti dadduma (kitaen iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia para iti sumagmamano a nagtaudan ti pakasaritaan). Tapno matulongan dagiti miembro ti klase nga agsukisok iti daytoy a benneg, mabalinmo a bingayen dagiti miembro ti klase kadagiti grupo ket dutokam ti tunggal grupo iti maysa kadagiti topiko a mainaig iti doktrina (kas nailista iti paulo a benneg iti benneg 49). Mabalin a paglilinnawagan dagiti grupo dagiti sumaganad a saludsod: Ania dagiti kinapudno nga insuro ti Apo maipapan iti daytoy a topiko iti benneg 49? Ania ti patien dagiti tao maipapan iti daytoy a topiko iti agdama? Ania ti ad-adu pay a kinapudno nga insuro ti Apo maipapan kadagiti propeta iti ud-udina nga aldaw? Magted kadagiti miembro ti klase iti gundaway a mangibinglay iti panagyamanda kadagiti kinapudno a naipalgak iti aldawtayo.

• Kas kadagiti elder iti Kirtland a “di nakaawat iti panagpakita dagiti nadumaduma nga espiritu” (Doktrina ken Katulagan 50, paulo a benneg), no dadduma masdaawtayo no ti maysa a banag a marikna wenno makitatayo ket aggapu iti Espiritu wenno aggapu iti sabali nga impluensia. Ania ti masursurotayo manipud iti Doktrina ken Katulagan 50:1–36 a mangtulong kadatayo a mangbigbig iti impluensia ti Espiritu? Mabalin a pagpiliem ti tunggal miembro ti klase a mangala iti sumagmamano a bersikulo nga adalenda ket kalpasanna idawat kadagiti miembro ti klase a mangibinglay no ania ti nasarakanda.

Doktrina ken Katulagan 49:15–17

Ti panagkallaysa iti nagbaetan ti lalaki ken babai ket napateg unay iti agnanayon a plano ti Dios.

• Gapu ta ti kallaysa ket kangrunaan iti plano ti Nailangitan nga Ama, aggagar ni Satanas a mangparnuay iti pannakatikaw maipapan iti daytoy. Mabalin a mairanud ti klasem manipud iti panagaramid iti listaan iti pisarra dagiti kinapudno nga impalgak ti Apo maipapan iti kallaysa. Kas pagarigan, ania dagiti kinapudno maipapan iti kallaysa a masursurotayo manipud iti Doktrina ken Katulagan 49:15–17? Dadduma pay a makatulong a nasantuan a kasuratan iramanna ti Genesis 2:20–24; 1 Taga Corinto 11:11; wenno masarakan ti dadduma pay iti “Kallaysa, Panagkallaysa” iti Pangiwanwan iti Nasantuan a Kasuratan (scriptures.ChurchofJesusChrist.org). Masarakan pay dagiti miembro ti klase dagiti kinapudno iti “Ti Kaamaan: Maysa a Waragawag iti Lubong.” Batay iti no ania ti masursurotayo manipud kadagitoy a resources, apay a kasapulan ti kallaysa iti nagbaetan ti lalaki ken babai iti plano ti Dios? (kitaen iti “Dagiti Nainayon a Resources”).

  

  Ti kallaysa ti lalaki ken babai ket inordenan ti Dios.

Doktrina ken Katulagan 50:13–22

Maitandudo a sangsangkamaysa dagiti mannursuro ken agad-adal babaen ti Espiritu.

• Ti panangiturong ti Apo maipapan iti pannakaikasaba ken panangawat iti kinapudno ket mabalin a mangted iti nasayaat a gundaway a paglilinnawagan ti nagtinnulong nga akemmo kas mannursuro ken ti panangpatanor dagiti miembro ti klase iti panagadal iti ebanghelio. Ibilangmo ti panangkiddaw kadagiti miembro ti klase a mangrebyu iti Doktrina ken Katulagan 50:13–22 iti sagpaparis ket paglilinnawagan dagiti akem ti Espiritu, mannursuro, ken dagiti agad-adal. Mabalin nga ibinglay iti klase ti sumagmamano a paris no ania ti nasursuroda. Ania dagiti sumagmamano a “dadduma pay a wagas” a no dadduma ikarigatantayo ti mangisuro wenno agsursuro iti ebanghelio? (bersikulo 17). Kasano a makapagbalintayo a nasaysayaat iti panangawat iti Espiritu? Ania dagiti nakaparegtaantayo nga aramiden iti pagtaengan ken iti simbaan tapno maisuro ken masursuro a nasayaat ti ebanghelio?

Dagiti Nainayon a Resources

Ti kallaysa ket napateg iti plano ti Nailangitan nga Ama.

Inlawlawag ni Elder David A. Bednar no apay a napateg ti kallaysa iti plano ti Dios iti pannakaisalakan:

“Babaen ti nadiosan a plano, naipanggep dagiti lallaki ken babbai a dumur-as a sangkamaysa iti kinaan-anay ken pakabuklan ti gloria. Gapu kadagiti aggidiat a panagparbeng ken kabaelanda, tunggal maysa kadagiti lallaki ken babbai ket mangisangbay kadagiti naidumduma a pannirigan ken padas iti relasion ti panagasawa. Agduma ti tulong ti lalaki ken ti babai ngem agpada iti panagkaykaysa ken panagtipon a mabalin a magun-od nga awanen iti sabali pay a wagas. Ti lalaki ti mangkumpleto ken mangan-anay iti babai ket ti babai ti mangkumpleto ken mangan-anay iti lalaki bayat ti panagsinnuroda ken panagpinnapigsada ken panagpinnaraburda iti tunggal maysa. …

“Ti pagtaengan nga addaan iti naayat ken napudno nga agassawa ket ti kangatuan a pagpatan-ayan kadagiti ubbing iti ayat ken kinalinteg ken pakaipaayan dagiti naespirituan ken pisikal a kasapulan dagiti ubbing. Kas iti naidumduma a kababalin dagiti agpada a lallaki ken babbai ket makatulong iti kinaan-anay ti relasion iti panagasawa, isu a napateg dagita a kababalin iti panangpatan-ay, panangtaripato, ken panangisuro kadagiti ubbing” (“Marriage Is Essential to His Eternal Plan,” Ensign, Hunio 2006, 83– 84).

Panangpadur-as iti Panangisurotayo

Mangidaulo kadagiti naparegta a panaglilinnawag. Adda maysa a banag a maipaay ti tunggal maysa, ngem no dadduma saan a maikkan ti amin iti gundaway. Iti panangsurot iti impluensia ti Espiritu, mangsarak kadagiti wagas a mapaadu ti bilang dagiti miembro ti klase a makaibinglay kadagiti kapanunotan ken riknada.