Campfire iti Missouri, ni Bryan Mark Taylor

Mayo 31–Hunio 6

Doktrina ken Katulagan 60–62

“Adda iti Imak ti Amin a Lasag”

Kinuna ni Elder Ronald A. Rasband: “Nasken a tunggal maysa kadatayo umuna a papigsaentayo a naespirituan ti bagbagitayo ket kalpasanna papigsaentayo dagiti adda iti aglawlawtayo. Kanayon nga utobenyo dagiti nasantuan a kasuratan, ket laglagipenyo dagiti kapanunotan ken rikna bayat ti panangbasayo kadagitoy” (“Lest Thou Forget,” Ensign wenno Liahona, Nob. 2016, 114).

Isuratmo dagiti Impresionmo

Yawis ti Panagbibinninglay

Mabalinmo a paregtaen ti napnuan kaipapanan a panaglilinnawag babaen ti panangawis kadagiti miembro ti klase a sumungbat iti maysa a masinunuo a saludsod wenno kapanunotan a mainaig kadagiti nasantuan a kasuratan a basaenda iti pagtaengan. Kas pagarigan, mabalinmo nga awisen ida a mangibinglay iti maysa a banag a nasursuroda iti daytoy a lawas maipapan iti Nailangitan nga Ama wenno ni Jesucristo.

Isuro ti Doktrina

Doktrina ken Katulagan 60:2–3, 7, 13–14; 62:3, 9

Maragsakan ti Apo no ungapentayo dagiti ngiwattayo a mangibinglay iti ebanghelio.

• Kas miembro ti Simbaan, ammotayo a ti naisubli nga ebanghelio ti dakkel a gameng a mangbendision iti biag dagiti annak ti Dios. Apay a no dadduma agkedkedtayo a mangibinglay iti pammaneknektayo kadagiti dadduma? Ibilang ti panangawis kadagiti miembro ti klase a mangilista iti pisarra ti sumagmamano a rason no apay a ditayo mabalin nga ungapen dagiti ngiwattayo a mangibinglay iti ebanghelio. Kalpasanna mabalin a basaen dagiti miembro ti klase ti Doktrina ken Katulagan 60:2–3, 7, 13–14; 62:3, 9, a magsapsapul kadagiti balikas wenno ragup dagiti balikas a mangparegta kadakuada a mangibinglay iti ebanghelio. Mabalinda nga ilista iti pisarra no ania ti nasarakanda. Nalabit a mabalin ti sumagmamano a miembro ti klase a mangibinglay iti padas idi pinarmekda dagiti butengda ket nangibinglay iti ebanghelio iti maysa a tao.

• Iti intero a Doktrina ken Katulagan 60–62, adda dagiti pannursuro, agpada a nadakamat ken naikkan kaipapanan, maipapan iti panangibinglay iti ebanghelio. Tapno matulongan dagiti miembro ti klase a mangtakuat kadagitoy a pannursuro, mabalinmo a kiddawen iti tunggal tao a mangrebyu iti maysa kadagitoy a benneg ken mangibinglay iti ania man a banag a masarakanda a mangisuro kadakuada maipapan iti panangibinglay iti ebanghelio. Mabalin a daytoy ti mangpapintas iti panaglilinnawag a mangbasa maipapan kadagiti pagulidanan a misionario iti sadino man kadagiti nasantuan a kasuratan (kitaen, kas pagarigan, iti Dagiti Aramid 8:27–40; Alma 19:16–17) ket paglilinnawagan no ania ti masursurotayo manipud kadagitoy. Ania dagiti pagarigan a maibinglaytayo manipud iti bukodtayo a biag? Mabalin kadi nga ibinglay ti asino man a miembro ti klase no kasano a nayam-ammoda iti ebanghelio ken no kasano ti nariknada maipapan kadagiti tao a nangisuro kadakuada? Mabalin a pakairanudan ti klasem manipud iti panangyakemda kadagiti wagas a mabalin nga “ungapentayo dagiti ngiwat[tayo]” ket ibinglay ti ebanghelio.

  

  Kayat ti Dios nga ibinglaytayo ti ebanghelio kadagiti dadduma.

Doktrina ken Katulagan 60:2–4; 61:1–2, 20, 36–38; 62:1, 6

Isurodatayo dagiti nasantuan a kasuratan maipapan ken ni Jesucristo.

• Awisem dagiti miembro ti klase a mangisurat iti pisarra ti ania man a banag a nasursuroda maipapan iti Mangisalakan iti daytoy a lawas manipud iti panagadalda kadagiti benneg 60–62, karagpin dagiti mainaig a bersikulo. Wenno mabalinda a sukisoken ti Doktrina ken Katulagan 60:2–4; 61:1–2, 20, 36–38; 62:1, 6 a mangsapul kadagiti banag a naisuro maipapan iti Mangisalakan. Ania dagiti estoria manipud kadagiti nasantuan a kasuratan wenno bukodtayo a biag a mangiladawan kadagiti akem ken kababalin ti Mangisalakan a nasursurotayo? (kas pagarigan, Juan 8:1–11; Ether 2:14–15). Mabalinmo nga awisen dagiti miembro ti klase a mangibinglay kadagiti pammaneknekda maipapan ken ni Jesucristo wenno sililimed a mangutob no ania ti kaipapananna kadakuada.

Doktrina ken Katulagan 60:5; 61:22; 62:5-8

Kayat ti Apo nga agaramidtayo iti sumagmamano a pangngeddeng “a namnamaen[tayo] a nasayaat.”

• Ibilangmo ti panangawis kadagiti miembro ti klase a mangbasa iti Doktrina ken Katulagan 60:5; 61:22; 62:5–8 iti sagpaparis wenno babassit a grupo ket ibinglayda no ania ti mariknada a mabalin a mensahe ti Apo kadatayo. Kaano a nariknada a nasken nga usarenda ti bukodda a pangngeddeng iti panangaramid iti pangngeddeng? Ibilang ti panangibinglay iti adaw ni Presidente Dallin H. Oaks iti “Dagiti Nainayon a Resources” kas paset ti panangilawlawagmo. Kasano a matulongan dagiti nagannak dagiti annakda a masursuruan iti daytoy a napateg a pagbatayan?

Dagiti Nainayon a Resources

Panagtignay iti kasayaatan a pangngeddengtayo.

Insuro ni Presidente Dallin H. Oaks:

“Ti tarigagay nga agpaiturong iti Apo ket maysa a pigsa, ngem kasapulanna a mabuyogan iti pannakaawat nga ibati ti Nailangitan nga Ama ti adu a pangngeddeng para kadagiti bukodtayo a pili. Ti panangaramid iti bukod a pangngeddeng ket maysa kadagiti pagtaudan ti panagdur-as a nairanta a padasentayo iti mortalidad. Dagiti tao a mangpadas a mangisukat iti Apo iti amin a panangaramid iti pangngeddeng ken agpakaasi para iti paltiing iti tunggal pili ket masarakandanto iti mabiit dagiti kasasaad a pagkararaganda para iti pannarabay ken dida maawat daytoy. Kas pagarigan, kasla mapasamak daytoy iti adu a kasasaad nga awan kaes-eskanna dagiti pili wenno maawat ti ania man a pili.

“Nasken nga adalentayo a nasayaat dagiti banag iti pampanunottayo, nga us-usaren dagiti bileg a panangikalintegan nga inkabil ti Namarsuatayo iti kaunggantayo. Kalpasanna nasken nga agkararagtayo para iti pannarabay ket agtignaytayo iti daytoy no maawattayo daytoy. No ditayo maawat ti pannarabay, nasken nga agtignaytayo iti kasayaatan a pangngeddengtayo” (Our Strengths Can Become Our Downfall,” Ensign, Okt. 1994, 13–14).

Panangpadur-as iti Panangisurotayo

Ammuen dagiti mangikarigatan. Nalabit a narigat a madlaw ti panagkarigatan dagiti sursuruam. Ngem babaen ti tulong ti Espiritu ken dagiti lideryo, mabalin nga ammom ti kasayaatan a wagas a mangtulong kadagitoy a tao. (Kitaen iti Panangisuro iti Wagas ti Mangisalakan,8–9.)