bangkag iti panagsingising ti init

Daviess County, Missouri

Hunio 14–20

Doktrina ken Katulagan 64–66

“Kalikaguman ti Apo ti Puso ken ti Natallugod a Panunot”

Kabayatan ti panagadalmo iti daytoy a lawas, sikakararag nga utobem no ania dagiti pagbatayan manipud iti Doktrina ken Katulagan 64–66 a mangpapigsa iti pammati ken pannakaammo dagiti miembro ti klasem.

Isuratmo dagiti Impresionmo

icon iti panagbibinninglay

Yawis ti Panagbibinninglay

Tapno maallukoy dagiti miembro ti klase a mangibinglay iti maysa a banag a masarakanda a napateg iti panagadalda iti nasantuan a kasuratan iti daytoy a lawas, mabalinmo nga idawat kadakuada a mangutob kadagiti karit a sangsanguentayo iti agdama. Awisem ida a mangibinglay iti maysa a bersikulo manipud iti Doktrina ken Katulagan 64–66 a mariknada a makatulong iti maysa kadagita a karit.

icon iti panangisuro

Isuro ti Doktrina

Doktrina ken Katulagan 64:1–11

Naidawat kadatayo a mamakawan iti tunggal maysa.

• Nalabit a mairanud dagiti miembro ti klase manipud iti panangisarita maipapan no apay a narigat ti panangpakawan iti dadduma— ken no kasano a naparmekda dagita a rigat. Mabalin a sukisokenda iti Doktrina ken Katulagan 64:1–11 dagiti pagbatayan ken kinapudno a mangparegta kadakuada nga agbalin nga ad-adda pay a managpakawan. Ania ti masursurotayo maipapan iti Mangisalakan manipud kadagitoy a bersikulo? Tapno makatulong a mangiladawan kadagiti bendision ti pammakawan, mabalinmo nga ibinglay ti estoria ni Morrell Bowen manipud iti mensahe ni Elder Jeffrey R. Holland iti “The Ministry of Reconciliation” (Ensign wenno Liahona, Nob. 2018, 77–79) wenno ti video “Forgiveness: My Burden Was Made Light” (ChurchofJesusChrist.org). Wenno mabalin nga agtallugod ti maysa a miembro ti klase a mangibinglay iti bukod nga estoria maipapan iti panangted wenno panangawat iti pammakawan. Kasano a nabendisionan dagiti tao kadagitoy a pagwadan babaen ti bileg ti pammakawan?

Doktrina ken Katulagan 64:31–34

Kiddawen kadatayo ti Apo ti “puso ken ti natallugod a panunottayo.”

• Saan a kayat ti Apo a “mabannogtayo”; nupay kasta, gagangay kadagiti tao a mangikarkarigatan iti amin a kabaelanda—agraman, nalabit, iti sumagmamano iti klasem—nga agbalin a “mabannog nga agaramid iti nasayaat.” Apay a mapasamak daytoy a pannakabannog? Ania a balakad ti masarakantayo iti Doktrina ken Katulagan 64:31–34 a makatulong kadatayo bayat ti panangikarigatantayo kadagiti kasta a rikna?

• Tapno mapasayaat ti panaglilinnawagyo, mabalinmo nga ipakita dagiti ladawan ti maysa a dakkel a banag ken makaawis a nabangon iti napaut a panawen iti “babassit a bambanag”— kas iti mosaic wenno pasdek a naaramid iti ladrilio. Ania dagiti sumagmamano a pagarigan ti “naindaklan nga aramid” nga inted ti Apo kadakayo? Ania dagiti babassit a banag a maaramidtayo itan a mangikabil iti pamuon para iti dayta nga aramid?

• Tapno matulongan dagiti miembro ti klase a mangutob a naun-uneg maipapan iti Doktrina ken Katulagan 64:34, mabalinmo nga isurat ti Puso ken Natallugod a Panunot iti pisarra. Mabalin nga ilista dagiti miembro iti baba dagitoy a paulo no ania ti mariknada ti kayat a sawen ti mangted iti pusotayo ken ti natallugod a panunot ti Apo. Para iti pannakailawlawag dagitoy a termino, kitaen kadagiti balikas iti Elder Donald L. Hallstrom iti “Dagiti Nainayon a Resources.” Dagiti nasantuan a kasuratan kas iti sumaganad ket makaited pay iti sumagmamano a nalawag a pannakaammo ken pannakaawat: Mosiah 7:33; Ether 4:15; Doktrina ken Katulagan 43:34; Moises 7:18; Joseph Smith—Pakasaritaan 1:19.

Doktrina ken Katulagan 65

Isagana ti pagarian ti Dios iti daga ti lubong para iti panagsubli ti Mangisalakan.

• Mangted tiDoktrina ken Katulagan 65 iti makaparegta a panangiladawan ti mision ti Simbaan ti Apo iti ud-udina nga aldaw. Tapno matulongan dagiti miembro ti klase a mangkita kadagiti pasetda iti daytoy a mision, mabalinmo nga awisen ida a mangsukisok iti benneg 65 a mangsapsapul kadagiti sungbat kadagiti saludsod kas kadagitoy: Ania ti kayat ti Apo nga ipatungpal ti pagarianna iti daga? Ania ti kayatna nga aramidek a makatulong? Mabalin pay a buyaem ti video “Prepare Today for the Second Coming” (ChurchofJesusChrist.org) wenno itudo iti mensahe ni Presidente Dallin H. Oaks iti “Dagiti Nainayon a Resources.” Mabalin nga ibinglay dagiti miembro ti klase no kasano a sungbatanda dagiti saludsod ni Presidente Oaks.

dagiti nainayon a resources icon

Dagiti Nainayon a Resources

“Ti puso ken ti natallugod a panunot.”

Insingasing ni Elder Donald L. Hallstrom daytoy mabalin a kaipapanan ti ragup dagiti balikas a “puso ken ti natallugod a panunot”:

“Ti puso ket mangisimbolo iti ayat ken panagkumit. Agaramidtayo kadagiti sakripisio ken agibaklaytayo kadagiti dagensen para kadagiti ay-ayatentayo a saan nga agibtur para iti ania man a sabali a gapu. No awan ti ayat, bumassit ti panagkumittayo. …

“Ti kaadda ti ‘natallugod a panunot’ kaipapananna ti panangted iti amin a kabaelantayo ket kasayaatan a panagpanunot ken panagsapul ti sirib ti Dios. Isingasing daytoy a ti kapasnekan a panagadaltayo iti tungpal biag ket nasken a dagiti banag nga agnanayon iti kasasaadna. Kayatna a sawen nga adda saan a mapagsina a pagnaigan ti nagbaetan ti idedengngeg iti balikas ti Dios ken panagtungpal iti daytoy” (“The Heart and a Willing Mind,” Ensign, Hunio 2011, 31–32).

Panagsagana para iti Maikadua a Yaay.

“Ania ngata no inton bigat ti aldaw a yaay ti [Jesucristo]? No ammotayo koma a sabatentayo ti Apo iti kabigatanna—babaen ti nasapa nga ipapataytayo wenno babaen ti saan a ninamnama a yaayna—ania ti mabalintayo nga aramiden iti agdama? Ania dagiti kumpisar nga aramidentayo? Ania dagiti kannawidan nga isardengtayo? Ania dagiti sungsungbatan a risutentayo? Ania dagiti pammakawan nga itedtayo? Ania dagiti pammaneknek nga iburaytayo?” (Dallin H. Oaks, “Preparation for the Second Coming,” Ensign wenno Liahona, Mayo 2004, 9).

Panangpadur-as iti Panangisurotayo

Mangala iti pigsa manipud iti Mangisalakan. “Kadagiti panagkagumaanmo nga agbiag ken mangisuro nga ad-adda a kas iti Mangisalakan, saanmonto a maliklikan nga agkurangka sagpaminsan. Saanka a mapukawan iti namnama; ketdi, bay-am a dagiti biddut ken pagkapsutam ti mangyasideg kenka iti Nailangitan nga Ama ken iti Mangisalakan” (Panangisuro iti Wagas ti Mangisalakan, 14).