“Hunio 21–27. Doktrina ken Katulagan 67–70: ‘Napateg … dagiti Kinabaknang ti Sibubukel a Daga’” Umaykayo, Sumurot Kaniak—Para iti Sunday School: Doktrina ken Katulagan 2021 (2020)
“Hunio 21–27. Doktrina ken Katulagan 67–70,” Umaykayo, Sumurot Kaniak—Para iti Sunday School
Hunio 21–27
Doktrina ken Katulagan 67–70
“Napateg … dagiti Kinabaknang ti Sibubukel a Daga”
Ti panagsagana a mangisuro kayatna a sawen ti ad-adda pay a panagpanunot maipapan iti no ania ti sawen ken aramidenyonto kas mannursuro. Nasken met nga iraman daytoy iti panangibilangda no ania ti maaramid dagiti agad-adal a mangisuro iti tunggal maysa. Kasano a maawismonto dagiti miembro ti klase a mangibinglay kadagiti padas ken nalawag a pannakaammo ken pannakaawat nga adda kadakuada iti panagbasbasada kadagitoy nasantuan a kasuratan?
Isuratmo dagiti Impresionmo
Yawis ti Panagbibinninglay
Mabalinmo nga isurat iti pisarra Daytoy a lawas sinuruannak ti Apo … ket awisem dagiti miembro ti klase a mangileppas iti binatog iti maysa a banag a nasursuroda.
Isuro ti Doktrina
Pudno ken naggapu iti Dios dagiti paltiing a naited babaen ni Joseph Smith.
-
Ti pannakaawat iti nagtaudan ti pakasaritaan ti Doktrina ken Katulagan 67 ket makatulong iti panaglilinnawag iti daytoy a benneg. Nalabit a mabalin a gupgopen ti maysa a miembro ti klase dagiti kasasaad a nangiturong iti daytoy a paltiing (kitaen iti Doktrina ken Katulagan 67, paulo a benneg; Saints 1:140–43). No addatayo iti miting a pannakailawlawag ti pannakaipablaak dagiti paltiing, ania dagiti rason a maitedtayo kas yaanamong iti kapanunotan? Ania ti mabalin a sawentayo iti tao a maseknan maipapan kadagiti pagkuranganna iti pagsasao ni Joseph Smith? Ania ti isuro kadatayo ti benneg 67 maipapan kadagiti propeta ken paltiing? Mabalin pay nga ibinglay dagiti miembro ti klase no kasano a naammuanda para iti bagbagida a pudno dagitoy a paltiing.
Naparegta a balikas dagiti katulongan ti Apo dagiti balikas ti Apo.
-
Tapno matulongan dagiti miembro ti klase a mapaglilinnawagan ti Doktrina ken Katulagan 68:1–6, mabalinmo nga awisen ida a mangbasa kadagitoy a bersikulo iti babassit a grupo ken mangibinglay iti tunggal maysa kadagiti kinapudno a masursuroda maipapan kadagiti pannursuro dagiti katulongan ti Apo. Awisem dagiti grupo a mangibinglay iti tunggal maysa no kasano nga ammoda a pudno dagiti pagbatayan a naisuro iti bersikulo 4 . Mabalin nga ibinglay dagiti miembro ti klase dagiti padasda idi nagsarita wenno nangisuroda kas “matignay iti Espiritu Santo” (bersikulo 3) ken no kasano nga adda kadakuada ti Apo ket nagtakder kadakuada (kitaen iti bersikulo 6).
-
No kayatmo nga ilawlawag no kasano a mayaplikar dagitoy a bersikulo kadagiti pannursuro dagiti katulongan ti Apo iti sapasap a komperensia, makatulong ti palawag ni Elder Jeffrey R. Holland iti “Dagiti Nainayon a Resources.” Mabalin pay nga ibinglay dagiti miembro ti klase dagiti kallabes a mensahe iti komperensia a nangpapigsa iti pammatida iti doktrina a masarakan kadagitoy a bersikulo.
Doktrina ken Katulagan 68:25–31
Addaan dagiti nagannak iti responsabilidad a mangisuro kadagiti annakda.
-
Adda kadi dagiti nagannak iti klasem—wenno masakbayan a nagannak? Nalabit a pakairanudanda ti panangisarita maipapan iti balakad ti Apo kadagiti nagannak iti benneg 68. Kas pagarigan, nalabit a pumili ti sumagmamano a nagannak iti klase iti maysa a pagbatayan manipud kadagiti bersikulo 25–28 ket isaritada no kasano a padasenda nga isuro dagitoy a banag kadagiti annakda (dagiti bersikulo 29–31 addaan met iti sumagmamano a napapateg a pagbatayan). Wenno mabalin nga isarita dagiti miembro ti klase maipapan no kasano a sinuruan ida dagiti nagannakda kadagiti pagbatayan ti ebanghelio.
Apay a ti pagtaengan ti kasayaatan a lugar a pagsursuruan dagiti ubbing iti ebanghelio? Ania koma ti sawentayo kadagiti nagannak a makarikna iti pagkurangan wenno pannakatalipupos iti pagrebbengan a mangisuro kadagiti annakda?
Inikkan ti Apo dagiti nagannak iti responsibilidad a mangisuro kadagiti annakda.
Adda sungsungbatantayo kadagiti paltiing nga inted ti Apo kadakayo.
-
Inted ti Apo ti sumagmamano a kakabsat a lallaki ti panagaywan kadagiti paltiing a mangipan kadagitoy iti Missouri ken kitaenda ti pannakaipablaakda. Iti ania a kaipapanan a makitatayo ti bagbagitayo kas agay-agaywan kadagiti paltiing? Ania dagiti dadduma pay a pannursuro manipud iti daytoy a benneg maipapan iti panagaywan a mabalin a mayaplikar kadatayo?
Dagiti Nainayon a Resources
Kasaonatayo ti Dios iti agdama.
Imbinglay ni Elder Jeffrey R. Holland no kasano a mayaplikar dagiti pagbatayan a naisuro iti Doktrina ken Katulagan 68:4 iti sapasap a komperensia: “Dawatek kadakayo a kadagiti aldaw kalpasan daytoy a komperensia utobenyo saan laeng a dagiti mensahe a nangngeganyo no di ketdi pay ti naidumduma a pagilasinan mismo ti sapasap a komperensia—no ania ti patientayo kas Santo iti Ud-udina nga Aldaw kadagiti kasta a komperensia ken no ania ti yawistayo iti lubong a denggen ken tungpalen maipapan kadagitoy. Paneknekanmi nga iti tunggal pagilian, kabagyan, pagsasao, ken tao a saan laeng a sibibiag ti Dios ngem kasta met nga agsao, a para iti panawentayo ken iti aldawtayo ti balakad a nangngegyo ket, babaen ti panangiturong ti Nasantuan nga Espiritu, ‘ti pagayatan ti Apo, … ti balikas ti Apo, … ti timek ti Apo, ken ti bileg ti Dios iti pannakaisalakan’ [Doktrina ken Katulagan 68:4]” (“An Ensign to the Nations,” Ensign wenno Liahona, Mayo 2011, 111).
Panangpadur-as iti Panangisurotayo
Tulongam dagiti sursuruan nga agpipinnaregta iti tunggal maysa. “Tunggal tao iti klasem ket nabaknang a paggapuan ti pammaneknek, nauneg a pannakaammo ken pannakaawat, ken padpadas iti panagbiag iti ebanghelio. Awisem ida nga agbibinninglay ken agpipinnaregta iti tunggal maysa” (Panangisuro iti Wagas ti Mangisalakan, 5).