Ni Jesus a kaduana dagiti karnero

Napateg iti Puso ti Pastor, ni Simon Dewey

Hunio 28–Hulio 4

Doktrina ken Katulagan 71–75

“Awan ti Armas a Maaramid a Maibusor Kenka a Rumang-ayto”

Bayat ti panangbasam iti Doktrina ken Katulagan 71–75, panunotem dagiti tao a sursuruam. Ania ti ammom maipapan kadakuada? Ania ti kasapulanda?

Isuratmo dagiti Impresionmo

icon iti panagbibinninglay

Yawis ti Panagbibinninglay

Awisem dagiti miembro ti klase a mangisingasing iti sumagmamano a kinapudno a nasarakanda kabayatan ti panagadalda iti Doktrina ken Katulagan 71–75. Ania dagiti padas a napasaranda kadagitoy a kinapudno?

icon iti panangisuro

Isuro ti Doktrina

Doktrina ken Katulagan 71

Masurottayo ti pannarabay ti Espiritu Santo bayat ti panangsaluadtayo kadagiti pammatitayo.

• Nariknatayo kadin ti panagbuteng wenno panagnerbios maipapan iti panangsaluad kadagiti pammatitayo? Nalabit a mabalinmo nga awisen dagiti miembro ti klase a mangisurat iti pisarra dagiti balikas wenno ragup dagiti balikas a masarakan iti Doktrina ken Katulagan 71 a mangiladawan no kasano nga indawat ti Apo kada Joseph ken Sidney a mangsungbat kadagiti panagdillaw ni Ezra Booth ken dagiti dadduma pay. Kalpasanna mabalin nga ilawlawag dagiti miembro ti klase iti babassit a grupo no ania kadagitoy a panangiturong ti mabalin nga adda kaipapananda kadatayo iti agdama. Apay napateg nga agtignaytayo a “maibatay iti dayta bingay ti Espiritu” nga ited ti Apo kadatayo? (bersikulo 1).

  Mabalin pay a makatulong a buyaen iti video “Everyday Example: When Beliefs Are Questioned” (ChurchofJesusChrist.org). Mabalin a sapulen dagiti miembro ti klase dagiti wagas a pakaipakitaan dagiti kinapudno iti benneg 71 iti video. Nalabit mabalinda pay nga ibinglay dagiti pagarigan ti no kasano a sinungbatan ti Mangisalakan dagiti nagdillaw Kenkuana (kas pagarigan, kitaen iti Mateo 22:15–22; 26:59–64; Juan 10:37–38).

Doktrina ken Katulagan 72:8–16

Dagiti bishop ti agaywan kadagiti naespirituan ken temporal a pakaseknan ti pagarian ti Apo.

• Kasano a dagiti panangiturong ti Apo ken ni Newel K. Whitney, idi naawagan nga agbalin a bishop iti Kirtland, ket makatulong kadagiti sursuruam a mangbigbig iti pateg kadagiti bishop a naawagan nga agserbi kadakuada? Mabalinmo nga idawat kadagiti miembro ti klase a mangsukisok iti Doktrina ken Katulagan 72:8–16, nga agsapsapul iti sumagmamano kadagiti pagrebbengan ni Bishop Whitney ket kalpasanna idasigda dagitoy kadagiti pagrebbengan dagiti bishop iti agdama (kitaen iti panangiladawan ni Presidente Gordon B. Hinckley kadagiti pagrebbengan ti maysa a bishop iti “Dagiti Nainayon a Resources” wenno iti mainaig a video, “The Office of Bishop” [ChurchofJesusChrist.org]). Nalabit a mabalin nga ibinglay dagiti miembro ti klase no kasano a nakitadan a nabendisionanda iti serbisio ti maysa a bishop. Ania ti maaramidtayo tapno naan-anay a kanunongantayo ti bishoptayo?

  binarbariles ken sinaksako a taraon

  Tulongan dagiti bishop dagiti miembro a mangipaay kadagiti temporal a kasapulanda.

Doktrina ken Katulagan 73

Mabalintayo ti agsapul kadagiti gundaway a mangibinglay iti ebanghelio.

• Imbaga ti Apo kada Joseph Smith ken Sidney Rigdon a mangikasaba iti ebanghelio “no la ketdi mabalin” (Doktrina ken Katulagan 73:4) bayat ti panagtrabahona pay iti patarus ti Biblia. Nalabit a mabalin nga ibinglay dagiti miembro ti klase ti sumagmamano a wagas a nasarakanda a “mabalin”—wenno napaypayso—a mangibinglay iti ebanghelio a maibilang kadagiti dadduma pay a pagrebbenganda. Tapno masarakanda iti sumagmamano a makatulong a balakad iti mensahe ni Elder Dieter F. Uchtdorf a “Missionary Work: Sharing What Is in Your Heart” (Ensign wenno Liahona, Mayo 2019 15–18).

Doktrina ken Katulagan 75:2–16

Kayat ti Nailangitan nga Ama nga “agtrabahotayo iti kabaelan[tayo].”

• Dagiti panangiturong ti Apo iti sumagmamano nga elder maipapan no kasano a ti panangibinglay iti ebanghelio ket makaparegta kadagiti miembro ti klase a mangibinglay iti ebanghelio a napaspasnek. Mabalinmo nga isurat iti pisarra ti Agtrabaho iti kabaelanyo ket idawat kadagiti miembro ti klase a mangilista kadagiti balikas ken ragup dagiti balikas a mapanunotda no panunotenda ti maysa a tao nga agtrabaho iti kabaelanna iti panangibinglay iti ebanghelio. Mabalinda pay nga ilawlawag no ania ti kayat a sawen ti “agtalinaed” wenno “agbalin a sadut” iti panangibinglay iti ebanghelio. Ania ti isuro kadatayo ti Doktrina ken Katulagan 75:2–16 maipapan iti no kasano a suportaran ti Mangisalakan dagiti agserbi kenkuana a sipupudno?

dagiti nainayon a resources icon

Dagiti Nainayon a Resources

Dagiti pagrebbengan ti maysa a bishop.

Insuro ni Presidente Gordon B. Hinckley:

“Ikutak iti pusok ti nalaus a panagyaman para kadagiti bishoptayo. Nalaus ti panagyamanko iti paltiing ti Mannakabalin a nakabuklan daytoy a saad ken pagpaayan. …

“… Namnamaenmi nga agserbikayo kas mangimatmaton a high priest ti ward, mamalbalakad kadagiti tao, mangsalsalaknib ken katulongan kadagiti adda parikutna, mangliwliwa kadagiti agladladingit, mangted abasto kadagiti agkasapulan. Namnamaenmi nga agserbikayo kas maysa nga agay-aywan ken magsalsaluad iti doktrina a maisuro iti wardyo, ti kalidad ti panangisuro, ti panangpunno iti adu a saad a kasapulan. …

“… Nasken a kitaenyo nga awan ti mabisin wenno lamulamo wenno awan pagyananna. Nasken a maammuam dagiti kasasaad ti amin nga imatonam.

“Nasken nga agbalinka a mangliwliwa ken mangiwanwan kadagiti taom. Nasken a kanayon a nakalukat ti ridawmo kadagiti asino man nga umararaw nga agsagsagaba. Nasken a napigsa ti likudam a mangibaklay kadagiti dagensenda. Nasken a tumulongka nga addaan iti ayat uray iti nagaramid iti biddut” (“The Shepherds of the Flock,” Ensign, Mayo 1999, 52–53).

Panangpadur-as iti Panangisurotayo

Agbalin nga ad-adda pay a mannursuro a kas ken ni Cristo. Ibilangmo ti panangusar kadagiti saludsod iti bukod a panangamiris iti panid 37 ti Panangisuro iti Wagas ti Mangisalakan a mangtulong kenka a makasursuro no kasano a makaisuroka nga ad-adda pay a kas iti Mangisalakan.