Ni Cristo ken ti Nabaknang nga Agtutubo nga Agturay, ni Heinrich Hoffman

Hulio 19–25

Doktrina ken Katulagan 81–83

No “Adu ti Maited Adu Met ti Kasapulan”

Laglagipem nga addaan dagiti miembro ti klasem kadagiti naespirituan a padas bayat ti panagadalda kadagiti nasantuan a kasuratan iti pagtaengan. Nainkararagan nga ibilang no kasano a maallukoymo ida a mangibinglay kadagiti padasda a mangparegta iti tunggal maysa.

Isuratmo dagiti Impresionmo

Yawis ti Panagbibinninglay

Awisem dagiti miembro ti klase a pumili iti maysa a ragup dagiti balikas manipud iti tunggal maysa kadagiti sumaganad a benneg a mangaramid iti napintas a paulo para iti benneg: Doktrina ken Katulagan 81, 82, ken 83. Apay a pinilida dagitoy a paulo?

Isuro ti Doktrina

Doktrina ken Katulagan 81:5; 82:18–19

Nasken a kalikaguman ti tunggal maysa kadatayo “ti pagsayaatan ti pada[tayo] a tao.”

• Ti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ket mangisingasing kadagiti saludsod nga utoben maipapan iti Doktrina ken Katulagan 81:5. Dagitoy pay ti makaaramid iti napintas a paglilinnawagan a saludsod para iti klasem. Kasta met nga ibilangmo ti panangibinglay iti bukod a padas idi nariknam a “nakapsutka” iti sumagmamano a wagas ket pinaregta ken pinapigsanaka ti panagserbi ti maysa a tao. Mabalin nga addaan dagiti miembro ti klase iti maipada a bukodda a padas nga ibinglay. Mabalinyo pay a buyaen ti video a “Works of God” (ChurchofJesusChrist.org) a mangparegta kadagiti miembro ti klase nga agserbi iti tunggal maysa. Makatulong pay ti palawag ni Presidente M. Russell Ballard iti “Dagiti Nainayon a Resources.”

• Ibilangmo ti panangkiddaw kadagiti miembro ti klase a mangrebyu iti Doktrina ken Katulagan 82:18–19, a mangsapsapul kadagiti pagbatayan a mangtulong kadakuada a makaawat kadagiti panggep ken bendision ti panagserbi kadagiti dadduma. Kalpasanna, paibinglay kadakuada no ania ti masursuroda. Mabalinyo pay a buyaen ti video a “Teachings of Thomas S. Monson: Rescuing Those in Need” (ChurchofJesusChrist.org). Kasano nga impagwadan dagiti miembro iti ward ni Bishop Monson no ania ti isuro dagiti bersikulo 18–19 ?

Doktrina ken Katulagan 82:8–10

“Siak, ti Apo, ikarik nga aramidek ti sawek no agtungpalkayo.”

• Tapno matulongan dagiti miembro ti klase a makaawat iti pagnaigan ti natallugod a panagtungpal ken dagiti naikari a bendision ti Dios, mabalinyo nga aggigiddan a basaen ti Doktrina ken Katulagan 1:37–38; 82:10; 130: 20–21 wenno iti babassit a grupo. Ania ti isuro kadatayo dagitoy a nasantuan a kasuratan maipapan iti Apo? Nalabit a mabalin nga ilista dagiti miembro ti klase dagiti balikas a mangiladawan iti kinataona, batay kadagitoy a bersikulo.

• Kalpasan ti panangbasa iti bersikulo 10, mabalin a pagsasaritaan dagiti miembro ti klase maipapan no ania ti inkari ti Apo kadatayo ken no kasano a tinungpal ti Apo dagiti karina. Ti estoria ni Sister Virginia H. Pearce a masarakan iti “Dagiti Nainayon a Resources” ket makatulong a makita dagiti miembro ti klase a bendisionannatayo ti Apo mayannurot iti bukodna a sirib, saan a kanayon iti wagas a kayattayo wenno namnamaen.

• Ania ti masursurotayo manipud iti Doktrina ken Katulagan 82:8–10 maipapan no apay nga ikkannatayo ti Nailangitan nga Ama kadagiti bilin? Nalabit a mabalin nga agsapul dagiti miembro ti klase kadagitoy a bersikulo nga usarenda iti panangtulong iti maysa a gayyem wenno maysa nga ubing a mangpampanunot a naiget dagiti bilin (kitaen met iti video “Blessed and Happy Are Those Who Keep the Commandments of God,” ChurchofJesusChrist.org). Wenno mabalinda nga ibinglay dagiti padas a nangisuro kadakuada a mangibilang kadagiti bilin kas bendision.

Dagiti Nainayon a Resources

Natarnaw a relihion.

Insuro ni Presidente M. Russell Ballard:

“Iti kinadisipulotayo, adu dagiti dawaten, pakaseknan ken naidutok nga aramidentayo. Nupay kasta, nasken a kanayon a maibatay ti sumagmamano nga aktibidad iti kinamiembrotayo iti Simbaan. ‘Gapuna,’ imbilin ti Apo, ‘agtalinaedka a napudno; aramidem dagiti naitudingko kenka a takem; saranayem dagiti nakapsut, itag-aymo dagiti ima dagiti naidasay, ken patibkerem dagiti nalupoy a tumeng’ [Doktrina ken Katulagan 81:5; nainayon dagiti nagiray a balikas].

“Daytoy ti aramid ti Simbaan! Daytoy ti natarnaw a relihion! Daytoy ti ebanghelio iti pudno a kaipapanan bayat ti panangsaranay, panangitag-ay, ken panangpapigsa kadagiti agkalikagum iti naespirituan ken temporal a kasapulan. Ti panangaramid iti kasta ket agkasapulan a sarungkaran ken tulongantayo ida [kitaen iti Santiago 1:27], a dagiti pammankenekda iti pammati iti Nailangitan nga Ama ken ni Jesucristo ken ti Pannubbotna ket sititibker a maipasdek iti puspusoda” (“Precious Gifts from God,” Ensign wenno Liahona, Mayo 2018, 11).

Bendisionannatayo ti Apo kadagiti bukodna a datdatlag a wagas.

Insarita ni Sister Virginia H. Pearce, sigud a miembro ti Young Women General Presidency, maipapan iti maysa a babai a nagdanag maipapan kadagiti annakna a nayaw-awan. Nangituding iti panggep a tun-oyen a mangpadakkel iti bilang ti idadar-ay iti templo ken nariknana nga awan duadua a dayawen ti Apo daytoy napateg a sakripisio babaen ti panagbalbaliw iti ugali dagiti annakna. Impadamag ti babai:

“Kalpasan ti sangapulo a tawen ti napadakkel a bilang ti idadar-ay templo ken kanayon a panagkararag, ladingitek nga ibaga a saan a nagbalbaliw dagiti pili dagiti ubbingko. …

“Ngem nagbalbaliwak. Maysaak a naiduma a babai. … Insardengkon dagiti pangngeddengko iti oras ken kabaelak ti aguray iti Apo. … Nagbalbaliwen dagiti namnamaek. Imbes a panangnamnama iti panagbalbaliw dagiti annakko, namnamaek dagitoy masansan a nadungngo a kaasi ken napnuanak iti panagyaman para kadakuada. … Agtrabaho ti Apo iti nakaskasdaaw a wagas, ken sipupudno iti napnoak ti talna a daegenna ti amin a pannakaawat” (iti “Prayer: A Small and Simple Thing,” At the Pulpit [2017], 288–89).

Panangpadur-as iti Panangisurotayo

Awisem dagiti agtutubo nga agbalin a paset ti adalem. Ikkam dagiti agtutubo kadagiti gundaway a mangisuro iti tunggal maysa. Ti idedengngeg iti pammaneknek wenno padas ti tunggal maysa ket mabalin a makaimpluensia unay. No kasapulan, tulongam dagiti agtutubo nga agsagana a mangisuro, ken ipakitam kadakuada no ania ti kaipapanan ti panangisuro iti wagas ti Mangisalakan (kitaen iti Panangisuro iti Wagas ti Mangisalakan, 27–28).