dagiti karnero a mangsursurot ken ni Jesus

Panagawid, ni Yongsung Kim

Hulio 12–18

Doktrina ken Katulagan 77–80

“Iturongkayto”

Laglagipen a singasing laeng dagiti aktibidad iti daytoy a balabala. Bayat ti panangbasam iti Doktrina ken Katulagan 77–80, tarabayennakanto ti Espiritu Santo a mangammo no kasano ti kasayaatan a panangisurom kadagiti miembro ti klasem.

Isuratmo dagiti Impresionmo

icon iti panagbibinninglay

Yawis ti Panagbibinninglay

Nalabit a mabalin nga ibinglay ti sumagmamano a miembro ti klasem dagiti nalawag a pannakaammo ken pannakaawat no kiddawem kadakuada a nasapsapa. Ibilang ti pannakisao iti sumagmamano kadakuada iti sumagmamano nga aldaw sakbay ti klase tapno kiddawen no makaumayda a nakasagana a mangibinglay iti maysa a banag a nakaawis iti riknada manipud iti Doktrina ken Katulagan 77–80.

icon iti panangisuro

Isuro ti Doktrina

Doktrina ken Katulagan 77

Ipalgak ti Dios dagiti kinadatdatlagna kadagiti agkalikagum a mangammo kadagitoy.

• Mabalin nga ibinglay dagiti miembro ti klase dagiti nalawag a pannakaammo ken pannakaawat a nasarakanda maipapan kadagiti simbolo iti libro ti Apocalipsis kabayatan ti panagadalda iti benneg 77 iti daytoy a lawas. Makisarsarita maipapan kadagiti sungbat nga inawat iti Joseph Smith ket mabalin a mangiturong iti panaglilinnawag maipapan no kasano a kalikaguman a magun-od dagiti miembro ti klase ti pannakaawat no agadalda kadagiti nasantuan a kasuratan. Ania ti masursurotayo manipud kadagiti kita ti saludsod a dinamag ni Joseph? Mabalin nga agtallugod dagiti miembro ti klase a mangibinglay kadagiti padasda idi naiturong dagiti saludsodda maipapan ti ebanghelio iti dakdakkel a pannakaawat.

Doktrina ken Katulagan 78:17–19

Iturongnatayto ti Apo.

• Tapno mairugi ti panaglilinnawag iti Doktrina ken Katulagan 78:17–19, mabalinmo nga ipakita dagiti ladawan ti sumagmamano a miembro ti klase kas ubbing (agdamagka nasapsapa a mangitugot kadagitoy a ladawan iti klase). Papugtuan iti klase no asino ti adda iti tunggal ladawan. Mabalin nga isarita dagiti miembro ti klase a nangitugot kadagiti ladawan maipapan no kasano a nagbalbaliwda manipud pay idi naala dagita a ladawan. Kalpasanna mabalin a basaen ti klase ti Doktrina ken Katulagan 78:17–19 ket utobenda dagiti saludsod kas kadagitoy: Kasano a maipadatayo kadagiti babassit nga ubbing iti Apo? Iti ania a wagas a kayatna a pagbalinantayo a kas kadagiti ubbing (kitaen iti Mosiah 3:19), ken iti ania a wagas a kayatna a dumur-astayo? Ania a balakad ti itedna kadatayo kadagitoy a bersikulo a mangtulong kadatayo a dumur-as?

  Tapno dumakkel ti pannakaawat dagiti miembro ti klasem iti no kasano nga “iturongnatayo” ti Apo (bersikulo 18), ibilang ti panangibinglay iti palawag iti Dagiti Nainayon a Resources.

Doktrina ken Katulagan 79–80

Napatpateg ti awag nga agserbi iti Dios ngem iti sadino ti pagserbiantayo.

• Mabalin nga adda dagiti tao iti klasem a nakarikna iti pannakaupay idi damona nga addaan iti takem nga inawatda iti ward wenno branch wenno iti lugar a naidutok a pagserbianda kas misionario. Mabalin nga agtallugod iti sumagmamano kadakuada a mangibinglay kadagiti padasda. Kasano a makatulong kadatayo ti balakad ti Apo iti Doktrina ken Katulagan 80:3 kadagitoy a kasasaad? Ania ti mabalin a kaipapanan ti ragup ti balikas a “saan a nasken”? Wenno ti ragup ti balikas a “saanka nga agbiddut”? Ania ti mabalin a kapatgan iti Apo no maipanggep kadagiti takemtayo? Dagiti nalawag a pannakaammo ken pannakaawat ni Elder David A. Bednar iti benneg 80 iti mensahena a “Called to the Work” ket makatulong pay (Ensign wenno Liahona, Mayo 2017, 68).

• Immuna a naited kadagiti benneg 79 ken 80 kadagiti tao a naawagan a mangikasaba iti ebanghelio, ngem naglaonda kadagiti pagbatayan a mabalin a mayaplikar kadatayo amin iti panagserbitayo iti Apo. Tapno matulongan dagiti miembro ti klase a mangsapul kadagitoy a pagbatayan, mabalinmo nga idawat kadakuada nga agpammarang nga adda maysa a gayyem a kimmappeng iti Simbaan itay kallabes ket kaaw-awatna ti umuna a takemna. Awisem dagiti miembro ti klase a suratanda ti gayyemda iti surat ti tulong ken balakad ket allukoyem ida a mangadaw kadagiti benneg 79 ken80 bayat ti panangaramidda. Idawat iti sumagmamano a miembro ti klase nga ibinglayda no ania ti insuratda.

  dagiti babbai nga agsasarita

  Maragsakan ti Apo no agserbitayo Kenkuana ken kadagiti dadduma.

dagiti nainayon a resources icon

Dagiti Nainayon a Resources

Iturongnatayonto ti Apo babaen ti Espiritu Santo.

Imbinglay ni Presidente Henry B. Eyring ti maysa a padas idi inkararaganna para iti pannarabay iti narigat a pangngeddeng ket nasursurona ti agpaiturong iti Apo:

“Nagkararagak, iti sumagmamano nga oras ngem kasla awan ti sungbat. Sakbay laeng ti parbangon, narimbawanak iti rikna. Nasurok ngem iti ania man a kanito manipud pay idi ubingak, nariknak a maysaak. Kasla nagbalin a naulimek ti pusok ken panunotko. Adda talna iti dayta nga akin-uneg a kinaulimek.

“No kaskasano iti siddaawko, nakitak ti bagik nga agkarkararag, ‘Nailangitan nga Amak, saan a nasken no ania ti kayatko. Saanen a napateg kaniak no ania ti kayatko. Kayatko laeng a maaramid ti pagayatam. Dayta laeng ti kayatko. Ibagam koma kaniak no ania ti aramidek.’

“Iti dayta a kanilto nariknak ti kinaulimek iti kaunggak a diak pay narikna iti kaano man. Ket dimteng ti mensahe, ket siguradoak no asino ti naggapuanna. Nalawag no ania ti aramidek. Awan ti naawatko a kari iti dayta a banag. Adda laeng pammatalged a maysaak nga ubing a nabagaan no ania a dana ti mangiturong iti ania man a kayatna a para kaniak” (“As a Child,” Ensign wenno Liahona, Mayo 2006, 16).

Panangpadur-as iti Panangisurotayo

Mangrugi kadagiti nasantuan a kasuratan. Sakbay ti panangusarmo kadagiti pangsuplemento a resources, sipapasnek nga adalem ken utobem dagiti nasantuan a kasuratan. Daytoyto ti mangawis iti Espiritu a mangtulong kenka a mangusar iti no ania ti naadalmon bayat ti panangisurom (kitaen iti Panangisuro iti Wagas ti Mangisalakan, 12).