galaksi iti law-ang

Pagkamangan, ni Shaelynn Abel

Hulio 5–11

Doktrina ken Katulagan 76

“Naindaklanto ti Gunggonada ken Agnanayonto ti Dayagda”

Kas iti adu a parmata a naisurat kadagiti nasantuan a kasuratan, dimteng ti parmata iti benneg 76 idi “nagutob” da Joseph Smith ken Sidney Rigdon kadagiti nasantuan a kasuratan (bersikulo 19). Mabalinmo met ti umawat iti paltiing—agraman ti pannarabay maipapan no kasano ti mangisuro—kabayatan ti panangutobmo iti Doktrina ken Katulagan 76.

Isuratmo dagiti Impresionmo

icon iti panagbibinninglay

Yawis ti Panagbibinninglay

Tapno matulongan dagiti miembro ti klase a mangisarita no ania ti nabasada iti Doktrina ken Katulagan 76, mabalinmo nga awisen ida a mangipapan nga agsaludsod ti maysa a gayyem a sabali ti pammatina no ania ti patientayo maipapan iti biag kalpasan ti ipapatay. Ania dagiti bersikulo manipud iti benneg 76 nga ibinglayda iti gayyemda? Mabalin nga ibinglay dagiti miembro ti klase ti maysa a banag manipud iti “Voices of the Restoration: Testimonies of ‘the Vision’” a mangawis iti riknada.

icon iti panangisuro

Isuro ti Doktrina

Doktrina ken Katulagan 76

Umay ti pannakaisalakan babaen ken ni Jesucristo, ti Anak ti Dios.

• Adu a tao, no panunotenda maipapan iti benneg 76, ti mangpanunot maipapan iti plano ti pannakaisalakan ken ti tallo a pagarian ti gloria. Kasano a matulongam dagiti miembro ti klase a mangkita a ti kapatgan a tao iti daytoy a paltiing ket ti Mangisalakan a ni Jesucristo? Mabalinmo nga idawat kadagiti miembro ti klase a mangibinglay iti maysa a bersikulo a nasarakanda iti benneg 76 a nangpapigsa iti pammatida ken ni Jesucristo. No kasapulanda ti tulong, mabalinmo nga itudo kadakuada dagiti bersikulo kas kadagiti 1–5, 20–24, 39–43, 69, 107–8.

• Tapno matulongan dagiti miembro ti klase nga agsukisok kadagiti paggidiatan dagiti agtawid iti tallo a pagarian ti gloria, isurat iti pisarra ti Celestial, dagiti bersikulo 50–70, 92–96; Terrestrial, dagiti bersikulo 71–79, 97; ken Telestial, dagiti bersikulo 81–90, 98–106, 109–12. Mabalin a pumili dagiti miembro ti klase iti maysa kadagiti tallo a set dagiti bersikulo ken mangsapul kadagiti ragup ti balikas a mangiladawan iti relasion ni Jesucristo ken dagiti tao nga agtawid iti maitutop a pagarian. Ania ti isuro kadatayo dagitoy a ragup ti balikas maipapan iti panagbalin a disipulo ni Jesucristo? Kasano a mapapigsatayo ti relasiontayo Kenkuana ken iti Ama? Kasano a matulongandatayo? Ania ti kayat a sawen ti “natured iti pammaneknek ni Jesus”? (bersikulo 79).

  siled ti pagtaengan idi maikasangapulo-ket-siam a siglo

  Nakita ni Joseph Smith ti parmata maipapan kadagiti tukad ti gloria iti maysa a siled a kas daytoy maysa.

Doktrina ken Katulagan 76:5–10, 113–18

Dagiti kinadatdatlag ti Dios mabalin laeng a “maawatan babaen ti pannakabalin ti Nasantuan nga Espiritu.”

• Mabalin a makaay-ayo kadagiti miembro ti klasem a mangammo a saan a nalaka nga inawat ti amin a miembro ti Simbaan ti paltiing iti benneg 76. Kas pagarigan, kinuna ti Brigham Young: “Kasta dagiti kannawidanko, nga idi damo nga umay kaniak ti Parmata umun-una kaniak, direkta daytoy a maisalungasing ken maisuppiat iti immuna nga adalko. Kinunak, Aguray bassit. Diak inawat daytoy; ngem diak maawatan daytoy.” Inlawlawagna a nasken nga “agpanunot ken agkararag, agbasa ken agpanunot, agingga a naammuak ken naan-anay a naawatak daytoy para iti bagik” (iti “The Vision,” Revelations in Context, 150). Ania ti masursurotayo manipud iti padasna a makatulong kadatayo idi ipalgak ti Dios dagiti banag a maigiddiat iti agdama a pannakaawattayo? Ania ti isuro kadatayo ti Doktrina ken Katulagan 76:5–10, 113–18 maipapan iti no kasano a maawattayo “dagiti palimed ti pagayatan ti [Dios]”? (bersikulo10).

Doktrina ken Katulagan 76:50–70, 92–95

Kayat ti Dios a makipagragsak Kenkuana ti amin nga annakna iti celestial a gloria.

• Kadagiti dadduma, mabalin a makapaupay wenno narigat a panunoten ti amin a banag a kasapulan kadatayo tapno maikari iti celestial a pagarian. Ibilangmo no kasano a matulongam dagiti miembro ti klase a mangsapul iti namnama “babaen ken ni Jesus a mangibabaet” (bersikulo 69). Kas pagarigan, mabalinmo nga awisen ida a mangbasa kadagiti bersikulo 50–70 ken 92–95. Awisem ida a mangibinglay no kasano a masungbatanda ti maysa a tao nga agkuna, “Narigat ti panagbiag iti ebanghelio iti lubong iti agdama; saanak a sigurado a napateg daytoy” wenno “Saanak a nasayaat para iti celestial a pagarian.” Ania ti mabalin nga isaotayo a mangparegta iti daytoy a tao?

Panangpadur-as iti Panangisurotayo

Agpokus iti Mangisalakan ken iti doktrinana. “Agtultuloy a saludsodem iti bagim, ‘Kasano a matulonganto ti isursurok dagiti miembro ti klasek a mangpatibker iti pammatida ken ni Cristo, agbabawi, agaramid ken agtungpal kadagiti katulagan iti Dios, ken umawat iti Espiritu Santo?’” (Panangisuro iti Wagas ti Mangisalakan, 20).