Pannakaisubli, ni Liz Lemon Swindle

Hulio 26–Agosto 1

Doktrina ken Katulagan 84

“Ti Bileg ti Kinadios”

Anianto ti aramidem a mangawis kadagiti miembro ti klase a mangibinglay no ania ti nasursuroda bayat ti panagadalda iti Doktrina ken Katulagan 84?

Isuratmo dagiti Impresionmo

Yawis ti Panagbibinninglay

Allukoyem dagiti miembro ti klase a mangibinglay iti sabali a miembro ti klase iti maysa a kinapudno a nasarakanda iti benneg 84 a nangparegta kadakuada wenno nangtulong kadakuada a nasaysayaat a makaawat iti priesthood ti Dios. Kalpasanna awisem ti sumagmamano a mangibinglay iti klase.

Isuro ti Doktrina

Doktrina ken Katulagan 84:1–5, 17–28, 31–42

Addaantayo amin iti access iti bileg ken dagiti bendision ti priesthood ti Dios.

• Mangrugi ti Apo iti daytoy a “paltiing iti kinasaserdote” (Doktrina ken Katulagan 84, paulo a benneg) babaen ti panangisuro a mabangonto ti maysa a templo iti Zion (kitaen kadagiti bersikulo 1–5). Kasano a matulongam a maawatan dagiti miembro ti klase no ania ti pagnaigan dagiti sagrado a panggep dagiti templo ken ti priesthood? Mabalinmo a rugian babaen ti panangisurat iti saludsod iti pisarra kas iti Ania dagiti panggep ti priesthood? ket kalpasanna awisem dagiti miembro ti klase a mangsapul kadagiti sungbat iti Doktrina ken Katulagan 84:17–28, 31–42. Kasano a makatulong dagiti templo ken ordinansa iti templo a mangipatungpal kadagitoy a panggep?

• Tapno matulongan dagiti miembro ti klase a maawatanda ti bileg ti priesthood iti biagda, mabalinmo nga awisen ida a mangbasa iti Doktrina ken Katulagan 84:17–28 ket ibilang no kasano a maiduma ti biagda no awan ti priesthood ti Dios. Allukoyem ida a mangibinglay no apay nga agyamyamanda para iti priesthood, a karagpin dagiti padasda iti bileg ti priesthood—kadagiti pamilia, takem, wenno bukodda a biag. Kasano a magun-odtayo ti access iti bileg ti priesthood?

• Addaan ti sapata ken katulagan ti priesthood (kitaen iti Doktrina ken Katulagan 84:31–42) iti naisangsangayan a panangaramat para kadagiti maordenan iti saad [office] ti priesthood. Ngem sidadaan a magun-od ti amin ti adu a naikari a bendision kadagitoy a bersikulo. Tapno matulongan dagiti miembro ti klase a kitaen no kasano a mayaplikar dagitoy a kari kadakuada, mabalinmo nga awisen ida a mangbasa kadagiti bersikulo 33–42 ket pagsasaritaan maipapan kadagiti wagas a “maawattayo” ti priesthood (bersikulo 35), dagiti katulongan ti Apo, ken ti Apo. Mabalinda pay a basaen dagiti palawag iti “Dagiti Nainayon a Resources” tapno ammuen no ania ti nasken nga aramidentayo tapno umawat kadagiti bendision ti priesthood. Mabalin a makatulongka kadagiti miembro ti klase a mangpanunot maipapan iti no ania ti mabalin a mairaman iti “amin nga adda iti Ama” (bersikulo 38), kas iti kababalinna ken ti kita ti biag a nanamenna. Ania ti makaawis iti riknatayo maipapan kadagitoy a bersikulo ken palawag?

  

  Bendisionan dagiti ordinansa iti priesthood ti amin nga annak ti Dios.

Doktrina ken Katulagan 84:61–88

Tulonganto ti Apo dagiti agserbi Kenkuana.

• Bayat ti pannakaiturong dagitoy a bersikulo kadagiti “mapan ket ikasaba daytoy nga ebanghelio ti pagarian” (bersikulo 80), adu kadagiti pagbatayan a linaonda ti mabalin a mayaplikar iti asino man nga agserserbi iti Dios. Mabalinmo nga ikkan ti tunggal miembro ti klase iti paset ti Doktrina ken Katulagan 84:61–88 a mangbasa ken mangidawat kadakuada a mangibinglay iti sabali pay a miembro ti klase no ania ti nasursuroda a mabalin a mayaplikar iti asino man nga agserbi iti Apo. Mabalin a pumili dagiti miembro ti klase iti paggugusto a bersikulo wenno grupo dagiti bersikulo a yulo wenno i-display iti lugar a makitadanto daytoy iti inaldaw. Ania dagiti kari a kangrunaan a paggagaranda? Ania ti maibinglaytayo manipud kadagitoy a bersikulo a mangparegta kadagiti agdama a full-time a misionario wenno dagiti agsagsagana nga agserbi?

Dagiti Nainayon a Resources

Maawat ti amin nga adda iti Ama.

Insuro ni Presidente M. Russell Ballard: “Amin a nagaramid kadagiti sagrado a katulagan iti Apo ken mangdayaw kadagita a katulagan ket maikari nga umawat iti personal a paltiing, tapno mabendisionan iti panagserserbi dagiti anghel, tapno makisarita iti Dios, tapno umawat iti pakabuklan ti ebanghelio, ken, kangrunaanna, tapno agbalin nga agtawid kas ken ni Jesucristo iti amin nga adda iti Amatayo” (“Men and Women and Priesthood Power,” Ensign, Sept. 2014, 32).

Insurat ti umuna a panguluen ti Relief Society iti Salt Lake Stake idi 1878: “Mariknatayo ti pudno ti panagyaman a babaen ti bendision ti Nailangitan nga Amatayo, datayo, dagiti katulonganna a babbai ket naawagan a kadua nga agtrabtrabaho dagiti kakabsattayo a lallaki iti panangbangon iti pagarian ti Dios iti daga, iti panangtulong a mangbangon kadagiti Templo, a pakaawatantayo kadagiti bendision para ita a panawen ken iti kinaagnanayon. Iti amin nga ordinansa a naawat iti Balay ti Apo, agtakder ti babai iti abay ti lalaki, nga agpadpada para kadagiti sibibiag ken natay, a mangipakita nga awan ti lalaki no awan ti babai wenno ti babai nga awan ti lalaki iti Apo” (Maria Isabella Horne, Elmina S. Taylor, ken Serepta M. Heywood, “To the Presidents and Members of the Relief Society of Salt Lake Stake of Zion, Greeting!” Woman’s Exponent, Enero 15, 1878, 123).

Panangpadur-as iti Panangisurotayo

Ipamaysam ti panangisurom iti doktrina. Siguraduem a maipamaysa dagiti panaglilinnawag iti klasem ti doktrina nga adda pakainaiganna iti pundasion kadagiti nasantuan a kasuratan. Mabalinmo nga aramiden daytoy babaen ti panagsaludsod kadagiti miembro ti klase a mangbasa kadagiti nasantuan a kasuratan ket kalpasanna mangibinglay kadagiti kinapudno a nasarakanda, kasta met kadagiti padasda iti panagtungpal kadagita a kinapudno. (Kitaen iti Panangisuro iti Wagas ti Mangisalakan, 20–21.)