“Agosto 23–29. Doktrina ken Katulagan 93: ‘Maawat iti Pakabuklanna,’” Umaykayo, Sumurot Kaniak—Para iti Sunday School: Doktrina ken Katulagan 2021 (2020)
“Agosto 23–29. Doktrina ken Katulagan 93,” Umaykayo, Sumurot Kaniak—Para iti Sunday School
Makitak ti Anak ti Tao nga Agtaktakder iti Makanawan ti Dios, ni Walter Rane
Agosto 23–29
Doktrina ken Katulagan 93
“Maawat iti Pakabuklanna”
Dagiti tao nga isurom ket napateg nga espiritu nga annak a lallaki ken babbai dagiti Nailangitan a Nagannak ken addaan iti nadiosan a potensial. Kalpasan ti panagadal iti Doktrina ken Katulagan 93, ania ti mariknam a makaparegta nga aramiden a mangtulong kadakuada a dumur-as iti “silaw ken kinapudno”? (bersikulo 36).
Isuratmo dagiti Impresionmo
Yawis ti Panagbibinninglay
Isurat iti pisarra Iti Doktrina ken Katulagan 93, Inawisnatayo ni Jesucristo nga … Awisem dagiti miembro ti klase a mangisingasing kadagiti wagas a pangileppasanda iti binatog.
Isuro ti Doktrina
Agrukbabtayo iti Dios nga Ama ken ti Anakna, ni Jesucristo.
-
Iti Doktrina ken Katulagan 93, mabalin a nasarakanen dagiti miembro ti klase ti adu a kinapudno maipapan iti Nailangitan nga Ama ken ni Jesucristo. Awisem dagiti miembro ti klase a mangibinglay no ania ti nasarakanda. Nalabit a mabalinmo pay a bingayen ti klase kadagiti grupo ket ikkam ti tunggal grupo iti sumagmamano a bersikulo nga aggigiddan nga adalenda. Kalpasanna mabalin nga ibinglay ti tunggal grupo iti klase no ania ti nasursuroda maipapan iti “no kasano ti agdaydayaw, ken … no ania ti pagdaydayawan[tayo]” (bersikulo 19).
Doktrina ken Katulagan 93:1–39
Mabalintayo nga “awaten ti pakabuklan ti [Dios], ket maitan-ok.”
Umawattayo iti lawag ti Dios no agtungpaltayo kadagiti bilinna ken agsursurotayo manipud Kenkuana.
-
Doktrina ken Katulagan 93 naglaon iti adu a kinapudno maipapan iti agnanayon a kasasaad ken potensialtayo kas annak ti Dios. Nalabit a natakuatanen ti sumagmamano a miembro ti klase dagitoy a kinapudno kabayatan ti panagadalda iti benneg 93 iti pagtaengan (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia). Nalabit a makaibinglay dagiti nagadal no ania ti nasarakanda, ket matakuatanyo dagiti dadduma pay a kinapudno kas maysa a klase. Kasano a maaringan dagitoy a kinapudno ti wagas a panangtratotayo kadagiti tao iti aglawlawtayo—ken iti bagbagitayo?
-
Daytoy ti sabali pay a wagas a panagsursurotayo maipapan iti agnanayon a kasasaad ken potensialtayo: mabalin nga aggigiddan dagiti miembro ti klase a mangbasa iti bersikulo 24 ken isurat iti pisarra ti tallo a paulo Kas kadatayo ita, Kas kadatayo idi, ken Kas kadatayo iti masakbayan. Mabalinmo a bingayen ti klase iti tallo a grupo ket idawat iti tunggal grupo a mangsukisok iti Doktrina ken Katulagan 93: 6–39, a mangsapsapul kadagiti kinapudno maipapan iti agdama, napalabas, wenno masakbayantayo nga agnanayon a pakabigbigan. Mabalin nga isurat ti tunggal grupo iti baba dagiti paulo no ania ti nasarakanda. Kasano a maimpluensiaan dagitoy a kinapudno dagiti pilitayo?
Doktrina ken Katulagan 93:40–50
Nabilintayo nga “urnosen ti balay[tayo].”
-
Ti bilin nga “urnosem ti balaymo” (bersikulo 43) saan a maipanggep iti panangurnos kadagiti cupboard ken kabinet ngem maipanggep iti panangisuro—ken panagsursuro iti—“silaw ken kinapudno” (bersikulo 42). Nalabit a mabalin nga ibinglay dagiti miembro ti klase no kasano a padpadasenda a suroten daytoy a balakad. Ania dagiti sumagmamano a karit a pakaipaspasanguanda? Ania dagiti kinapudno wenno pagbatayan iti Doktrina ken Katulagan 93 a makatulong?
-
Kas paset ti panangilawlawagmo kadagitoy a bersikulo, mabalin a basaen dagiti miembro ti klase dagiti paset ti mensahe ni Presidente Henry B. Eyring “A Home Where the Spirit of the Lord Dwells” (Ensign wenno Liahona, Mayo 2019, 22–25) ken ibinglay dagiti ania man a nalawag a pannakaammo ken pannakaawat a mainaig kadagiti kinapudno iti Doktrina ken Katulagan 93:40–50. (Kitaen met iti palawag iti “Dagiti Nainayon a Resources.”)
Dagiti Nainayon a Resources
“Kitaen a napaspasnekda ken masekseknanda iti pagtaengan.”
Insuro ni Elder David A. Bednar:
“Iti opisinak adda maysa a napintas a naipinta a ladawan ti talon ti trigo. Ti naipinta a ladawan ti dakkel a koleksion dagiti saggaysa a paspasada ti pinta—awan kadagitoy a nailasin ti makaay-ayo unay wenno makaawis iti imatang. Kinapudnona, no addaka iti asideg dagiti kanbas, makitam laeng ti napagtitipon ti kasla awan pakainaiganna ken nalaad a pasada ti pinta ti maris amarilio ken balitok ken kayumanggi a pinta. Nupay kasta, bayat ti in-inut a yadayom iti kanbas, agdadanggay a sangkamaysa ti amin a saggaysa a kitikit ket mangpataud iti nakaskasdaaw a landscape ti maysa a talon ti trigo. No agtitinnulong ti adu a gagangay, saggaysa a paspasada ti pinta tapno mangparnuay iti makaawis rikna ken napintas a naipinta a ladawan.
“Tunggal sangapamiliaan a panagkararag, tunggal paset ti sangapamiliaan a panagadal iti nasantuan a kasuratan, ken tunggal family home evening ket maysa a pasada ti pinta iti kanbas dagiti kararuatayo. Awan ti maysa a pasamak a mabalin a kasla a makaawis unay iti imatang wenno nakallalagip. Ngem kas iti panagdidinnanggay ti amarilio ken balitok ken kayumanggi a paspasada ti pinta ket mangparnuay iti makaawis imatang nga obra maestra, isu a ti agtultuloy a panagaramidtayo kadagiti kasla babassit a banag ket makaiturong kadatayo kadagiti napateg a naespirituan a bunga. ‘Gapuna, saankayo koma a mabannog nga agaramid iti nasayaat, ta isagsaganayo ti pamuon ti naindaklan nga aramid. Ket agtaud kadagiti babassit a banag ti naindaklan’ (D&K 64:33). Ti panagtultuloy ket napateg a prinsipio bayat ti panangikabil iti pundasion ti naindaklan nga aramid iti bukodtayo a biag ken bayat ti panagbalintayo a napaspasnek ken masekseknan iti bukodtayo a pagtaengan” (“More Diligent and Concerned at Home,” Ensign wenno Liahona, Nob. 2009, 19–20).
Panangpadur-as iti Panangisurotayo
Ipeksam ti ayat. “Depende kadagiti kasasaadmo, ti panangipakita iti ayat kadagiti sursuruam ket mabalin a kaipapanan ti panangted kadakuada kadagiti naimpusuan a panagdayaw, panagbalin nga interesado iti biagda, panagdengngeg a nasayaat kadakuada, panangiraman kadakuada iti adalen, panagserbi kadakuada, wenno sidudungngo a panangkablaaw kadakuada no makitam ida” (Panangisuro iti Wagas ti Mangisalakan, 6).