lalaki ken babai nga agisagsagana iti taraon

Agosto 16–22

Doktrina ken Katulagan 89–92

“Pagbatayan nga addaan iti Kari”

Bayat ti panagsaganam a mangisuro, ibilangmo ti pagbatayan a napateg kenka bayat ti panagadalmo iti benneg 89–92 iti daytoy a lawas.

Isuratmo dagiti Impresionmo

icon iti panagbibinninglay

Yawis ti Panagbibinninglay

Dagitoy ti saludsod a mabalinmo nga usaren tapno maallukoy dagiti miembro ti klase a mangibinglay iti maysa a banag manipud iti panagadalda iti nasantuan a kasuratan: Ania ti nabasam iti daytoy a lawas a nangpapigsa iti pammatim ken ni Jesucristo? Iti awag ni Joseph Smith kas propeta? Ania ti nabasam a nakatulong kenka a nasaysayaat a makaawat iti plano ti Ama para kadagiti annakna?

icon iti panangisuro

Isuro ti Doktrina

Doktrina ken Katulagan 89

Ti Word of Wisdom ket maysa a “pagbatayan nga addaan iti kari.”

• Mabalin a makita ti adu a tao a ti Word of Wisdom ket maysa laeng a listaan dagiti nasken nga “aramiden” ken “saan nga aramiden.” Tapno matulongan dagiti miembro ti klase a mangutob kadagiti pagbatayan para iti daytoy a panangiturong, awisem ida a mangsukisok iti Doktrina ken Katulagan 89 nga addaan kadagiti saludsod kas iti sumaganad iti panunot: Apay nga ited ti Apo kadatayo iti Word of Wisdom? Ania ti isuro daytoy a paltiing kadatayo maipapan iti Nailangitan nga Ama ken ti planona para kadatayo? Mabalin a makatulong ti palawag iti “Dagiti Nainayon a Resources”. No mariknam a pagsayaatan daytoy dagiti miembro ti klase, mabalinmo nga awisen ida a mangilista iti pisarra dagiti makapasalun-at ken makadangran nga aramid a binigbig ti Apo iti Doktrina ken Katulagan 89:5–17. Kalpasanna mabalinda nga irebyu ti “Salun-at iti Bagi ken Rikna” iti Para iti Pigsa dagiti Agtutubo (25–27) ket inayon iti listaanda ti dadduma pay a banag a masarakanda. Kasano a naipatungpal dagiti kari kadagiti bersikulo 18–21 iti biagtayo?

• Daytoy ti sabali a wagas tapno matulongan dagiti miembro ti klase a mangilawaglawag kadagiti pagbatayan iti Word of Wisdom. Mabalinmo a bingayen ti klase iti tallo a grupo ket kiddawem iti tunggal grupo a mangbasa iti benneg 89, a mangsapsapul kadagiti sungbat iti maysa kadagiti sumaganad a saludsod: Ania dagiti pagbatayan a makaited iti pammaregta iti maysa a tao a mangikarkarigatan nga agtungpal iti Word of Wisdom? Ania dagiti pagbatayan a makatulong kadatayo nga agbalin a saan a managhusga kadagiti mangikarkarigatan nga agtungpal iti daytoy? Ania dagiti pagbatayan a makaliwliwa kadatayo no addaantayo kadagiti problema iti salun-at iti baet ti panagtungpal iti Word of Wisdom? Kas paset daytoy nga aktibidad, mabalinmo nga ibinglay ti padas ni Presidente Dieter F. Uchtdorf iti panagsanayna nga agbalin a maysa a makidangdangadang a piloto (kitaen iti “Continue in Patience,” Ensign wenno Liahona, Mayo 2010, 58). Allukoyem dagiti miembro ti klase a mangpanunot iti maysa a banag a nariknada a nakaawisan ti imatangda kabayatan dagiti panaglilinnawag, ken ikkam ida iti gundaway a mangisurat kadagiti impresionda.

  ubbing a lallaki nga agtartaray iti igid ti baybay

  Impalgak ti Dios ti Word of Wisdom a mangtulong kadagiti annakna.

Doktrina ken Katulagan 90:1–17

Iggem ti Umuna a Panguluen “dagiti tulbek ti pagarian.”

• Ti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ket mangisingasing a sukisoken dagiti miembro ti Doktrina ken Katulagan 90:1–17 tapno masursuro maipapan iti Umuna a Panguluen. Mabalinmo nga idawat kadagiti miembro ti klase no ania ti nasursuroda manipud iti daytoy nga aktibidad, wenno mabalinmo a sukisoken dagitoy a bersikulo kas maysa a klase. Mabalin pay a sapulen dagiti miembro ti klase dagiti nalawag a pannakaammo ken pannakaawat iti “Come, Listen to a Prophet’s Voice” (Hymns, no. 21) wenno sabali pay a kanta maipapan kadagiti propeta a mainaig kadagiti pannursuro kadagitoy a bersikulo. Kasano a natulongannakayo ti panagserbi iti Umuna a Panguluen a mangam-ammo iti Nailangitan nga Ama ken ni Jesucristo?

Doktrina ken Katulagan 91

“Ipakita ti Espiritu ti kinapudno.”

• Iti lubong iti agdama, maipasangotayo kadagiti mensahe a naglaon iti “adu a banag … a pudno” ken “adu a banag … a saan a pudno” (dagiti bersikulo 1–2). Awisem dagiti miembro ti klase a mangsapul iti benneg 91 ti balakad maipanggep iti Apocrypha a makatulong kadakuada a mangilasin iti kinapudno kadagiti mensahe a pakaipasanguanda. Ania dagiti pagarigan a mabalinda nga ibinglay maipapan ti no kasano a nakatulong ti Espiritu kadakuada a mangilasin iti kinapudno?

dagiti nainayon a resources icon

Dagiti Nainayon a Resources

Ti Word of Wisdom.

Insuro ni Presidente Boyd K. Packer:

Ti Word of Wisdom ket ‘naited para iti pagbatayan nga addaan iti kari.’ [Doktrina ken Katulagan 89:3]. Ti balikas a pagbatayan iti paltiing ket maysa a napateg unay. Ti maysa a pagbatayan ket managibtur a kinapudno, maysa a linteg, maysa nga annuroten a mabalinyo nga aramaten a mangiwanwan kadakayo iti panagaramid kadagiti pangngeddeng. Gagangay a saan a mailawlawag iti detalye dagiti pagbatayan. Dayta mangpanaw kenka a nawaya tapno sarakem ti dalanmo nga addaan iti managibtur a kinapudno, maysa a pagbatayan, kas pangiwanwanmo.

“Isurat dagiti miembro iti panangsaludsod no daytoy a banag wenno dayta ket maisuppiat iti Word of Wisdom. Ammo unay a maisuppiat iti daytoy ti tsaa, kape, arak, ken tabako. Saan a nailawlawag daytoy iti ad-adu pay a detalye. Ketdi, sangkamaysa nga isurotayo ti pagbatayan nga addaan kadagiti naikari a bendision. Adu dagiti pakairuaman, makairuam a banag a mabalin ti maysa ti uminom wenno aggagalgal wenno agsinglot wenno agindieksion a mangdangran iti agpada a bagi ken espiritu a saan a nadakamat iti paltiing. …

“Dayawem ti pagbatayan ti Word of Wisdom ket umawatkanto kadagiti naikari a bendision” (“The Word of Wisdom: The Principle and the Promises,” Ensign, Mayo 1996, 17–18).

Panangpadur-as iti Panangisurotayo

Masansan a mangiburay iti pammaneknek. Ti simple, naimpusuan a pammaneknekmo maipapan kadagiti naespirituan a kinapudno ket nabileg a makaimpluensia kadagiti sursuruam. Saan a nasken a napintas wenno atiddog ti pammaneknekmo. Kas pagarigan, mabalin a simple a pammaneknek daytoy maipapan kadagiti bendision nga inawatmo manipud iti panagtungpal iti Word of Wisdom. (Kitaen iti Panangisuro iti Wagas ti Mangisalakan,35.)