siled nga addaan kadagiti tugaw ken bangko

Agosto 9–15

Doktrina ken Katulagan 88

“Mangbangonkayo … iti Balay ti Dios”

Kas maysa a mannursuro iti ebanghelio, addaanka iti pagrebbengan a makatulong iti klasem nga “isuro iti tunggal maysa ti doktrina ti pagarian” ken “ti nainsiriban a balikas” (Doktrina ken Katulagan 88: 77, 118). Malaksid iti panangibinglay kadagiti banag a nakaparegta kenka a mangisuro manipud iti Doktrina ken Katulagan 88, allukoyem dagiti miembro ti klase a mangisuro iti tunggal maysa no ania ti nasursuroda.

Isuratmo dagiti Impresionmo

icon iti panagbibinninglay

Yawis ti Panagbibinninglay

No dadduma iparikna ti maysa a ladawan ti panagbibinninglay. Mabalinmo nga ipakita ti ladawan ti maysa a sanga ti olibo (wenno idrowing ti maysa iti pisarra) ket awisem dagiti miembro ti klase a mangibinglay kadagiti bersikulo manipud iti Doktrina ken Katulagan 88 a mangtulong kadakuada a makaawat no apay a mabalin nga inawagan ni Joseph Smith daytoy a paltiing iti “’bulong ti olibo’… , ti mensahe ti kappia ti Apo kadatayo” (paulo a benneg).

icon iti panangisuro

Isuro ti Doktrina

Doktrina ken Katulagan 88:6–50

Naggapu ti silaw ken linteg ken ni Jesucristo.

• Tapno matulongan ti klasem a makaawat ti Doktrina ken Katulagan 88: 6–50, mabalinmo nga isurat ti silaw ken paglintegan iti pisarra ket bingayem ti klase iti dua a grupo. Mabalin nga irebyu ti maysa a grupo ti Doktrina ken Katulagan 88:6–13, 40–50, nga agsapul kadagiti banag a masursuroda maipapan ken ni Jesucristo manipud kadagiti reperensia iti silaw kadagitoy a bersikulo. Mabalin a sukisoken ti sabali pay a grupo dagiti bersikulo 13–26, 34–42, sapulem no ania ti masursuroda maipapan iti kinapateg ti panangsurot iti paglinteganna. Ania ti isuro dagiti kinapudno maipapan iti silaw ken paglintegan iti benneg 88 maipapan iti Mangisalakan? Kasano a paregtaennatayo nga agbalin nga ad-adda a kas Kenkuana?

Doktrina ken Katulagan 88:62–76, 119–26

Makapagbalintayo a nadalus babaen ti Pannubbot ni Jesucristo.

• Ti bilin ti Apo a “pasantuenyo ti bagbagiyo” makita iti mamindua iti benneg 88 (dagiti bersikulo 68, 74). No mariknam a naparegtaka a mangilawlawag no ania ti kaipapanan dayta, mabalinmo nga irugi babaen ti aggigiddan a panangsukisokyo iti kaipapanan ti balikas a pasantuen wenno panangrebyu iti sumagmamano a binatog a nakalista iti “Pannakapasanto” iti Pangiwanwan iti Nasantuan a Kasuratan (scriptures.ChurchofJesusChrist.org). Mabalinmo pay nga awisen dagiti miembro ti klase a mangbasa iti Doktrina ken Katulagan 88:62–76, 119–26 ket paglilinnawagan dagiti saludsod kas kadagitoy iti maysa a kapareha: Kasano nga agbalintayo a napasanto? Ania dagiti kari manipud iti Apo a masarakantayo kadagitoy a bersikulo? Apay a kayat ti Apo nga agbalintayo a nadalus? Mabalin pay a masarakanda dagiti sungbat kadagitoy a saludsod iti mensahe ni Presidente Dallin H. Oaks “Converted unto the Lord” (Ensign wenno Liahona, Mayo 2019, 91-94; kitaen met iti “Dagiti Nainayon a Resources”).

Doktrina ken Katulagan 88:77–78, 118–26

Kayat ti Apo nga agsursurotayo babaen ti panagadal ken babaen ti pammati.

• Ti balakad nga inted ti Apo a tumulong a mangipasdek iti “pagadalan dagiti propeta” iti Kirtland (bersikulo 137) ket makatulong iti klasem kadagiti panagkagumaanmo nga “isuro iti tunggal maysa ti doktrina ti pagarian” (bersikulo 77). Nalabit a mabalinmo a sukisoken dagiti bersikulo 77–78 ken 118–26 ket paglilinnawagan no kasano nga aramidem ti klasem a “balay a pagsursuruan” (bersikulo 119). Mabalin nga isurat dagiti miembro ti klase ti sumagmamano nga “annuroten iti klase” wenno pagbatayan a maibatay kadagitoy a bersikulo a mangiwanwanto iti panagsursuroyo iti klase. Mabalinmo pay nga idawat kadagiti miembro ti klase a mangibinglay no kasano nga ikarkarigtanda ti mangyaplikar kadagitoy a pagbatayan bayat ti “panagadal[da]” (bersikulo 118).

  ubbing nga agad-adal kadagiti nasantuan a kasuratan

  Makapagbalin dagiti pagtaengantayo a lugar ti naespirituan a panagsursuro.

Doktrina ken Katulagan 88:119

Ti templo ti balay ti Dios.

• No mabalin, i-display ti maysa a ladawan ti kaasitgan a templo iti pisarra, ket awisem ti klase a mangisurat iti abay daytoy dagiti balikas manipud iti bersikulo 119 a mausar a pangiladawan iti balay ti Apo. Awisem ida a mangibinglay kadagiti padas a mangipakita no kasano nga agpaparis ti tunggal panangiladawan iti templo. Mabalinmo pay nga ilawlawag no kasano a mangiwanwan iti biagtayo daytoy a bersikulo.

dagiti nainayon a resources icon

Dagiti Nainayon a Resources

Nadalusan babaen iti panagbabawi.

Insuro ni Presidente Dallin H. Oaks:

Mangrugi ti panagbabawi iti Mangisalakantayo, ket rag-o, daytoy, saan a dagensen. …

“Tapno maugasan babaen iti panagbabawi, nasken a tallikudantayo dagiti basoltayo ken ipudnotayo ida iti Apo ken iti mortal nga ukomna no kasapulan (kitaen iti Doktrina ken Katulagan 58:43). Insuro ni Alma a nasken pay nga “itugot[tayo] dagiti aramid ti kinalinteg’ (Alma 5:35). Paset amin daytoy ti masansan nga awis iti nasantuan a kasuratan nga umasideg ken ni Cristo.

“Nasken a makiranudtayo iti sakramento iti tunggal aldaw ti Sabbath. Iti dayta nga ordinansa agaramidtayo kadagiti katulagan ken umawat kadagiti bendision a makatulong kadatayo a mangparmek iti amin nga aramid ken tarigagay a manglapped kadatayo manipud iti kinaan-anay a yawis ti Mangisalakantayo a gun-odentayo (kitaen iti Mateo 5:48; 3 Nephi 12:48). No ‘tallikudantayo ti [bagbagitayo] iti amin a di nadiosan, ken ayatentayo ti Dios iti amin a kabaelan, panunot ken pigsa[tayo],’ kalpasanna makapagbalintayo a ‘naan-anay ken ni Cristo’ ken ‘mapasanto’ babaen ti panagayus ti darana, ken ‘agbalin[tayo] a nasantuan, nga awan mulitna’ (Moroni 10:32–33). Nagpintasen a kari! Nagpintasen a milagro! Nagpintasen a bendision!” (“Cleansed by Repentance,” Ensign wenno Liahona, Mayo 2019, 92).

Panangpadur-as iti Panangisurotayo

Agsapul kadagiti resources a mangsuporta kadagiti pagbatayan. Mainayon kadagiti singasing iti daytoy a balabala, mabalinmo a sapulen dagiti video, musika, wenno ti artwork iti Simbaan a mangisuro kadagiti pagbatayan iti Doktrina ken Katulagan 88. (Kitaen iti Panangisuro iti Wagas ti Mangisalakan, 17–18.)