pamilia a magmagna a mapan iti templo

Agosto 2–8

Doktrina ken Katulagan 85–87

“Agtakderkayo kadagiti Nasantuan a Lugar”

Saanmo a piliten nga isuro ti tunggal bersikulo—wenno uray pay ti tunggal benneg—ti Doktrina ken Katulagan iti Sunday School. Bay-anyo a ti Espiritu a mangtarabay kadakayo, ket agbalin a managresponde iti ania man a masarakan dagiti miembro ti klase nga adda pakainaiganna iti biagda.

Isuratmo dagiti Impresionmo

icon iti panagbibinninglay

Yawis ti Panagbibinninglay

Mabalin a basaen biit dagiti miembro ti klase ti Doktrina ken Katulagan 85–87 para iti maysa a balikas wenno ragup dagiti balikas a kasla napateg kadakuada (nalabit a maysa a minarkaanda kadagiti nasantuan a kasuratanda). Paisuratmo dagitoy a bersikulo iti pisarra, ket pumilika iti sumagmamano a paglilinnawagan.

icon iti panangisuro

Isuro ti Doktrina

Doktrina ken Katulagan 85:6

Agsarita ti Espiritu iti “naalumamay, bassit a timek.”

• Iti Doktrina ken Katulagan 85:6, inusar ni Propeta Joseph Smith ti mangiladawan a pagsasao a mangisarita maipapan no kasano a nakisao ti Espiritu kenkuana. Ania ti masursurotayo maipapan iti Espiritu manipud iti panangiladawanna? Mabalinmo a saludsoden kadagiti miembro ti klase a mangpanunot maipapan kadagiti panawen a nakisao ti Espiritu kadakuada—no kasano nga iladawanda ti padasda? Masarakan dagiti mainayon a pangiladawan kadagiti binatog iti nasantuan a kasuratan kas kadagitoy: Lucas 24:32; Mosiah 5:2; Alma 32: 28; Helaman 5:30; Doktrina ken Katulagan 6:22–23; 11:12–13.

• Makapanunotka kadi iti maysa a banag nga adalen wenno demonstrasion a mangipakita iti naalumamay, babassit nga arasaas ti Espiritu? Nalabit a mabalin nga addaanka iti sumagmamano a sagrado a musika a patokaren a sikakapsut bayat ti iseserrek dagiti miembro ti klase iti siled. Mabalin a pagsasaritaan dagiti miembro ti klase maipapan no kasano nga iparikna ti musika kadakuada no kasano ti karigat ti dumngeg iti dayta a musika no adda dagiti mangsingsinga nga arimbangaw. Mabalin a mangiturong daytoy iti panaglilinnawag maipapan kadagiti pannakasinga iti panagbiagtayo a manglapped kadatayo manipud iti pannakangngegda iti naalumamay, bassit a timek. Mabalin a mangibinglay dagiti miembro ti klase no ania ti aramidenda tapno manayonan ti panagriknada iti Espiritu—masarakan ti sumagmamano a balakad iti “Dagiti Nainayon a Resources.”

Doktrina ken Katulagan 86:1–7

Maummong dagiti nalinteg kadagiti maudi nga aldaw .

• Makatulong ti sumaganad nga aktibidad kadagiti miembro ti klase a makaawat iti simbolismo iti pangngarig ti trigo ken ti ruruot: Mabalinmo nga isurat dagiti naisimbolo a ragup dagiti balikas manipud iti pangngarig (kas iti “dagiti agmulmula iti bukel,” “rinimbawan dagiti ruot dagiti trigo,” “nabaludbod ti panagrangpayana uray,” ken “panangummong iti trigo” [dagiti bersikulo 2–4, 7]) ken dagiti mabalin a kayulogan (kas iti “dagiti Apostol,” “ti Ikakalilis iti Kipapudno,” “ti Pannakaisubli,” ken “ti aramid ti misionario”) iti nagsisina nga akikid a papel ket ipaskil dagitoy iti pisarra. Kalpasanna makapagtitinnulong dagiti miembro ti klase a mangiparis kadagiti simbolo iti kaipapananda, nga us-usaren no ania ti masursuroda manipud iti Doktrina ken Katulagan 86:1–7 (mabalinda pay a basaen ti Mateo 13:37–43). Apay a napateg nga isarita ti Apo daytoy a paltiing “kadakayo a katulongak”? (bersikulo 1). Ania dagiti mensahe a masarakantayo a mainaig iti panagserbi iti Apo? (kitaen met iti bersikulo 11).

Doktrina ken Katulagan 87:2, 6, 8

Masarakan ti talna kadagiti “nasantuan a lugar.”

babai iti ruar ti templo

Ti templo ti maysa a nasantuan a lugar a pakariknaantayo iti ayat ti Dios.

• Tapno matulongan dagiti miembro ti klase a makaawat iti panagkasapulan nga “agtakder … kadagiti nasantuan a lugar,” mabalinmo nga irugi babaen ti panangawis kadakuada a mangilista iti sumagmamano a karit a sangsanguentayo iti ud-udina nga aldaw. Kasano a makatulong ti sumagmamano a pagarigan iti Doktrina ken Katulagan 87:2, 6. Kalpasanna mabalinmo nga ilawlawag no kasano a makatulong ti awis ti Apo iti bersikulo 8 kadagitoy a karit. Makatulong dagiti kastoy a saludsod:

  Ania ti napateg maipapan iti balikas nga “agtakder” iti daytoy a bersikulo?

  Ania ti mangaramid iti maysa a lugar a nasantuan?

  Ania ti mabalin a mangtignay iti maysa a tao manipud iti nasantuan a lugar?

  Kasano a masiguradotayo a saantayo a matignay?

• Nalabit nga agtallugod dagiti miembro ti klase a mangibinglay iti tunggal maysa dagiti pagarigan ti “nasantuan a lugar” ken no ania ti mangiparikna kadakuada a nasantuan (mabalinmo nga ilawlawag a ti maysa a nasantuan a lugar ket ad-adda pay ngem iti pisikal a lokasion). Ti video “Standing in Holy Places” (ChurchofJesusChrist.org) ket makaited kadagiti nayon pay a kapanunotan. Bayat ti panangibinglayda, allukoyem ida a mangisarita maipapan no apay a nasantuan kadakuada dagita a lugar. Kasano a tulongannatayo dagitoy a nasantuan a lugar a mangsapul iti kappia iti baet dagiti peggad iti ud-udina nga aldaw?

dagiti nayon a resources icon

Dagiti Nainayon a Resources

Mangsapul iti “naalumamay ken naulimek a kanito iti inaldaw.”

Ni Sister Vicki F. Matsumori, sigud a mammagbaga iti Primary General Presidency, nangted iti daytoy a balakad: “Gapu ta masansan a mailadawan ti Espiritu kas maysa a naalumamay, bassit a timek, … napateg a maaddaantayo pay iti oras ti kinaulimek iti biagtayo. Binalakadannatayo ti Apo nga ‘agtalnakayo, ket ammuenyo a siak ti Dios’ [Salmo 46:10]. No mangtedtayo iti naalumamay ken naulimek a kanito iti inaldaw no ditayo mabatikos babaen ti telebision, computer, video games, wenno bukod nga elecronic device, palugodantayo dayta naalumamay, bassit a timek iti gundaway a mangted iti personal a paltiing ken mangyarasaas iti nasam-it a pannarabay, pammatalged, ken liwliwa kadatayo” (“Helping Others Recognize the Whisperings of the Spirit,” Ensign wenno Liahona, Nob. 2009, 11).

Panangpadur-as iti Panangisurotayo

Agsaganaka a pampanunotem dagiti tao. “Bay-am a ti pannakaawatmo kadagiti tao a sursuruam ti mangtarabay iti [panagsaganam]. … Dagiti mannursuro a kas ken Cristo ket saan a nakatalimudok iti masinunuo nga estilo wenno pamay-an; nakatalimudokda iti panangtulong kadagiti tao a maaddaan iti pammati ken Jesucristo” (Panangisuro iti Wagas ti Mangisalakan,7).