Eb’ laj santil paab’anel neke’q’axon toj Kirtland, xb’aan laj Sam Lawlor

12–18 abril

Tzol’leb’ ut Sumwank 37–40

“Wi ink’a’ junajex, moko wehex ta”

Rub’elaj xk’uub’ankil li taab’aanu sa’ li tzoleb’aal, tzol Tzolʼlebʼ ut Sumwank 37–40 rik’in tijok. Naru nakak’ul aamusiq’ejil b’eresinkil sa’ xkawresinkil aawib’ re k’utuk wi xb’een wa nakak’ul aanumsihom sa’eb’ li raqal a’in reheb’ li loq’laj hu.

Tz’iib’a li nakak’oxla

Xkanab’ankileb’ chi wotzok

K’oxla xtz’iib’ankil sa’ li pizarron: Naq xwil ru Tzolʼlebʼ ut Sumwank 37–40 xweek’a naq li Qaawa’ yoo chixyeeb’al we . Eb’ li komon sa’ li tzoleb’aal naru te’xwotz chan raj ru te’xtz’aqob’resi ru li ch’ol aatin. Jo’ xkomon lix sumehomeb’, waklesi xch’ooleb’ chixwotzb’aleb’ raqal li xe’ril ru.

Xk’utb’al li tzolʼlebʼ

Tzolʼlebʼ ut Sumwank 37–38

Li Dios nokoxch’utub’ re qosob’tesinkil.

• Wan naq moko ch’a’aj ta chik xtzolb’aleb’ li k’utb’esinb’il na’leb’ neke’tawman sa’ li Tzol’leb’ ut Sumwank wi naqak’oxla qib’ laa’o ut ink’a’ eb’ li kristiaan ke’k’ehe’ wi’ chaq. Re xtenq’ankileb’ li komon sa’ li tzoleb’aal chixb’aanunkil a’an rik’ineb’ li tasal 37–38, naru taakanab’eb’ chixk’oxlankil naq wankeb’ aran Fayette, Nueva York, sa’ 1831. Jun komon sa’ li tzoleb’aal naru nawan jo’ laj Jose Smith ut taaril ru choq’ eere li tasal 37. Chan raj ru xqak’ulub’a li taqlahom a’an? Maare eb’ li komon sa’ li tzoleb’aal te’ruuq raj chixk’oxlankil naq wan jun ramiiweb’ li ink’a’ naraj xch’utub’ankil rib’ aran Ohio; eb’ a’an naru neke’xtz’il rix li tasal 38 re xsik’b’al na’leb’ li naru naxwaklesi xch’ool li ramiiweb’ re tixpaab’ li taqlahom re xch’utub’ankil rib’. (Wi na’ajman ru, naru nakab’eresiheb’ sa’eb’ li raqal 1–4, 11–12, 17–22, ut 27–33). Maare eb’ li komon sa’ li tzoleb’aal te’raj ajwi’ aatinak chirix chan ru naq eb’ li na’leb’ jo’eb’ a’an xe’k’anjelak reheb’ sa’eb’ li hoonal b’ar wi’ xe’raj ru ab’ink chiru junaq taqlahom li chanchan naq ch’a’aj.

• Ink’a’ chik napatz’man reheb’ laj Santil Paab’anel sa’ Roso’jikeb’ li Kutan naq te’xch’utub’ rib’ re xik’ sa’ junaq na’ajej, a’b’an toj naqach’utub’ qib’ jo’ junkab’al, teep, ut oqech. Re aatinak chirix chan ru naq xch’utub’ankil qib’ nokorosob’tesi sa’eb’ li kutan a’in, naru taajach ru li tzoleb’aal sa’ wiib’ ch’uut. Kanab’ jun li ch’uut chixtz’ilb’al rix Tzolʼlebʼ ut Sumwank 38:31–33 ut te’xsik’ li osob’tesihom nachal naq naqach’utub’ qib’ jo’ junkab’al, ut kanab’ li ch’uut jun chik chixtz’ilb’al rix li raqal ajwi’ a’an ut te’xsik’eb’ li osob’tesihom nachal naq naqach’utub’ qib’ sa’eb’ li teep ut oqech. Chirix a’an naru te’xwotz lix k’oxlahomeb’ rik’in li tzoleb’aal. Chan ru naq noko’osob’tesiik naq naqach’utub’ qib’ jo’ tzoleb’aal sa’ li Dominkil Tzoleb’aal?

Tzolʼlebʼ ut Sumwank 38:24–27

Lix tenamit li Dios tento naq junajaq ru.

• Eb’ laj santil paab’anel li ke’xch’utub’ rib’ aran Ohio ke’chal chaq sa’ jalan jalanq wanjik, a’b’an li Qaawa’ kixtaqlaheb’ chixq’axb’al ru lix jalanileb’ ut chi wank chi “junajaqeb’ ” (raqal 27). K’a’ut naq wan sut naq ink’a’ naqileb’ li kristiaan chi juntaq’eet? Waklesi xch’ooleb’ li komon sa’ li tzoleb’aal chi k’oxlak chirix chan ru naq neke’wan rik’ineb’ li ras riitz’in naq yooqeb’ chirilb’al ru Tzolʼlebʼ ut Sumwank 38:24–27. K’a’ru naraj naxye xraab’aleb’ li qas qiitz’in jo’ naq naqara qib’ laa’o? K’a’ut naq moko naru ta toowanq jo’ xtenamit li Dios wi ink’a’ junaj qu?

• Li rilb’al ru Tzolʼlebʼ ut Sumwank 38:24–27 naru nokoxk’am chi aatinak chirix li junajil sa’eb’ li qawanjik jo’ komon sa’ jun li teep, jo’ junkab’al, ut wan chik xkomon. Eb’ li video “Un amigo de todos” malaj “Un buen samaritano” li neke’tawman sa’ ChurchofJesusChrist.org naru neke’tenq’an. Qayehaq, eb’ li komon sa’ li tzoleb’aal naru te’xwotz ch’ol aatin malaj na’leb’ neke’xk’ul chirix li video li neke’tenq’an reheb’ chixtawb’al ruheb’ li na’leb’ neke’tawman sa’eb’ li raqal 24–27. Naru ajwi’ te’xtz’il rix ut te’xwotz na’leb’ chirix li patz’om jo’ a’in: “K’a’ru naru ninb’aanu re xtenq’ankil lin teep chireek’ankil junajil?”

Tzolʼlebʼ ut Sumwank 38:39; 39–40

Li Yuwa’b’ej naraj xk’eeb’al qe li b’ihomal re li junelik q’e kutan.

• Wiib’ li kaxukuut naru naxtenq’aheb’ li komon sa’ li tzoleb’aal chi aatinak chirix Tzolʼlebʼ ut Sumwank 38:39. Sa’ jun reheb’ li kaxukuut eb’ li komon sa’ li tzoleb’aal naru te’xyiib’ jun xtusulal lix “b’ihomal li ruchich’och’,” malaj li k’a’aq re ru ninqeb’ xtz’aq arin, a’b’an ink’a’ neke’kana sa’ li yu’am chalel. Sa’ li kaaxukuut jun chik naru te’xyiib’ jun xtusulal li “b’ihomal re junelik q’e kutan,” malaj li k’a’aq re ru nim xloq’al choq’ re li Dios ut naru nakana chi junelik. K’a’ru li numsihom neke’xk’ut chiqu naq li b’ihomal re li junelik q’e kutan jwal ninqeb’ wi’chik xloq’al chiruheb’ lix b’ihomal li ruchich’och’?

• Laj James Covel, jo’ naab’al qe laa’o, tiik li rajom kiwan. A’b’anan, lix q’etom lix taqlahom li Dios a’an jun q’usum aajel ru choq’ qe chiqajunilo. Re xtenq’ankileb’ li komon sa’ li tzoleb’aal chi tzolok chirix lix numsihom laj Covel, naru taakanab’eb’ junjunq reheb’ a’an chixtz’ilb’al rix li tasal 39 re xsik’b’al li k’a’aq re ru kixpatz’ li Qaawa’ naq tixb’aanu. Eb’ lix komon chik naru neke’xsik’ li osob’tesihom kiyeechi’iik re wi na’ab’in. Naru ajwi’ neke’xtz’il rix li tasal 40 re xtawb’al k’a’ut naq laj James Covel ink’a’ kixk’uleb’ li osob’tesihom a’an. Chan ru naru nak’anjelak qik’in li kixnumsi a’an? B’ar wankeb’ li “nachal wi’ xk’a’uxl li ruchich’och’ ” li neke’xram chiqu xk’ulb’al raatin li Dios “rik’in sahil ch’oolejil”? (Tzolʼlebʼ ut Sumwank 40:2).

Xchaab’ilob’resinkil li qak’utum

Ink’a’ na’ajman ru xk’utb’al chixjunil. “Naab’al wan chixyeeb’al sa’ li junjunq tzolok, a’b’an moko na’ajman ta ru naq taak’utmanq chixjunil sa’ jun tzolok re xtoch’b’al xch’ool junaq—chi kok’ aj xsa’ tz’aqal jun malaj wiib’ na’leb’ “ (Li k’utuk jo’ li Kolonel, 7). Li Santil Musiq’ej, li raatineb’ li komon sa’ li tzoleb’aal ut eb’ li na’leb’ sa’ li tusleb’ aatin a’in tate’xtenq’a chixnawb’al k’a’ru taajayali wi’ aawib’.